6 ເດືອນ ຕົ້ນປີ ອັດຕະປື ສົ່ງເສີມວຽກອຸດສະຫະກໍາ-ການຄ້າໄດ້ດີຂື້ນ

ໂດຍ: ຕະວິນຍານ
ເຖິງວ່າສະພາບເສດຖະກິດຈະມີຄວາມຫຍຸ້ງຍາກປານໃດກໍຕາມ ໃນໄລຍະ 6 ເດືອນ ຕົ້ນປີ 2023 ນີ້ ແຂວງອັດຕະປືຍັງໄດ້ເອົາໃຈໃສ່ສົ່ງເສີມວຽກງານອຸດສາຫະກໍາ-ການຄ້າໄດ້ດີຂຶ້ນພໍສົມຄວນ ສະແດງອອກໃນການສົ່ງອອກສິນຄ້າກະສິກໍາ ໄປຕ່າງແຂວງ ແລະ ຕ່າງປະເທດ ໃນໄລຍະ 6 ເດືອນ ແຂວງສາມາດສົ່ງສິນຄ້າອອກມີມູນຄ່າທັງໝົດ 37,73 ລ້ານໂດລາ ເທົ່າກັບ 51% ຂອງແຜນການ (ແຜນການ 36,42 ລ້ານໂດລາ),ໃນນັ້ນ: ສົ່ງໝາກກ້ວຍໄປຈີນ 2.943 ໂຕນ ມູນຄ່າ 1,66 ລ້ານໂດລາ; ສົ່ງແປ້ງໝາກກ້ວຍໄປຫວຽດນາມ 120 ໂຕນ ມູນຄ່າ 56 ພັນໂດລາ; ສົ່ງນໍ້າຕານຊາຍ ໄປອີຢູ 912 ໂຕນ ມູນຄ່າ 7 ແສນກວ່າໂດລາ; ສົ່ງນໍ້າຕານຊາຍ ໄປຫວຽດນາມ 803 ໂຕນ ມູນຄ່າ 4 ແສນກວ່າໂດລາ; ກາກນໍ້າຕານ 1.429 ໂຕນ ມູນຄ່າ 1 ແສນກວ່າໂດລາ ແລະ ຂີ້ຢາງພາລາ 74 ໂຕນ ມູນຄ່າ 3 ພັນກວ່າໂດລາ.ສົ່ງຄວາຍອອກຂາຍຕ່າງແຂວງ 263 ໂຕ, ງົວ 86 ໂຕ, ປາ ແລະ ຜະລິດຕະພັນປາ 32,5 ໂຕນ; ການນໍາເຂົ້າສັດ ຈາກຕ່າງແຂວງ ແລະ ຕ່າງປະເທດ ມີທັງໝົດ 72.240 ໂຕ, ໃນນີ້: ນໍາເຂົ້າຈາກຕ່າງແຂວງ 44.700 ໂຕ (ງົວ 200 ໂຕ, ໝູ 1.090 ໂຕ, ເປັດ 10.220 ໂຕ ແລະ ໄກ່ 33.390 ໂຕ) ແລະ ນໍາເຂົ້າຈາກຕ່າງປະເທດ 27.540 ໂຕ (ເປັດ 13.500 ໂຕ, ໄກ່ 14.040 ໂຕ); ການນໍາເຂົ້າຜະລິດຕະພັນສັດ ມີທັງໝົດ 567.590 ກິໂລ (ຜະລິດຕະພັນງົວ-ຄວາຍ,ຜະລິດຕະພັນໝູ, ຜະລິດຕະພັນສັດປີກ,ປາລ້ຽງ, ປາທະເລ, ກຸ້ງ) ແລະ ໄຂ່ 1.869.650 ໜ່ວຍ. ການນຳເຂົ້າຜະລິດຕະພັນສິນຄ້າກ່ຽວກັບສັດ ມີທັງໝົດ 1.366 ໂຕນ (ອາຫານໝູ 325 ໂຕນ, ອາຫານສັດປີກ 322 ໂຕນ ແລະ ອາຫານປາ 719 ໂຕນ).ລວມມູນຄ່າຜະລິດອຸດສາຫະກໍາປຸງແຕ່ງ ແລະ ຫັດຖະກໍາ ປະຕິບັດໄດ້ 212,62 ຕື້ກີບ ເທົ່າກັບ 43% ຂອງແຜນການ (ມະຕິສະພາ 489 ຕື້ກີບ) ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 51,45 ຕື້ກີບ ເທົ່າກັບ19%, ພ້ອມກັນນັ້ນ ກໍໄດ້ເອົາໃຈໃສ່ຊຸກຍູ,ສົ່ງເສີມ ແລະ ພັດທະນາອຸດສາຫະກຳປຸງແຕ່ງ-ຫັດຖະກຳ ໃຫ້ມີການຂະຫຍາຍຕົວຢ່າງຕໍ່ເນື່ອງ  ແລະ ໃຫ້ມີຄວາມຍືນຍົງ ດ້ວຍການເອື້ອອຳນວຍຄວາມສະດວກ, ການນຳໃຊ້ນະວັດຕະກຳໃໝ່ໆ ແລະ ເຕັກໂນໂລຊີເຂົ້າໃນການຜະລິດ ເພື່ອເພີ່ມຜະລິດຕະພັນໃຫ້ຫຼາກຫຼາຍ, ການສ້າງມູນຄ່າເພີ່ມ ແລະ ດຳເນີນການຜະລິດຕາມທິດສີຂຽວ-ຍືນຍົງ ແລະ ເປັນມິດກັບສິ່ງແວດລ້ອມ; ຜົນຜະລິດທີ່ພົ້ນເດັ່ນ ແລະ ສ້າງມູນຄ່າເພີ່ມ ລວມມີຜະລິດຕະພັນໄມ້,ຜະລິດຕະພັນນໍ້າຕານ ແລະ ຜະລິດຕະພັນຢາງພາລາ ແລະ ອື່ນໆ,ປັດໄຈທີ່ພາໃຫ້ຂະແໜງອຸດສາຫະກຳປຸງແຕ່ງ ມີການຂະຫຍາຍຕົວ ຍ້ອນແຂວງເຮົາມີທ່າແຮງທາງດ້ານຊັບພະຍາກອນທຳມະຊາດ ເຊັ່ນ: ແຫຼ່ງນ້ຳ,ບໍ່ແຮ່,ພື້ນທີ່ປູກພືດກະສິກຳ ທີ່ເປັນເງື່ອນໄຂໃຫ້ຂະແໜງອຸດສາຫະກຳມີການຂະຫຍາຍຕົວ. ປັດຈຸບັນ,ທົ່ວແຂວງ ມີໂຮງງານອຸດສາຫະກໍາປຸງແຕ່ງ ແລະ ຫັດຖະກຳ ທັງໝົດ 314 ຫົວໜ່ວຍ,ມູນຄ່າການລົງທຶນ 2.203 ຕື້ກີບໃນນີ້:ໂຮງງານອຸດສາຫະກຳປຸງແຕ່ງ 255 ຫົວໜ່ວຍ (ໂຮງງານຂະໜາດໃຫຍ່ ມີ 17 ຫົວໜ່ວຍ, ຂະໜາດກາງ 25 ຫົວໜ່ວຍ, ຂະໜາດນ້ອຍ 99 ຫົວໜ່ວຍ ແລະ ແບບຄອບຄົວ 114 ຫົວໜ່ວຍ) ທຽບໃສ່ປີຜ່ານມາ ເພີ່ມຂຶ້ນ 8 ຫົວໜ່ວຍ, ມູນຄ່າການລົງທຶນ 2.182 ຕື້ກີບ; ຫົວ
ໜ່ວຍຫັດຖະກຳ ມີ 59 ຫົວໜ່ວຍ ທຽບໃສ່ປີຜ່ານມາ ຫຼຸດລົງ 41 ຫົວໜ່ວຍ,ມູນຄ່າການລົງທຶນ 21,38 ຕື້ກີບ,ສາມາດສ້າງວຽກເຮັດງານທຳໃຫ້ກຳລັງແຮງງານພາຍໃນໄດ້ຫຼາຍກວ່າ 3.000 ຄົນ.
ສໍາລັບການຄ້າຕ່າງປະເທດມູນຄ່າການນໍາເຂົ້າ-ສົ່ງອອກ ປະຕິບັດໄດ້ທັງໝົດ71,52 ລ້ານໂດລາ ເທົ່າກັບ45% ຂອງແຜນການ (ມະຕິສະພາ 160,21 ລ້ານໂດລາ)ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 2,42 ລ້ານໂດລາ ເທົ່າກັບ 3,6%,ໃນນີ້ມູນຄ່າການນໍາເຂົ້າ (ຕາມການຮັບຮອງແຜນນຳເຂົ້າ)ປະຕິບັດໄດ້ 14,52 ລ້ານໂດລາ(ໂຕເລກຈາກດ່ານສາກົນພູເກືອ, ແຕ່ຕົວຈິງຍັງມີການນຳເຂົ້າຈາກບັນດາແຂວງໃກ້ຄຽງຈຳນວນຫຼາຍ)ລື່ນແຜນ 4 ເທົ່າຕົວ (ມະຕິສະພາ 3,21 ລ້ານໂດລາ) ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 13,63 ລ້ານໂດລາ, ປະເພດສິນຄ້ານໍາເຂົ້າ ລວມມີພາຫະນະຮັບໃຊ້ການຜະລິດ, ເຄື່ອງກົນຈັກ, ວັດຖຸ-ອຸປະກອນ ແລະ ເຄື່ອງອຸປະໂພກ-ບໍລິໂພກ.ມູນຄ່າການສົ່ງອອກ ປະຕິບັດໄດ້ 57 ລ້ານໂດລາ ເທົ່າກັບ 36% ຂອງແຜນການ (ມະຕິສະພາ 157 ລ້ານໂດລາ) ທຽບໃສ່ໄລຍະດຽວກັນຂອງປີຜ່ານມາ ຫຼຸດລົງ 11,12 ລ້ານໂດລາ ເທົ່າກັບ 16%; ປະເພດສິນຄ້າສົ່ງອອກ ລວມມີຜະລິດຕະພັນໄມ້,ກະແສໄຟຟ້າ, ນໍ້າຕານຊາຍ, ກາກນໍ້າຕານ, ຢາງພາລາແຫ້ງ, ຫີນອ່ອນປາໂກໄດ, ຜະລິດຕະພັນຖ່ານ, ມັນຕົ້ນແຫ້ງ, ສິນຄ້າກະສິກໍາ (ໝາກກ້ວຍ, ສົ້ມໂອ, ໝາກມັງກອນ) ແລະ ເຄື່ອງປ່າຂອງດົງ.ເກີນດຸນ 42,48 ລ້ານໂດລາ ກວມເອົາ 18% ຂອງ GDP.ມູນຄ່າການຈໍລະຈອນສິນຄ້າ (ຂາຍຍົກ-ຂາຍຍ່ອຍ) ປະຕິບັດໄດ້ 4.668,59 ຕື້ກີບ ເທົ່າກັບ 82% ຂອງແຜນການ (ມະຕິສະພາ 5.682 ຕື້ກີບ) ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 3.165 ຕື້ກີບ ເທົ່າກັບ 211%, ໝວດສິນຄ້າທີ່ຊົມໃຊ້ຫຼາຍກວ່າໝູ່ ໄດ້ແກ່: ໝວດນໍ້າມັນເຊື້ອໄຟ ແລະ ອາຍແກັສ 1.920 ຕື້ກີບ,ຮອງລົງມາແມ່ນໝວດສະບຽງອາຫານ ປະຕິບັດໄດ້ 225 ຕື້ກີບ ແລະ ໝວດເຄື່ອງດື່ມ 66 ຕື້ກີບ.