ທ່ານ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ໄດ້ລາຍງານການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຢາເສບຕິດ ໃນໄລຍະ 5 ປີ (2021-2025) ແລະ ທິດທາງຕໍ່ໜ້າ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ໃນວັນທີ 12 ພະຈິກນີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາຊາດ.
ທ່ານ ພົນເອກ ວິໄລ ຫຼ້າຄໍາຟອງ ກ່າວວ່າ: ໃນໄລຍະ 5 ປີ ຜ່ານມາ ລັດຖະບານ ໄດ້ຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງປະຕິບັດຮອບດ້ານໃນວຽກງານແກ້ໄຂບັນຫາຢາເສບຕິດ ໂດຍສະເພາະດ້ານການສະກັດກັ້ນ ແລະ ຕ້ານຢາເສບຕິດໄດ້ຊີ້ນໍາການຈັດຕັ້ງປະຕິບັດຮອບດ້ານ ໃນວຽກງານແກ້ໄຂບັນຫາຢາເສບຕິດ ຊຶ່ງເຫັນວ່າມີຜົນສໍາເລັດເປັນຢ່າງດີສະແດງໃຫ້ເຫັນຕົວເລກຄະດີທີ່ໄດ້ແກ້ໄຂແຕ່ເດືອນ 7 ປີ 2021 ຫາ ເດືອນ 10 ປີ 2025 ໃນທົ່ວປະເທດສາມາດມ້າງຄະດີໄດ້ 21,003 ເລື່ອງ, ຈັບຜູ້ຖືກຫາ 31,289 ຄົນ, ຍິງ 3,254 ຄົນ, ຕ່າງປະເທດ 938 ຄົນ, ຍິງ 85 ຄົນ, ຍຶດເຮໂຣອິນ ໄດ້ 1,852 ກິໂລກຼາມ (ກລ), ຢາບ້າ 69,261 ກລ, ຢາຝິ່ນ 574 ກລ,ຢາໄອສ໌ 17,386 ກລ, ຄັນຊາ 27,626 ກລ, ເຄຕາມິນ 7,972 ກລ, ໂຄເຄນ 4 ກລ, ຢາອີ 16,519 ເມັດ ກັບ 92 ກລ, ແປ້ງຝຸ່ນປະສົມຢາເສບຕິດ 103,348 ກລ, ຄາເຟອິນ 168 ກຼາມ, ນໍ້າຢາສານເຄມີ 10 ກລ, 101 ຖັງ ກັບ 905 ຕຸກ, ນໍ້າກົດ 9,400 ລິດ, ພາຫະນະລົດໃຫຍ່649 ຄັນ, ລົດຈັກ 3,377 ຄັນ, ເຮືອ 5 ລໍາ.
ດ້ານການສໍາຫຼວດພືດທີ່ມີສານເສບຕິດ ແລະ ໂຄງການພັດທະນາທາງເລືອກທົດແທນການປູກພືດທີ່ມີສານເສບຕິດໄດ້ລົງສໍາຫຼວດເນື້ອທີ່ລັກລອບປູກຝິ່ນ ໃນປີ 2021-2025 ຢູ່ 9 ແຂວງພາກເໜືອ; ກວດພົບເນື້ອທີ່ລັກລອບປູກຝິ່ນ 5,656 ເຮັກຕາ, ທໍາລາຍໄດ້ 2,029 ເຮັກຕາ; ໄດ້ອອກໃບຢັ້ງຢືນຮັບຮອງບໍລິສັດເຂົ້າຮ່ວມໂຄງການປູກພືດທົດແທນການປູກຝິ່ນຢູ່ 7 ແຂວງ ມີທັງໝົດ 59 ບໍລິສັດ.ບໍລິສັດເຫຼົ່ານັ້ນໄດ້ສຸມໃສ່ຊຸກຍູ້-ສົ່ງເສີມດ້ານສີມືແຮງງານ ແລະ ຈັດສັນອາຊີບໃຫ້ປະຊາຊົນໄດ້ 39 ເມືອງ, 1,448 ບ້ານ, ປະຊາຊົນ ໄດ້ຮັບຜົນປະໂຫຍດຫຼາຍກວ່າ 58,673 ຄອບຄົວໄດ້ສົ່ງອອກກາເຟ ຂອງໂຄງການປູກພືດທົດແທນການປູກຝິ່ນ (LAOZ49) ແຂວງຫົວພັນ ປີ 2021-2025 ໃຫ້ແກ່ບໍລິສັດມາລອງໂກ ປະເທດຝຣັ່ງ ຈໍານວນ 269,520 ໂຕນ, ມູນຄ່າ 1,378,298 ໂດລາ ແລະ ໄດ້ຂາຍຢູ່ພາຍໃນປະເທດ ຈໍານວນ 53 ໂຕນ, ມູນຄ່າ 2,042,614,034 ກີບ.ນອກນັ້ນ, ໂຄງການຍັງໄດ້ມອບງົວແມ່ພັນໃຫ້ປະຊາຊົນລ້ຽງໃນ 19 ບ້ານ, 4 ເມືອງຈໍານວນ 100 ໂຕ. ປັດຈຸບັນມີງົວທັງໝົດ 354 ໂຕ, ໃນ 19 ບ້ານ, ປະຊາຊົນໄດ້ຮັບຜົນປະໂຫຍດ 193 ຄອບຄົວ, ມູນຄ່າ 255,640,000 ກີບ. ພ້ອມນັ້ນ, ໄດ້ຂະຫຍາຍໂຄງການປູກພືດທົດແທນການປູກຝິ່ນ ທີ່ໄດ້ຮັບການຊ່ວຍເຫຼືອຈາກອົງການ ສປຊ ເພື່ອຄວບຄຸມຢາເສບຕິດ ໄປແຂວງຜົ້ງສາລີ, ມີ 1 ເມືອງ, 6 ບ້ານ, 188 ຄອບຄົວ ໄດ້ຮັບຜົນປະໂຫຍດ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