4 ບ້ານ ເມືອງສາລະວັນ ປະກາດເປັນບ້ານວັດທະນະທຳໃໝ່

ເມືອງສາລະວັນ ແຂວງສາລະວັນ ໄດ້ຈັດພິທີປະກາດບ້ານວັດທະນະທຳໃໝ່ຊຶ່ງມີ 4 ບ້ານຄື: ບ້ານນາທ່ອນ, ຄັນໝາກໂຍດ, ຕົ້ງສີວິໄລ ແລະ ບ້ານໝາກນາວນ້ອຍຂຶ້ນໃນວັນທີ 27 ທັນວາຜ່ານມາ ທີ່ຫ້ອງການບ້ານນາທ່ອນໂດຍການເປັນປະທານຂອງທ່ານ ໜູຄຳ ສີສະຫັວດ ຮອງເຈົ້າເມືອງສາລະວັນ ຜູ້ຊີ້ນຳຂົງເຂດວັດທະນະທຳ-ສັງຄົມ, ມີທ່ານ ຄຳໄພ ໄຊຍະເດດ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ສາຍທິດ ເພຍໄຊຍະລາດ ນາຍບ້ານໆຕົ້ງສີວິໄລ ກ່າວວ່າ: ບ້ານນາທ່ອນປະກອບມີ 209 ຫຼັງຄາເຮືອນ, 284 ຄອບຄົວ, ມີພົນລະເມືອງ 1.066 ຄົນຍິງ 647 ຄົນກວມ 86,61% ຂອງຄອບຄົວທັງໝົດພາຍໃນບ້ານ, ບ້ານປະຕິບັດໄດ້ຄົບ 4 ມາດຖານ 26 ຕົວຊີ້ວັດຂອງການສ້າງບ້ານວັດທະນະທໍາ ຊຶ່ງປະຕິບັດໄດ້ 92% ສາມາດຮັບຮອງເປັນບ້ານວັດທະນະທຳໄດ້, ປະຊາຊົນມີມູນເຊື້ອດຸໝັ່ນຂະຫຍັນພຽນໃນການອອກແຮງງານທຳມາຫາກິນລ້ຽງຊີບ, ມີນໍ້າໃຈຮັກຊາດ, ມີຄວາມສາມັກຄີພາຍໃນໜັກແໜ້ນ, ມີຄວາມເອື້ອຍເຟື້ອເຜື່ອແຜ່ຮັກແພງຊ່ວຍເຫຼືອຊຶ່ງກັນ ແລະກັນຕະຫຼອດມາ. ປະຊາຊົນສ່ວນໃຫຍ່ຢຶດຖືອາຊີບເຮັດນາເປັນຕົ້ນຕໍ, ຖືການປູກຝັງ-ລ້ຽງສັດເປັນອາຊີບສຳຮອງ, ພາຍໃນບ້ານມີເນື້ອທີ່ທັງໝົດ 818 ເຮັກຕາ.
    ໃນພິທີໄດ້ມອບໃບຢັ້ງຢືນບ້ານວັດທະນະທໍາໃໝ່ໃຫ້ແກ່ 4 ບ້ານ ເປັນກຽດມອບໂດຍທ່ານ ໜູຄຳ ສີສະຫັວດ ຈາກນັ້ນ, ຄະນະປະທານໄດ້ໃຫ້ກຽດເປີດປ້າຍ, ລັ່ນຄ້ອງ 9 ບາດເພື່ອປະກາດ 4 ບ້ານເປັນບ້ານວັດທະນະທໍາໃໝ່.
ຂ່າວ-ພາບ: ລັດຕະນາ ແສງສຸວັນ