 |
ແຂວງຜົ້ງສາລີໄດ້ຮັບການສະຖາປະນາຂຶ້ນຢ່າງເປັນທາງການໃນວັນທີ 1 ກັນຍາ 1955. ຕະຫຼອດໄລຍະເວລາຫຼາຍທົດສະວັດຜ່ານມາ, ອົງຄະນະພັກ ແລະ ອຳນາດການປົກຄອງແຂວງ ໄດ້ສືບຕໍ່ຍຶດໝັ້ນແນວທາງຂອງພັກ, ນຳພາປະຊາຊົນບັນດາເຜົ່າພາຍໃນແຂວງໃຫ້ພ້ອມໃຈກັນຜ່ານຜ່າຄວາມຫຍຸ້ງຍາກ, ນຳເອົາມະຕິ ແລະ ແຜນນະໂຍບາຍຕ່າງໆ ມາຈັດຕັ້ງປະຕິບັດໃຫ້ປະກົດເປັນຜົນງານຕົວຈິງ. ໄລຍະ 40 ປີ (1986-2026) ຖືເປັນໄລຍະແຫ່ງການຫັນປ່ຽນອັນສຳຄັນ ທີ່ໄດ້ວາງຮາກຖານໃຫ້ແຂວງມີການພັດທະນາທີ່ຊັດເຈນ ແລະ ສາມາດຍຶດໝັ້ນການເຕີບໂຕຢ່າງຕໍ່ເນື່ອງ.
 |
ຕະຫຼອດ 40 ປີແຫ່ງການປ່ຽນແປງໃໝ່, ເສດຖະກິດຂອງແຂວງຜົ້ງສາລີໄດ້ຮັບການຂະຫຍາຍຕົວຢ່າງຕໍ່ເນື່ອງ. ອັດຕາການເຕີບໂຕສະເລ່ຍບັນລຸ 6.51% ຕໍ່ປີໃນໄລຍະ 1997-2006, ເພີ່ມຂຶ້ນເປັນ 7.58% ຕໍ່ປີໃນໄລຍະ 2007-2016 ແລະ ໃນໄລຍະການຈັດຕັ້ງແຜນພັດທະນາຄັ້ງທີ IX (2021-2025) ບັນລຸ 5.94% ຕໍ່ປີ. ຕົວເລກດັ່ງກ່າວສະທ້ອນໃຫ້ເຫັນວ່າ ແຂວງຍັງສາມາດຮັກສາທິດທາງການເຕີບໂຕທາງເສດຖະກິດໄດ້ເຖິງແມ່ນວ່າຈະປະສົບກັບສະພາບທ້າທາຍຫຼາຍປະການ.
ໃນໄລຍະ 2017-2026 ມູນຄ່າ GDP ຂອງແຂວງບັນລຸ 33,406 ຕື້ກີບ, ຂະນະທີ່ GDP ຕໍ່ຫົວຄົນບັນລຸ 33.45 ລ້ານກີບ ຫຼືປະມານ 1,530 ໂດລາ, ເພີ່ມຂຶ້ນກວ່າ 10 ເທົ່າ ທຽບໃສ່ໄລຍະຕົ້ນຂອງການປ່ຽນ ແປງໃໝ່. ສ່ວນການລົງທຶນຈາກລັດໄດ້ຂະຫຍາຍຕົວຈາກ 4.36 ຕື້ກີບໃນໄລຍະ 1987-1996 ມາເປັນ 918.45 ຕື້ກີບ ໃນໄລຍະ 2017-2024 ຫຼືເພີ່ມຂຶ້ນຫຼາຍກວ່າ 210 ເທົ່າ. ນີ້ແມ່ນພື້ນຖານສຳຄັນທີ່ໄດ້ຊ່ວຍສ້າງກຳລັງຂັບເຄື່ອນໃຫ້ການພັດທະນາໃນດ້ານອື່ນໆ.
