ທ່ານ ສິນປະເສີດ ອາໄພຍະລາດ ຮອງເຈົ້າເມືອງລະມາມ ລາຍງານຕໍ່ກອງປະຊຸມຄົບຄະນະບໍລິຫານງານພັກ ເມືອງລະມາມເປີດກວ້າງ ຄັ້ງທີ 2 ສະໄໝທີ X ເມື່ອບໍ່ດົນນີ້ວ່າ: ໃນ 6 ເດືອນຕົ້ນປີ 2025 ທົ່ວເມືອງລະມາມ ຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ບັນດາພື້ນຖານໂຄງລ່າງ, ຊີວິດການເປັນຢູ່ ຂອງປະຊາຊົນ, ເສດຖະກິດ ແລະ ບັນດາຂະແໜງການຕ່າງໆ ໄດ້ຮັບການປັບປຸງ, ພັດທະນາ ແລະ ຂະຫຍາຍຕົວຢ່າງຕໍ່ເນື່ອງ ຕາມທິດໝັ້ນທ່ຽງ, ມີຄຸນນະພາບ ແລະ ຍືນຍົງ ເປັນຕົ້ນ: ຂະແໜງກະສິກໍາ ຂະຫຍາຍຕົວ 5.23% ກວມເອົາ 55.41% ຂອງ GDP; ຂະແໜງອຸດສາຫະກຳຂະຫຍາຍຕົວ 5.25% ກວມເອົາ 5.17% ແລະ ຂະແໜງບໍລິການ ຂະຫຍາຍຕົວ 7.07% ກວມເອົາ 39.43% ຂອງ GDP; ເກັບລາຍຮັບເຂົ້າງົບປະມານ (ລາຍຮັບປົກກະຕິຂອງເມືອງ) ໄດ້ 5.48 ຕື້ກີບ ທຽບໃສ່ແຜນປີ ເທົ່າກັບ 56%, ປະຕິບັດລາຍຈ່າຍໄດ້ 20.64 ຕື້ກີບ ທຽບໃສ່ແຜນປີ ເທົ່າກັບ 42%; ເກັບກູ້ຜົນຜະລິດເຂົ້ານາແຊງໄດ້ 1,406.25 ໂຕນ, ພືດສະບຽງອາຫານ 1,284.12 ໂຕນ ແລະ ພືດເປັນສິນຄ້າ 258,405 ໂຕນ.
 |
ທ່ານ ສິນປະເສີດ ອາໄພຍະລາດ ໃຫ້ຮູ້ຕື່ມວ່າ: ໃນ 6 ເດືອນທ້າຍປີ, ອົງການປົກຄອງເມືອງລະມາມ ຈະສຸມໃສ່ນໍາພາ-ຊີ້ນໍາພັດທະນາເສດຖະກິດ-ສັງຄົມ ໂດຍປິ່ນອ້ອມ 6 ເປົ້າໝາຍ ຕາມທິດສ້າງເສດຖະກິດ ເອກະລາດ ເປັນເຈົ້າຕົນເອງ, ປັບປຸງໂຄງປະກອບເສດຖະກິດໃຫ້ມີຄວາມຫຼາກຫຼາຍ ຕາມຂະແໜງການຜະລິດ-ການບໍລິການ; ສຸມໃສ່ຊຸກຍູ້ ແລະ ສົ່ງເສີມການຜະລິດກະສິກໍາ (ປູກຝັງ-ລ້ຽງສັດ) ໃຫ້ຂະຫຍາຍຕົວຢ່າງກວ້າງຂວາງ ເພື່ອຕອບສະໜອງການບໍລິໂພກພາຍໃນໃຫ້ພຽງພໍ ແລະ ຂາຍເປັນສິນຄ້າ, ທົດແທນການນໍາເຂົ້າ; ຫັນພະນັກງານລົງກໍ່ສ້າງຮາກຖານການເມືອງ, ໂຄສະນາສຶກສາອົບຮົມ ແລະ ປຸກລະດົມຂົນຂວາຍໃຫ້ທຸກພາກສ່ວນໃນທົ່ວສັງຄົມ ມີສ່ວນຮ່ວມໃນການພັດທະນາ; ເອົາໃຈໃສ່ແກ້ໄຂບັນຫາເຄັ່ງຮ້ອນດ້ານເສດຖະກິດ-ການເງິນ, ແກ້ໄຂຄວາມທຸກຍາກຂອງປະຊາຊົນ, ສ້າງຄອບຄົວ-ບ້ານພັດທະນາ ແລະ ສ້າງບ້ານໃຫຍ່ໃຫ້ເປັນຕົວເມືອງຢູ່ຊົນນະບົດໃຫ້ໄດ້ຕາມແຜນການທີ່ວາງໄວ້.
(ຂ່າວ: ສັນຍາ)
ຄໍາເຫັນ