ເຄື່ອງນຸ່ງແບບສະບາຍໄດ້ເພີ່ມຮູບແສ່ວມັງກອນ ແລະ ນົກຫົງ, ເສື້ອແບບຈີນບູຮານບວກກັບໂສ້ງຄາວບອຍ, ເສື້ອຖັກແສ່ວບວກກັບກະໂປ່ງໝ້າມ້ຽນຂອງຈີນ. ປີ 2024, “ຊຸດຈີນແບບໃໝ່” ໄດ້ກາຍເປັນແຟຊັນໃໝ່ໃນສື່ສັງຄົມອອນລາຍຂອງຈີນ. ການອອກແບບເຄື່ອງນຸ່ງຖື ເອົາປັດໄຈແບບຈີນປະສົມກັບ ແຟຊັນຍຸກປັດຈຸບັນໄດ້ຮັບຄວາມນິຍົມຊົມຊອບຈາກລູກຄ້ານັບມື້ນັບຫຼາຍຂຶ້ນ. ໂຕເລກຂໍ້ມູນສະແດງໃຫ້ເຫັນວ່າ: ປີ 2023, ຂະໜາດຕະຫຼາດເຄື່ອງນຸ່ງ “ຊຸດຈີນແບບໃໝ່” ມີເຖິງ 1 ຕື້ຢວນ.
“ຊຸດຈີນແບບໃໝ່” ແມ່ນຫຍັງ?
ອັນທີ່ເອີ້ນວ່າ “ຊຸດຈີນແບບໃໝ່”, ທີ່ຈິງແລ້ວບໍ່ມີຄວາມໝາຍຈະແຈ້ງ. ໃນສາຍຕາຂອງລູກຄ້າຊາວໜຸ່ມຍຸກໃໝ່, ເຄື່ອງນຸ່ງທີ່ຖືເອົາປັດໄຈທີ່ມີມູນເຊື້ອແບບຈີນປະສົມເຂົ້າກັບແຟຊັນຍຸກປັດຈຸບັນ, ລ້ວນແຕ່ຖືກເອີ້ນວ່າ: “ຊຸດຈີນແບບໃໝ່”. ມັນບໍ່ໄດ້ຫຼູຫຼາປານໃດ, ແຕ່ໄດ້ເນັ້ນໃສ່ຄວາມລຽບງ່າຍ ແລະ ຄວາມຕ້ອງການໃນຊີວິດປະຈຳວັນ.
“ເປັນຫຍັງຈຶ່ງເອີ້ນວ່າ ເປັນຊຸດຈີນແບບໃໝ່, ເລື່ອງ “ໃໝ່” ນີ້ຕົ້ນຕໍແມ່ນຍ້ອນວ່າ, ໄດ້ເພີ່ມການອອກແບບ ທີ່ທັນສະໄໝບົນພື້ນຖານປັດໄຈທີ່ມີມູນເຊື້ອແບບຈີນ.” ທ່ານ ເຫີຜິງ ທີ່ໄດ້ດຳເນີນວຽກງານການອອກແບບໃຫ້ຍີ່ຫໍ້ເຄື່ອງນຸ່ງທີ່ມີຊື່ສຽງກ່າວວ່າ:“ເມື່ອສັງເກດຈາກປັດໄຈການອອກແບບແລ້ວເຫັນວ່າ, ຈະເພີ່ມປັດໄຈມູນເຊື້ອຂອງຈີນຕ່າງໆ ເຊັ່ນ: ກະດຸມແບບຈີນແລະ ຜ້າຄຸມແບບຈີນເປັນຕົ້ນ; ເມື່ອສັງເກດຈາກສະຕາຍແລ້ວເຫັນວ່າ, ສາມາດປະສົມກັບສະຕາຍຊຸດກີເຜົາຂອງຈີນ; ເມື່ອສັງເກດຈາກແຜ່ນແພແລ້ວເຫັນວ່າ, ຈະເພີ່ມການອອກແບບທີ່ມີສີສັນທັນສະໄໝເຂົ້າໃນການຖັກແສ່ວ ຕາມແຜ່ນແພ, ໃນທີ່ສຸດ, ຈະຜະລິດແບບມີສະຕາຍ ທັງພິຖີພິຖັນ ທັງສອດຄ່ອງກັບສາຍຕາຂອງຄົນຍຸກປັດຈຸບັນ.”
