 |
ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ລາຍງານການຈັດຕັ້ງປະຕິບັດປີທ່ອງທ່ຽວລາວ 2024 ແລະ ທິດທາງແຜນການໃນຕໍ່ໜ້າໃຫ້ຮູ້ວ່າ: ການຈັດຕັ້ງປະຕິບັດປີທ່ອງທ່ຽວລາວ 2024 ທີ່ໄດ້ຈັດຕັ້ງປະຕິບັດສໍາເລັດແລ້ວ ມີນັກທ່ອງທ່ຽວທັງພາຍໃນ ແລະ ຕ່າງປະເທດທີ່ເຂົ້າມາທ່ຽວສປປ ລາວ ໄດ້ລື່ນຄາດໝາຍຖ້າທຽບໃສ່ປີ 2023, ນັກທ່ອງທ່ຽວພາຍໃນມີ 3,904,483 ເທື່ອຄົນ ເພີ່ມຂຶ້ນ 102% ສາມາດກະຈາຍລາຍຮັບຈາກການທ່ອງທ່ຽວໄດ້ເຖິງ 632,526,246 ໂດລາ, ນັກທ່ອງທ່ຽວສາກົນມີ 4,120,832 ເທື່ອຄົນ ເພີ່ມຂຶ້ນ 21%, ສາມາດກະຈາຍລາຍຮັບໄດ້ເຖິງ 1,138,003,848 ໂດລາ (ລາຍຮັບດັ່ງກ່າວແມ່ນລາຍຮັບທີ່ກະຈາຍໄປຍັງພາກລັດ ແລະ ຜູ້ປະກອບການທຸກຂະແໜງທີ່ຕິດພັນກັບການທ່ອງທ່ຽວ).
 |
ສໍາລັບ 3 ເດືອນຕົ້ນປີ (ມັງກອນຫາເດືອນມີນາ2025) ມີນັກທ່ອງທ່ຽວຕ່າງປະເທດ 1,262,035 ເທື່ອຄົນ ເພີ່ມຂຶ້ນ 11%, ທຽບໃສ່ໄລຍະດຽວກັນຂອງປີ 2024 ຄາດຄະເນລາຍຮັບທີ່ກະຈາຍໃນສັງຄົມໄດ້ 426,975,454 ໂດລາ, ສໍາລັບນັກທ່ອງທ່ຽວພາຍໃນມີ 1,467,886 ເທື່ອຄົນເພີ່ມຂຶ້ນ 98,6%, ທຽບໃສ່ໄລຍະດຽວກັນຂອງປີ 2024 ລາຍຮັບທີ່ກະຈາຍໃນສັງຄົມ 237,797,532 ເທື່ອຄົນ. ໃນນີ້, ມີນັກທ່ອງທ່ຽວທີ່ມາຈາກ ໄທ, ຈີນ, ຫວຽດນາມ, ເກົາຫຼີ, ອາເມຣິກາ, ຝຣັ່ງ, ຣັດເຊຍ, ອັງກິດ, ເຢຍລະມັນ, ຍີ່ປຸ່ນ, ການອອກນະໂຍບາຍຍົກເວັ້ນວີຊາໃຫ້ບາງປະເທດກຸ່ມເປົ້າໝາຍໄລຍະປີທ່ອງທ່ຽວລາວ 2024 (ເລີ່ມແຕ່ວັນທີ 1 ກໍລະກົດ ຫາ ວັນທີ 31 ທັນວາ 2024 ລວມ 6 ເດືອນ) ເຫັນວ່ານັກທ່ອງທ່ຽວຈີນແມ່ນໄດ້ຮັບຜົນເກີນຄາດໝາຍທີ່ວາງໄວ້ມີນັກທ່ອງທ່ຽວ 1,048,034 ເທື່ອຄົນ ເພີ່ມຂຶ້ນ 63%, ການເປີດປີທ່ອງທ່ຽວລາວ 2024 ເປັນໂອກາດທີ່ດີໃນການປັບປຸງຄຸນນະພາບການບໍລິການຂອງທຸລະກິດການທ່ອງທ່ຽວ ແລະ ຂະແໜງການບໍລິການທີ່ປິ່ນອ້ອມຫຼາຍຫົວໜ່ວຍທຸລະກິດໄດ້ຮັບການປະເມີນ ແລະ ຢັ້ງຢືນມາດຕະຖານການທ່ອງທ່ຽວອາຊຽນ ການທ່ອງທ່ຽວປະກອບສ່ວນສໍາຄັນໃຫ້ແກ່ການສ້າງວຽກເຮັດງານທໍາໃຫ້ສັງຄົມ, ສ້າງລາຍຮັບຊຸກຍູ້ໃຫ້ບັນດາຜູ້ປະກອບການທຸລະກິດທ່ອງທ່ຽວ, ທຸລະກິດປິ່ນອ້ອມ ແລະ ການຜະລິດກະສິກຳ, ຫັດຖະກຳໃຫ້ກາຍເປັນສິນຄ້າສະໜອງໃຫ້ແກ່ນັກທ່ອງທ່ຽວເພີ່ມທະວີການຮ່ວມມື ແລະ ການມີສ່ວນຮ່ວມຂອງປະຊາຊົນລາວບັນດາເຜົ່າໃນການປົກປັກຮັກສາຊັບພະຍາກອນທ່ອງທ່ຽວໃຫ້ມີຄວາມຍືນຍົງໂດຍສະເພາະການສົ່ງເສີມການທ່ອງທ່ຽວທາງດ້ານວັດທະນະທຳ, ທຳມະຊາດ, ປະຫວັດສາດ ແລະ ກະສິກຳເຮັດໃຫ້ວຽກງານທ່ອງທ່ຽວໄດ້ກາຍເປັນວຽກງານລວມຂອງທຸກຂະແໜງການຢູ່ສູນກາງ ແລະ ທ້ອງຖິ່ນໃນທົ່ວປະເທດຢ່າງແທ້ຈິງ.
 |
ຄຽງຄູ່ກັນນັ້ນ, ບັນດາວາລະສານ ແລະ ສື່ຕ່າງໆທັງພາຍໃນ ແລະ ຕ່າງປະເທດຈາກຫຼາຍພາກສ່ວນກໍໄດ້ຈັດລະດັບການທ່ອງທ່ຽວທີ່ສປປ ລາວ ເປັນລະດັບຕົ້ນໆຕະຫຼອດໄລຍະປີທ່ອງທ່ຽວລາວ 2024 ຜ່ານມາເຮັດໃຫ້ຊາວໂລກໄດ້ຮັບຮູ້ຫຼາຍຂຶ້ນໂດຍຜ່ານການໂຄສະນາສະຖານທີ່ທ່ອງທ່ຽວອັນງົດງາມຂອງລາວ, ການບໍລິການເຂົ້າ-ອອກຢູ່ດ່ານສາກົນມີຄວາມສະດວກຫຼາຍຂຶ້ນ, ພື້ນຖານໂຄງລ່າງເສັ້ນທາງເຂົ້າເຖິງສະຖານທີ່ທ່ອງທ່ຽວ ແລະ ສິ່ງອໍານວຍຄວາມສະດວກໄດ້ຮັບການປັບປຸງຈໍານວນໜຶ່ງ ຂະແໜງການພາກລັດ ແລະ ພາກທຸລະກິດໄດ້ຫັນເຂົ້າສູ່ລະບົບເທື່ອລະກ້າວ.ຂ່າວ: ວັນເພັງ, ພາບ: ເກດສະໜາ
ຄໍາເຫັນ