ຂ່າວລະບຸວ່າ: ໃນການຕ້ອນຮັບທ່ານ ຊານດິບ ອາຍາ ເອກອັກຄະລັດຖະທູດ ອິນເດຍ, ທ່ານ ຫງວຽນຈ້ອງເຫງ້ຍ ໄດ້ສະເໜີສອງປະເທດສືບຕໍ່ສົມທົບກັນຢ່າງແໜ້ນແຟ້ນເພື່ອແນໃສ່ຜັນຂະຫຍາຍຂໍ້ຕົກລົງຂັ້ນສູງບັນລຸໄດ້ໃນການຢ້ຽມຢາມທາງລັດຖະກິດຢູ່ ອິນເດຍ ຂອງທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໃນລະຫວ່າງວັນທີ 30 ກໍລະກົດ ຫາ ວັນທີ 1 ສິງຫາ ທີ່ຜ່ານມາ, ສືບຕໍ່ເຮັດໃຫ້ຄວາມໄວ້ເນື້ອເຊື່ອໃຈທາງດ້ານການເມືອງເລິກເຊິ່ງຂຶ້ນຕື່ມ, ນຳການຮ່ວມມືສືບຕໍ່ເຂົ້າສູ່ລວງເລິກ, ແທດຈິງ ໃນທຸກຂົງເຂດ.
ສ່ວນທ່ານ ຊານດິບ ອາຍາ ເນັ້ນໜັກວ່າ: ຫວຽດນາມ ແລະ ອິນເດຍ ຕ້ອງສືບຕໍ່ຜັນຂະຫຍາຍບັນດາໝາກຜົນໃນກາມຮ່ວມມືທີ່ບັນລຸໄດ້ ແລະ ຕັ້ງໜ້າຊຸກຍູ້ບັນດາຂົງເຂດທີ່ມີຄວາມສາມາດບົ່ມຊ້ອນຫຼາຍຢ່າງເພື່ອໃຫ້ເໝາະສົມກັບທ່າອ່ຽງລວມຂອງຍຸກສະໄໝ, ຮັບໃຊ້ເປົ້າໝາຍພັດທະນາຢ່າງວ່ອງໄວ, ຍືນຍົງ ຂອງແຕ່ລະປະເທດ.
ໃນການຕ້ອນຮັບ, ທ່ານ ອິໂຕະ ນາໂອກິ ເອກອັກຄະຣາຊະທູດ ຍີ່ປຸ່ນປະຈຳ ຫວຽດນາມ, ທ່ານ ຫງວຽນຈ້ອງເຫງ້ຍ ຢັ້ງຢືນວ່າ: ຫວຽດນາມ ຍາມໃດກໍຖື ຍີ່ປຸ່ນ ເປັນຄູ່ຮ່ວມມືຍຸດທະສາດສຳຄັນ ແລະ ສອງປະເທດມີຈຸດທີ່ຄ້າຍຄືກັນຫຼາຍຢ່າງກ່ຽວກັບຜົນປະໂຫຍດ, ມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມື, ໜູນຊ່ວຍຊຶ່ງກັນ ແລະ ກັນ ພ້ອມກັນພັດທະນາ. ທ່ານ ຫງວຽນຈ້ອງເຫງ້ຍ ສະເໜີສະຖານທູດສືບຕໍ່ແມ່ນຂົວຕໍ່ໃນການເພີ່ມທະວີການພົບປະແລກປ່ຽນ, ຮ່ວມມືລະຫວ່າງສອງປະເທດໃນທຸກຊ່ອງທາງພັກ, ລັດ, ສະພາແຫ່ງຊາດ, ພົບປະແລກປ່ຽນປະຊາຊົນ ແລະ ການຮ່ວມມືທ້ອງຖິ່ນ.
ສ່ວນທ່ານ ອິໂຕະ ນາໂອກິ ໄດ້ຢັ້ງຢືນການຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ ເພື່ອສັນຕິພາບ ແລະ ວັດທະນາຖາວອນຢູ່ອາຊີ ແລະ ໃນໂລກ ແມ່ນຂີດໝາຍສຳຄັນເພື່ອໃຫ້ສອງປະເທດຫວນຄືນການພັດທະນາອັນດີງາມຂອງການພົວພັນ ຫວຽດນາມ - ຍີ່ປຸ່ນ ໃນໄລຍະ 50 ປີຜ່ານມາ. ທ່ານເອກອັກຄະຣາຊະທູດປາຖະໜາຢາກໃຫ້ສອງຝ່າຍສືບຕໍ່ເພີ່ມທະວີການຮ່ວມມືຢ່າງແໜ້ນແຟ້ນ, ເລິກເຊິ່ງກວ່າອີກໃນໄລຍະຈະມາເຖິງ.
ຄໍາເຫັນ