ຊຸດຈີນແບບໃໝ່” ບໍ່ເປັນພຽງເຄື່ອງນຸ່ງເທົ່ານັ້ນ
ຄຽງຄູ່ກັບ “ຊຸດຈີນແບບໃໝ່” ແລະ “ແຟຊັນຈີນ” ໄດ້ພັດທະນາຂຶ້ນມາ, ສີມືດັ່ງເດີມຫຼາຍຢ່າງໄດ້ຖືກນຳໃຊ້ເຂົ້າໃນການຜະລິດຫີບ ແລະ ເຄື່ອງເອ້ຕ່າງໆ, ເຄື່ອງຫັດຖະກຳຕ່າງໆ ໄດ້ປະກົດມີຊີວິດຊີວາໃໝ່ ພາຍໃຕ້ການປະສົມປະສານຂອງສີມືດັ່ງເດີມ ແລະ ສີມືຍຸກປັດຈຸບັນ.
ໃນຂະແໜງການແຜ່ນແພດັ່ງເດີມ, ເຄື່ອງນຸ່ງຈີນແບບໃໝ່ໄດ້ຊຸກຍູ້ການພັດທະນາທຸກຂັ້ນຕອນໃນການຜະລິດເສື້ອຜ້າອາພອນ, ເມືອງສາວ ແຂວງຊານຕຸ່ງ ແລະ ບ້ານສູຊຸນ ແຂວງເຈີ້ຈ່ຽງ ມີຊື່ສຽງນັບມື້ນັບໂດ່ງດັງຂຶ້ນ ຍ້ອນເລື່ອງນີ້; ໃນຂະແໜງການທ່ອງທ່ຽວວັດທະນະທຳ, ການທ່ອງທ່ຽວ “ຊຸດຈີນແບບໃໝ່” ກໍໄດ້ຊຸກຍູ້ໃຫ້ມີການທ່ອງທ່ຽວແບບໃໝ່ ເຊັ່ນ: ໄປທ່ຽວຊົມຖະໜົນເກົ່າໃນເມືອງເກົ່າ, ເຂົ້າພັກໃນໂຮງແຮມແບບບູຮານ, ໄປທ່ຽວຊົມດອກໄມ້ໃນລະດູບານໃໝ່ ແລະ ໄປກິນນ້ຳຊາ ຢູ່ຕາມພູປູກຕົ້ນຊາ ຊຶ່ງໄດ້ດຶງດູດນັກທ່ອງທ່ຽວຊາວໜຸ່ມເປັນຈຳນວນຫຼວງຫຼາຍ.
ບໍ່ພຽງແຕ່ເປັນເຄື່ອງນຸ່ງເທົ່ານັ້ນ, ໃນຊຸມປີຜ່ານມາ, ໃນການປະດັບເຮືອນ, ຮ້ານຊານົມ, ເຄື່ອງສຳອາງ, ເຄື່ອງແຟຊັນ ແລະ ຂົງເຂດອື່ນໆ, ກໍໄດ້ເພີ່ມສີສັນ “ຊຸດຈີນແບບໃໝ່” ເຂົ້າໄປເລື້ອຍໆ.
