ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2026 ແລະ ທິດທາງແຜນການເຄື່ອນໄຫວວຽກງານປະຈໍາປີ 2027 ຂອງສະພາແຫ່ງຊາດຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 12ຕຸລານີ້ ທີ່ສະພາແຫ່ງຊາດ ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ປະທານສະພາແຫ່ງຊາດ.
ທ່ານ ນາງ ສູນທອນ ໄຊຍະຈັກ ກ່າວວ່າ: ໃນໄລຍະ 1ປີ ຜ່ານມາ ສພຊໄດ້ຈັດຕັ້ງປະຕິບັດພາລະບົດບາດຕິດຕາມກວດກາຕາມລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ໄດ້ຮັບຜົນສໍາເລັດຫຼາຍດ້ານດັ່ງນີ້:ດໍາເນີນກອງປະຊຸມຮ່ວມລະຫວ່າງຄະນະປະຈຳສະພາແຫ່ງຊາດ ກັບລັດຖະບານ ເພື່ອປຶກສາຫາລື ແລະ ມີຄວາມເປັນເອກະພາບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໄລຍະ 6 ເດືອນຕົ້ນປີ ແລະ ແຜນຈຸດສຸມ 6 ເດືອນທ້າຍປີ; ວາລະແຫ່ງຊາດວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ; ມາດຕະການສົ່ງເສີມລົດໄຟຟ້າ ແລະ ພະລັງງານທົດແທນ,ທິດທາງການພັດທະນາແຮ່ທາດໃນໄລຍະໃໝ່,ຮ່ວມກັນກະກຽມເນື້ອໃນທີ່ຈະນໍາເຂົ້າພິຈາລະນາຢູ່ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດຊຸດທີ X. ນອກນັ້ນ, ສອງອົງການຍັງໄດ້ປັບປຸງຂໍ້ຕົກລົງຮ່ວມວ່າດ້ວຍການປະສານງານຊຶ່ງກັນ ແລະ ກັນ, ແຕ່ງຕັ້ງຜູ້ປະສານງານ ເພື່ອຍົກສູງປະສິດທິພາບໃນການເຄື່ອນໄຫວວຽກງານຂອງຕົນໃຫ້ນັບມື້ດີຂຶ້ນ,ໄດ້ຊີ້ນໍາການຕິດຕາມກວດກາ ຂອງຄະນະປະຈໍາສະພາແຫ່ງຊາດ ໄປຄຽງຄູ່ກັບການຕິດຕາມກວດກາ. ຜ່ານກອງປະຊຸມຄົບຄະນະຂອງບັນດາກຳມາທິການສະພາແຫ່ງຊາດປະຈຳປີ 2026 ເປັນຕົ້ນການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກຳໃຕ້ກົດໝາຍ,ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈຳປີ 2026,ບັນຫາແຮງງານ,ການປະຕິບັດຄ່າຊົດເຊີຍຜົນກະທົບຂອງໂຄງການພັດທະນາຕ່າງໆ,ການແກ້ໄຂບັນຫາຂອງປະຊາຊົນທີ່ສະເໜີຜ່ານສາຍດ່ວນກອງປະຊຸມສະພາແຫ່ງຊາດ ໂດຍມອບໝາຍໃຫ້ກະຊວງ, ອົງການກ່ຽວຂ້ອງແກ້ໄຂຕາມລະບຽບການ. ນອກນັ້ນ, ຄະນະປະຈຳສະພາແຫ່ງຊາດ ຍັງໄດ້ເຄື່ອນໄຫວຕິດຕາມ, ຊຸກຍູ້ ແລະ ຊ່ວຍເຫຼືອຢູ່ບັນດາແຂວງທີ່ໄດ້ຮັບຜົນກະທົບຈາກໄພທຳມະຊາດໃນກາງປີ 2026 ຈໍານວນ 10 ແຂວງຄື: ແຂວງຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ, ຫົວພັນ, ຊຽງຂວາງ, ບໍລິຄຳໄຊ, ຄໍາມ່ວນ,ສະຫວັນນະເຂດ ແລະ ແຂວງເຊກອງ ດ້ວຍການລະດົມເປັນທຶນຊ່ວຍເຫຼືອທັງໝົດ 1,150,000,000 ກີບ.
ພ້ອມນັ້ນ, ຄະນະປະຈຳສະພາແຫ່ງຊາດ ໄດ້ເອົາໃຈໃສ່ຊີ້ນໍາວຽກງານຮັບຕ້ອນ ແລະ ໃຫ້ຄໍາປຶກສາດ້ານກົດໝາຍຕໍ່ປະຊາຊົນ ໄປຄວບຄູ່ກັບການຄົ້ນຄວ້າພິຈາລະນາ ແລະ ແກ້ໄຂຄໍາສະເໜີ, ຄໍາຮ້ອງຂໍຄວາມເປັນທຳຂອງບຸກຄົນ, ນິຕິບຸກຄົນ ແລະ ການຈັດຕັ້ງຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການແກ້ໄຂຄໍາຮ້ອງທຸກ,ຄະນະປະຈຳສະພາແຫ່ງຊາດ ຊຸດທີ X ໄດ້ຮັບຄໍາຮ້ອງທີ່ສະສົມມາແຕ່ສະພາແຫ່ງຊາດ ຊຸດທີ IX ຈຳນວນ 673 ສະບັບ ແລະ ຮັບເຂົ້າໃໝ່ໃນສະພາແຫ່ງຊາດ ຊຸດທີ X ຈໍານວນ 213 ສະບັບ ລວມທັງໝົດຈໍານວນຄໍາຮ້ອງທີ່ກໍາລັງຄົ້ນຄວ້າໃນປັດຈຸບັນມີຈໍານວນ 886 ສະບັບ, ສາມາດແກ້ໄຂໄດ້ 44 ສະບັບ ເທົ່າກັບ 20,65% ຂອງຄໍາຮ້ອງທີ່ເຂົ້າມາໃນປີ 2026, ໄດ້ຮັບຕ້ອນ ແລະ ໃຫ້ຄໍາປຶກສາໃຫ້ປະຊາຊົນ 159 ຄັ້ງ,ເອົາໃຈໃສ່ປັບປຸງກົງຈັກການຈັດຕັ້ງ ແລະ ບຸກຄະລາກອນທີ່ຮັບຜິດຊອບວຽກງານຄົ້ນຄວ້າຄໍາຮ້ອງຂໍຄວາມເປັນທໍາ,ຄົ້ນຄວ້າສ້າງນິຕິກຳກ່ຽວກັບກົນໄກການຮັບ, ການພິຈາລະນາ ແລະ ແກ້ໄຂຄໍາສະເໜີ, ຄໍາຮ້ອງຂໍຄວາມເປັນທໍາ ເພື່ອເປັນບ່ອນອີງໃນການແກ້ໄຂຄໍາຮ້ອງທຸກຂອງສະພາແຫ່ງຊາດ ຊຸດທີ X.(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