ດ້ານກະສິກຳຍັງຄົງເປັນຂະແໜງການຫຼັກທີ່ຮອງຮັບເສດຖະກິດຂອງແຂວງ. ຕະຫຼອດໄລຍະຜ່ານມາ, ຜົນຜະລິດເຂົ້າໄດ້ເພີ່ມຂຶ້ນຈາກ 11,320 ໂຕນໃນປີ 1986 ຄາດວ່າຈະບັນລຸ 1,072,484 ໂຕນໃນປີ 2026 ຫຼືເພີ່ມຂຶ້ນຫຼາຍກວ່າ 94 ເທົ່າ. ພ້ອມກັນນັ້ນ, ການຜະລິດກະສິກຳໄດ້ມີການຫັນປ່ຽນຈາກຮູບແບບການຜະລິດເພື່ອລ້ຽງຊີບໄປສູ່ການຜະລິດເປັນສິນຄ້າຫຼາຍຂຶ້ນ, ຈາກພືດຫຼັກພຽງ 2 ຊະນິດ ຂະຫຍາຍມາເປັນ 8 ຊະນິດ ພືດຕົ້ນຕໍເຊັ່ນ: ຊາ, ຢາງພາລາ, ໝາກແໜ່ງ, ກາເຟ, ອ້ອຍ, ສາລີ, ໝາກກ້ວຍ ພ້ອມທັງການລ້ຽງສັດ ແລະ ການປະມົງ. ສຳລັບຂະແໜງຊົນລະປະທານ ໄດ້ຮັບການພັດທະນາເຖິງ 3,412 ແຫ່ງ, ຊຶ່ງເປັນປັດໄຈສຳຄັນສຳລັບການຮັບປະກັນການຜະລິດ. ຂະນະດຽວກັນ, ແຂວງຍັງສາມາດຮັກສາອັດຕາປົກຫຸ້ມປ່າໄມ້ໄວ້ໃນລະດັບ 65% ຂອງເນື້ອທີ່ທົ່ວແຂວງ, ອັນເປັນການສະແດງໃຫ້ເຫັນເຖິງຄວາມພະຍາຍາມໃນການພັດທະນາຄວບຄູ່ກັບການອະນຸລັກຊັບພະຍາກອນທຳມະຊາດ.
 |
ໃນດ້ານການຄ້າ, ຈຳນວນຕະຫຼາດໄດ້ຂະຫຍາຍຈາກ 1 ແຫ່ງມາເປັນ 52 ແຫ່ງ, ຂະນະທີ່ຫົວໜ່ວຍທຸ ລະກິດຂາຍຍ່ອຍໄດ້ເພີ່ມຈາກ 91 ຫົວໜ່ວຍມາເປັນຫຼາຍກວ່າ 3,000 ຫົວໜ່ວຍ. ມູນຄ່າການສົ່ງອອກຈາກພຽງ 0.01 ຕື້ກີບໃນປີ 1986 ໄດ້ຂະຫຍາຍເປັນ 6.043 ຕື້ກີບໃນໄລຍະ 2017-2024. ພ້ອມນີ້, ໂຄງການໜຶ່ງເມືອງໜຶ່ງຜະລິດຕະພັນ (ODOP) ໄດ້ບັນລຸ 31 ລາຍການ, ສະແດງໃຫ້ເຫັນເຖິງການນຳໃຊ້ທ່າແຮງທ້ອງຖິ່ນເພື່ອສ້າງມູນຄ່າເພີ່ມທາງເສດຖະກິດ. ດ້ານຄົມມະນາຄົມ-ຂົນສົ່ງ ແມ່ນໜຶ່ງໃນຂົງເຂດທີ່ມີການປ່ຽນແປງຢ່າງຊັດເຈນ ຈຳນວນບ້ານທີ່ມີເສັ້ນທາງລົດເຂົ້າເຖິງໄດ້ເພີ່ມຈາກ 152 ບ້ານມາເປັນ 503 ບ້ານ ຫຼືກວມເອົາ 100% ຂອງບ້ານທົ່ວແຂວງໃນປີ 2025. ຜົນສຳເລັດນີ້, ມີຄວາມໝາຍສຳຄັນຫຼາຍ ເພາະການເຂົ້າເຖິງເຄືອຂ່າຍຄົມມະນາຄົມເປັນເງື່ອນໄຂພື້ນຖານສຳລັບການຄ້າ, ການບໍລິການ, ການສຶກສາ ແລະ ສາທາລະນະສຸກ.