ເຈົ້າໜ້າທີ່ຂອງໂຮງງານຜະລິດເຄື່ອງເຟີນີເຈີແຫ່ງໜຶ່ງ ຂອງເມືອງສີຕຸ່ງ ແຂວງຈ່ຽງຊູກ່າວວ່າ: ແຕ່ກ່ອນ, ການຜະລິດເຄື່ອງເຟີນີເຈີຂອງຕົນ ສ່ວນຫຼາຍຈະເປັນເຄື່ອງເຟີນີເຈີແບບທັນສະໄໝ. ນັບແຕ່ປີກາຍເປັນຕົ້ນມາ, ການຈຳໜ່າຍເຄື່ອງເຟີນີເຈີ “ຊຸດຈີນແບບໃໝ່” ໄດ້ເພີ່ມຂຶ້ນຢ່າງຕໍ່ເນື່ອງ, ພວກເຂົາເຈົ້າກໍເລີ່ມເພີ່ມການຜະລິດຜະລິດຕະພັນ “ຊຸດຈີນແບບໃໝ່”.
ເປັນຫຍັງ “ຊຸດຈີນແບບໃໝ່” ຈຶ່ງໄດ້ຮັບຄວາມນິຍົມຊົມຊອບຈາກຄົນທັງຫຼາຍ?
“ຊຸດຈີນແບບໃໝ່” ໄດ້ຮັບຄວາມນິຍົມຊົມຊອບຈາກຄົນທັງຫຼາຍ ຍ້ອນວ່າໄດ້ສືບທອດວັດທະນະທຳຈີນ ທີ່ໄດ້ສະສົມມາເປັນເວລາພັນປີ, ໄດ້ສືບທອດສີມືດັ້ງເດີມຂອງຈີນ ແລະ ຊາວໜຸ່ມຍຸກປັດຈຸບັນມີຄວາມໝັ້ນໃຈຕົນເອງຫຼາຍກວ່າເກົ່າ.
ເຄື່ອງນຸ່ງຕ່າງໆ ທີ່ໄດ້ເພີ່ມປັດໄຈອໍາມະຕະຂອງຈີນຕ່າງໆເຊັ່ນ: ຮູບຖັກແສ່ວ, ກະດຸມແບບດັ່ງເດີມ ແລະ ຮູບແຕ້ມນ້ຳໝຶກເປັນຕົ້ນ, ເຄື່ອງຫັດຖະກຳທີ່ໄດ້ນຳໃຊ້ສີມືດັ່ງເດີມຕ່າງໆແລະ ເຄື່ອງປະດັບເຮືອນທີ່ “ເປັນແບບທຳມະຊາດ” ເຫຼົ່ານີ້ ໄດ້ສ່ອງແສງໃຫ້ເຫັນວ່າ, ຊາວຈີນຍຸກປັດຈຸບັນ ມີການຍອມຮັບ ແລະ ມີຄວາມຮູ້ສຶກພາກພູມໃຈຕໍ່ວັດທະນະທຳດັ່ງເດີມຂອງຈີນ.
ເມື່ອພວກເຮົາ ໄດ້ຊົມ ໄດ້ເຫັນ ຜະລິດຕະພັນປະດິດສ້າງໃໝ່ ດ້ານວັດທະນະທຳທີ່ມີຄວາມພິຖີພິຖັນ, ຊົມງານວັດທະນະທຳດັ່ງເດີມທີ່ມີສີສັນພິເສດຕ່າງໆ, “ຊຸດຈີນແບບໃໝ່” ໄດ້ເພີ່ມພະລັງຊີວິດໃໝ່ໃຫ້ແກ່ວັດທະນະທຳດັ້ງເດີມ, ຄົນທັງຫຼາຍຈະສາມາດສຳຜັດກັບປະຫວັດສາດ, ສຳຜັດກັບວັດທະນະທຳດັ່ງເດີມ ແລະ ສຳຜັດກັບແຟຊັນຈາກຜະລິດຕະພັນ ຫຼື ວັດທະນະທຳເຫຼົ່ານີ້.
ແຫຼ່ງຂ່າວ: ສໍານັກຂ່າວສານຈີນ, ໜັງສືພິມການຄ້າຈີນ
ຄໍາເຫັນ