 |
ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ ປະທານຄະນະກຳມະ ການຈັດງານ ກ່າວວ່າ: ການຈັດງານໃນປີນີ້ເພື່ອສືບຕໍ່ອະນຸລັກ ແລະ ສົ່ງເສີມວັດທະນະທຳຮີດຄອງປະເພນີດ້ານອາຫານເອກະລັກຂອງລາວ ສ່ອງແສງໃຫ້ເຫັນວິຖີຊີວິດຂອງຄົນລາວທັງຊາດໃຫ້ຄົງຢູ່ຄູ່ກັບກັບສັງຄົມລາວມາຕະຫຼອດຈົນເຖິງທຸກວັນນີ້ 21 ປີພໍດີ. ພ້ອມນີ້, ກໍເພື່ອໂຄສະນາອາຫານລາວໃຫ້ເປັນທີ່ຮູ້ຈັກໃນລະ ດັບອາຊຽນ.
 |
ສໍາລັບກິດຈະກຳໃນງານປີນີ້, ຈັດໃຫ້ມີການຕົບແຕ່ງ “ເຮືອນຄົວລາວບູຮານ” ຕົບແຕ່ງ “ແຂວງແຫ່ງສະເໜ່” ແລະ ບ່ອນວາງສະແດງສະເພາະຂອງຜູ້ປະກອບການຍິງໜຸ່ມ ແລະ ຜະລິດຕະພັນທີ່ຜະລິດໄດ້ຫຼາຍກວ່າຄວາມຕ້ອງການຂອງແຕ່ລະແຂວງ ເພື່ອມາຈໍາໜ່າຍໃນງານແຫ່ງນີ້ເຊັ່ນ: ຜະລິດຕະພັນຈາກການລ້ຽງໝູ ເມືອງປາກຊັນ ແຂວງບໍລິຄໍາໄຊ ແລະ ແຂວງອື່ນໆ. ເທິງເວທີຈະມີການສາທິດ” ການຕໍາ ໝາກຫຸ່ງ”. ນອກນັ້ນ, ຈະໄດ້ເຫັນລູກ-ຫຼານຄົນຮຸ່ນໃໝ່ຈາກໂຮງຮຽນນາໆຊາດມາຮຽນຕຳໝາກຫຸ່ງ, ມີການສາທິດ" ການປຸງແຕ່ງໝໍ່າສະຫວັນນະເຂດ” ສະຫຼັບກັນໄປໃນແຕ່ລະວັນ. ນອກນັ້ນ, ຍັງມີສຳມະນາການໃຫ້ຄວາມຮູ້ໃນການເຂົ້າຫາແຫຼ່ງທຶນດອກເບັ້ຍຕໍ່າ ເພື່ອຊ່ວຍເຫຼືອທຸລະກິດຂະໜາດນ້ອຍ, ກາງ ແລະ ຈຸນລະວິຫາຫະກິດ. ຈະມີການໄລ້ສົດກ່ຽວກັບບັນຍາກາດຂອງງານທັງ 5 ວັນ. ປີນີ້, ຈໍານວນຮ້ານຂາຍມີ 180 ຮ້ານ. ໃນນັ້ນ, ມີຮ້ານອາຫານເອກະລັກຂອງແຕ່ລະທ້ອງຖິ່ນແບບລາວໆ, ອາຫານລາວປະຍຸກ, ຂອງ ຫວານ, ເຄື່ອງດື່ມລວມ 160 ຮ້ານ, ສິນຄ້າຫັດຖະກຳ 20 ຮ້ານ, ຄາດວ່າຈະມີເມັດເງິນໝູນວຽນໃນງານປະມານ 10 ຕື້ກີບ.
 |
ທ່ານ ນາງ ຈັນທະຈອນ ວົງໄຊ ກ່າວຕື່ມວ່າ: ໃນປີນີ້, ໄລຍະເປີດງານອາຫານລາວ ສທຍ ຍັງຈະໄດ້ຈັດກອງປະຊຸມເຄືອຂ່າຍຜູ້ປະກອບການແມ່ຍິງອາຊຽນ (AWEN) ໃນຖານະທີ່ລາວເຮົາເປັນປະທານອາເວັນ (ໃນປີ 2026-2027). ພິເສດໃນໄລຍະດຽວກັນ, ສທຍ ຍັງຈະຈັດກອງປະຊຸມ AWEN board meeting ຄັ້ງທໍາອິດ ທີ່ລາວເຮົາເປັນປະທານ AWEN ໃນລະຫວ່າງວັນທີ 27-29/1/2026 ເພື່ອໃຫ້ແຂກກອງປະຊຸມໄດ້ມາທ່ຽວງານຫຼັງເລີກປະຊຸມໄດ້ທຸກວັນ. ງານເທດສະການອາຫານລາວປີນີ້, ໄດ້ຮັບແຮງໃຈສະໜັບສະໜູນດ້ານງົບປະມານ, ວັດຖຸ, ປັດໃຈ ແລະ ສິ່ງອໍານວຍຄວາມສະດວກຕ່າງໆຈາກ 58 ພາກສ່ວນ. ງານເທດສະການອາຫານປີ 2026 ຈະໄດ້ດໍາເນີນໄປເປັນເວລາ 5 ວັນ ເລີ່ມແຕ່ວັນທີ 26-30/1/2026 ເລີ່ມແຕ່ເວລາ 9:00 ໂມງເຊົ້າຮອດ 22:00 ໂມງຂອງທຸກວັນ, ທຸກທ່ານສາມາດເຂົ້າໄປທ່ຽວຊິມ ແລະ ຈັບຈ່າຍຊື້ອາຫານລາວໄດ້. ໂອກາດນີ້, ນາງ ອາລີ ວົງໜໍ່ບຸນທຳ, ທ່ານ ນາງ ຈັນທະຈອນ ວົງໄຊ ໄດ້ມອບໃບກຽດຕິຄຸນໃຫ້ພາກສ່ວນຕ່າງໆທີ່ໃຫ້ການສະໜັບສະໜູນໃນງານຄັ້ງນີ້ຈໍານວນ 58 ພາກສ່ວນ.
 |
ຂ່າວ-ພາບ: ວັນເພັງ
ຄໍາເຫັນ