ດ້ານພະລັງງານໄຟຟ້າ, ຈຳນວນບ້ານທີ່ໄດ້ຊົມໃຊ້ໄຟຟ້າຈາກ 284 ບ້ານ ຫຼື 55.04% ໄດ້ຂະຫຍາຍມາເປັນ 454 ບ້ານ ຫຼື 90.26% ໃນປີ 2026. ສ່ວນດ້ານໂທລະຄົມມະນາຄົມ ກໍໄດ້ຮັບການຍົກລະດັບໄປຕາມລຳ ດັບ, ໂດຍສັນຍານ 2G ກວມເອົາ 482 ບ້ານ ແລະ 3G/4G/5G ກວມ 314 ບ້ານ. ນີ້ເປັນພື້ນຖານສຳຄັນສຳລັບການກ້າວເຂົ້າສູ່ຍຸກການບໍລິການດີຈິຕອນ ແລະ ການບໍລິຫານສະໄໝໃໝ່.
ໃນດ້ານການສຶກສາ, ໂຮງຮຽນຊັ້ນປະຖົມໄດ້ຂະຫຍາຍຈາກ 349 ແຫ່ງໃນປີ 1986 ມາເປັນ 652 ແຫ່ງໃນປັດຈຸບັນ. ການຂະຫຍາຍຕົວດັ່ງກ່າວ ສະທ້ອນໃຫ້ເຫັນເຖິງຄວາມເອົາໃຈໃສ່ຂອງພັກ ແລະ ລັດໃນການສ້າງໂອກາດການຮຽນຮູ້ໃຫ້ເດັກນ້ອຍ ແລະ ເຍົາວະຊົນໃນທົ່ວແຂວງ. ດ້ານສາທາລະນະສຸກ ກໍໄດ້ຮັບການພັດທະນາຢ່າງຕັ້ງໜ້າ. ແຂວງມີສະຖານບໍລິການສາທາລະນະສຸກ 60 ແຫ່ງ, ສາມາດໃຫ້ການບໍລິການໄດ້ຫຼາຍກວ່າ 80% ຂອງບ້ານ. ການເຂົ້າເຖິງນ້ຳລິນສະອາດໄດ້ຂະຫຍາຍໄປຮອດ 436 ບ້ານ ເພີ່ມຂຶ້ນ 418 ບ້ານ ທຽບໃສ່ປີ 1986. ຮ້ານຂາຍຢາຖືກກົດໝາຍຈາກທີ່ບໍ່ມີເລີຍໄດ້ເພີ່ມຂຶ້ນເປັນ 54 ຮ້ານ. ໂດຍລວມແລ້ວ, ໝາກຜົນໃນຂົງ ເຂດວັດທະນະທຳ-ສັງຄົມ ໄດ້ມີສ່ວນສຳຄັນໃນການຍົກສູງຄຸນນະພາບຊີວິດຂອງປະຊາຊົນ. ຄຽງຄູ່ກັບການພັດທະນາດ້ານເສດຖະກິດ-ສັງຄົມ, ແຂວງຜົ້ງສາລີ ຍັງສາມາດຮັກສາໄວ້ຊຶ່ງສະຖຽນລະພາບທາງການເມືອງ, ຄວາມສະຫງົບ ຮຽບຮ້ອຍທາງສັງຄົມ ແລະ ຄວາມສາມັກຄີປອງດອງຂອງປະຊາຊົນບັນດາເຜົ່າຢ່າງໝັ້ນຄົງ. ຖັນແຖວພະນັກງານ ແລະ ສະມາຊິກພັກ ໄດ້ຮັບການກໍ່ສ້າງ ແລະ ບຳລຸງໃຫ້ມີຄວາມເຂັ້ມແຂງຂຶ້ນເປັນລຳດັບ. ພ້ອມນັ້ນ, ການພົວພັນຮ່ວມມືກັບບັນດາແຂວງໃກ້ຄຽງຂອງປະເທດເພື່ອນມິດ ໂດຍສະເພາະ ສປຈີນ ແລະ ສສ ຫວຽດນາມ ໄດ້ຮັບການຂະຫຍາຍຕົວ ແລະ ເສີມສ້າງໃຫ້ກວ້າງຂວາງ ແລະ ແໜ້ນແຟ້ນຍິ່ງຂຶ້ນ ອັນເປັນພື້ນ ຖານສຳຄັນສຳລັບການເຊື່ອມໂຍງດ້ານການຄ້າ, ການລົງທຶນ ແລະ ການພັດທະນາໃນອະນາຄົດ. ດ້ານວຽກງານແກ້ໄຂຄວາມທຸກຍາກ: ໜຶ່ງໃນວຽກງານຍຸດທະສາດສຳຄັນ ເນື່ອງຈາກແຂວງຜົ້ງສາລີເປັນແຂວງພູດອຍ ມີພື້ນທີ່ກວ່າ 99% ເປັນພູສູງ, ການຕັ້ງຖິ່ນຖານຂອງປະຊາຊົນມີລັກສະນະກະແຈກກະຈາຍ ແລະ ຢູ່ຫ່າງໄກສອກຫຼີກ ຈຶ່ງເຮັດໃຫ້ວຽກງານແກ້ໄຂຄວາມທຸກຍາກ ເປັນວຽກງານທີ່ມີຄວາມທ້າທາຍສູງ. ເຖິງຢ່າງໃດກໍຕາມ, ພັກ ແລະ ອຳນາດການປົກຄອງແຂວງ ໄດ້ຖືເອົາວຽກງານນີ້ ເປັນພາລະກິດສຳຄັນອັນເປັນຍຸດທະສາດ ແລະ ໄດ້ສຸມໃສ່ຈັດຕັ້ງປະຕິບັດຢ່າງຕໍ່ເນື່ອງ.
ຕາມການປະເມີນຂໍ້ມູນປັດຈຸບັນ, ອັດຕາຄວາມທຸກຍາກຂອງແຂວງຍັງຄົງຢູ່ໃນລະດັບສູງ, ໂດຍບ້ານທຸກຍາກກວມ 70%, ຄອບຄົວທຸກຍາກ 25.8% ແລະ ປະຊາກອນທຸກຍາກ 24.8%. ຕົວເລກນີ້ຊີ້ໃຫ້ເຫັນວ່າ ແຂວງຈະບັນລຸໝາກຜົນຫຼາຍດ້ານ, ແຕ່ວຽກງານຫຼຸດຜ່ອນຄວາມທຸກຍາກ ຍັງຄົງເປັນວາລະສຳຄັນທີ່ຈະຕ້ອງສືບຕໍ່ແກ້ໄຂ. ໃນໄລຍະ 2020-2024, ພາຍໃຕ້ການສະໜັບສະໜູນຂອງລັດຖະບານສປປລາວ ແລະ ທະນາຄານໂລກ, ໂຄງການກອງທຶນຫຼຸດຜ່ອນຄວາມທຸກຍາກໄດ້ນຳໄປຈັດຕັ້ງຢູ່ 4 ເມືອງ ກວມ 160 ບ້ານ, 11,473 ຄອບຄົວ ແລະ 62,523 ຄົນ. ຜົນສຳເລັດທີ່ພົ້ນເດັ່ນຄືຈຳນວນບ້ານທຸກຍາກໄດ້ຫຼຸດລົງຈາກ 132 ບ້ານມາເປັນ 116 ບ້ານ, ຫຼຸດລົງ 16 ບ້ານ; ຄອບຄົວທຸກຍາກຫຼຸດຈາກ 8,684 ຄອບຄົວ ຍັງເຫຼືອ 7,062 ຄອບຄົວ, ຫຼຸດ 1,622 ຄອບຄົວ ແລະ ພົນລະເມືອງທຸກຍາກຫຼຸດຈາກ 49,468 ຄົນ ຍັງເຫຼືອ 41,478 ຄົນ, ຫຼຸດ 7,990 ຄົນ. ຜົນງານດັ່ງກ່າວເປັນເຄື່ອງຢືນຢັນເຖິງຄວາມພະຍາຍາມ ແລະ ທິດທາງທີ່ຖືກຕ້ອງໃນການແກ້ໄຂບັນຫາຄວາມ ທຸກຍາກຂອງແຂວງ.
ຄໍາເຫັນ