6 ເດືອນຕົ້ນປີ ອັດຕະປືສຸມໃສ່ການຜະລິດເພື່ອຄໍ້າປະກັນສະບຽງອາຫານ

ໂດຍ: ຕະວິນຍານ
    
ແຂວງອັດຕະປືຊຸກຍູ້ສົ່ງເສີມຊາວກະສິກອນ ແລະ ຜູ້ປະກອບການພາກເອກະຊົນ ສຸມໃສ່ການຜະລິດເພື່ອຄໍ້າປະກັນສະບຽງອາຫານ ແລະ ຜະລິດກະສິກຳເປັນສິນຄ້າ ມີການຂະຫຍາຍຕົວດີພໍສົມຄວນ.ໃນໄລຍະ 6 ເດືອນຕົ້ນປີ 2023 ນີ້, ແຂວງ ຜະລິດສະບຽງອາຫານເປັນຕົ້ນຜະລິດ ເຂົ້ານາແຊງ ປະຕິບັດໄດ້ 661 ເຮັກຕາມີີ 814 ຄອບຄົວ, ຜົນຜະລິດ 1.728 ໂຕນ ເທົ່າກັບ 40% ຂອງແຜນການ, ທຽບໃສ່ໄລຍະດຽວກັນຂອງປີຜ່ານມາ ຜົນຜະລິດເຂົ້າຫຼຸດລົງ 1.672 ໂຕນ ເທົ່າກັບ 49%, ສາເຫດທີ່ບໍ່ສາມາດບັນລຸຕາມແຜນການຍ້ອນທຶນການຜະລິດສູງຖ້າທຽບໃສ່ປີຜ່ານມາ ເປັນຕົ້ນ: ຄ່າກະແສໄຟຟ້າ,ປະຊາຊົນຈໍານວນໜຶ່ງ ຫັນໄປປູກມັນຕົ້ນ,ປູກອ້ອຍ ລວມທັງໄປອອກແຮງງານຢູ່ຕາມຫົວໜ່ວຍການຜະລິດອື່ນໆ, ນອກຈາກນັ້ນ ຍັງເກີດສັດຕູພືດລະບາດ ແລະ ບາງເຂດປະຕິບັດບໍ່ຖືກຕາມເຕັກນິກ.ແຜນການປູກເຂົ້ານາປີ ເນື້ອທີ່ 25.300 ເຮັກຕາ,ຄາດຄະເນຜົນຜະລິດ 85.329 ໂຕນ.ແຜນການປູກເຂົ້າໄຮ່ ເນື້ອທີ່ 1.660 ເຮັກຕາ,ຄາດຄະເນຜົນຜະລິດ 3.652 ໂຕນ.
ການປູກພືດລະດູແລ້ງໃນເຂດ ແລະ ນອກເຂດຊົນລະປະທານ ເຊັ່ນ: (ພືດກິນໝາກ, ກິນຫົົົວ, ກິນໃບ, ເຜືອກ-ມັນ ແລະ ສາລີຫວານ) ປະຕິບັດໄດ້ 358 ເຮັກຕາ ເທົ່າກັບ 24% ຂອງແຜນການ (ມະຕິສະພາ 1.513 ເຮັກຕາ), ຜົນຜະລິດໄດ້ 1.915 ໂຕນ ເທົ່າກັບ 18% ຂອງແຜນການ (ມະຕິສະພາ 10.861 ໂຕນ);ແຜນການປູກພືດລະດູຝົນ 717 ເຮັກຕາ ຄາດຄະເນຜົນຜະລິດ 7.844 ໂຕນ. ການສະໜອງຊີ້ນ, ປາ ແລະ ໄຂ່: ປະຕິບັດໄດ້ 5.701.147 ກິໂລ ເທົ່າກັບ 55% ຂອງແຜນການ (ມະຕິສະພາ 10.426.000 ກິໂລ), ໃນນັ້ນ: ຊີ້ນຄວາຍ 194.570 ກິໂລ, ຊີ້ນງົວ 287.661 ກິໂລ,ຊີ້ນໝູ 1.098.048 ກິໂລ,ຊີ້ນແບ້ 69.574 ກິໂລ,ສັດປີກ 598.057 ກິໂລ,ປາ 2.773.258 ກິໂລ,ໄຂ່ 433.276 ກິໂລ ແລະ ອື່ນໆ 255.703 ກິໂລ, ສະເລ່ຍອັດຕາການບໍລິໂພກ 33 ກິໂລ/ຄົນ/6 ເດືອນ (ມະຕິສະພາສະເລ່ຍການບໍລິໂພກ 65 ກິໂລ/ຄົນ/ປີ) ແຂວງໄດ້ເອົາໃຈໃສ່ຊຸກຍູ້-ສົ່ງເສີມ ການຜະລິດເປັນສິນຄ້າຕາມທ່າແຮງ ແລະ ຄວາມຕ້ອງການຂອງຕະຫລາດ ມີຄື: ການເກັບກູ້ຜົນຜະລິດມັນຕົ້ນ (ປູກປີ 2022) ເນື້ອທີ່ປູກ 16.463 ເຮັກຕາ, ເນື້ອທີ່ເສຍຫາຍ 586 ເຮັກຕາ, ເນື້ອທີ່ເກັບກູ້ຕົວຈິງ 15.877 ເຮັກຕາ ຜົນຜະລິດ 599.149 ໂຕນ, ໃນນັ້ນ: ຜົນຜະລິດມັນດິບ 422.511 ໂຕນ, ມູນຄ່າ 464 ຕື້ກີບ, ຜົນຜະລິດມັນແຫ້ງ 177.004 ໂຕນ, ມູນຄ່າ 495 ຕື້ກີບ; ແຜນການຜະລິດເປັນສິນຄ້າ (ວຽກປູກຝັງ) ໃຫ້ໄດ້ 54.178 ເຮັກຕາ, ຄາດຄະເນຜົນຜະລິດ 1.279.854 ໂຕນ,ໃນນີ້ສົ່ງເສີມປູກແບບທົ່ວໄປໃຫ້ໄດ້ 1.090 ເຮັກຕາ, ຄາດຄະເນຜົນຜະລິດ 1.641 ໂຕນ ລວມມີ: (ໝາກໂມ, ຢາສູບໝາກແໜ່ງ, ໝາກນັດ, ພືດຕະກຸນຖົ່ວ, ໝາກກ້ວຍ, ໝາກຂາມ ແລະ ພືດອື່ນໆ).ສົ່ງເສີມແບບມີຈຸດສຸມໃຫ້ໄດ້ 17.752 ເຮັກຕາ, ຜົນຜະລິດ 472.422 ໂຕນ (ສາລີແຂງ,ກາເຟ ແລະ ມັນຕົ້ນ) ແລະສົ່ງເສີມບໍລິສັດ ໃຫ້ໄດ້ 39.285,91ຮຕ, ຜົນຜະລິດ 916.505,75ໂຕນ ມີຄື: (ອ້ອຍ, ກ້ວຍ, ໝາກມັງກອນ, ໝາກພ້າວ, ຖົ່ວລຽນ, ສົ້ມໂອ, ໝາກມ່ວງ, ລຳໄຍ, ໝາກມີ້, ໝາກນັດ, ພິກໄທ,ຢາງພາລາ ແລະ ເຂົ້າ.ການເກັບຊື້ເຂົ້າ ຂອງບໍລິສັດ IDP ມີຄື: ເມືອງສະໜາມໄຊ ເກັບຊື້ເຂົ້າໜຽວ ໄດ້ 107 ໂຕນ ເທົ່າກັບ 54% ຂອງແຜນການ (ແຜນການ 200 ໂຕນ) ລາຄາ 5,7 ລ້ານກີບ/ໂຕນ ລວມເປັນເງິນ 609 ລ້ານກີບ; ເກັບຊື້ເຂົ້າຈ້າວມະລິ ໄດ້ 153 ໂຕນ ເທົ່າກັບ 51% ຂອງແຜນການ (ແຜນການ 300 ໂຕນ) ລາຄາ 6 ລ້ານກີບ/ໂຕນ ລວມເປັນເງິນ 918 ລ້ານກີບ. ສ່ວນຢູ່ເມືອງພູວົງ ສາມາດເກັບຊື້ເຂົ້າຈ້າວລະຄອນ ໄດ້ 21 ໂຕນ ລາຄາ 3,69 ລ້ານກີບ/ໂຕນ ລວມເປັນເງິນ 84 ລ້ານກີບ.
ສໍາລັບການລ້ຽງສັດ ມີການຂະຫຍາຍຝູງສັດ ສະເລ່ຍເພີ່ມຂຶ້ນຢູ່ໃນລະດັບ 1,57% ຕໍ່ປີ, ປັດຈຸບັນ,ທົ່ວແຂວງ ມີຝູງສັດລ້ຽງທັງໝົດ 558.513 ໂຕ, ໃນນັ້ນ: ຄວາຍ 35.258 ໂຕ ເພີ່ມຂຶ້ນ 0,03%, ງົວ 49.302 ໂຕ ເພີ່ມຂຶ້ນ 0,06%, ໝູ 23.829 ໂຕ ເພີ່ມຂຶ້ນ 8,5%, ແບ້ 15.272 ໂຕ ເພີ່ມຂຶ້ນ 21%, ສັດປີກ 434.812 ໂຕ ເພີ່ມຂຶ້ນ 0,95%.ໃນໄລຍະຜ່ານມາ,ໄດ້ເອົາໃຈໃສ່ໃນການສົ່ງເສີມການລ້ຽງສັດ ຢ່າງປັນລະບົບ ໂດຍສະເພາະແມ່ນການສັກຢາປ້ອງກັນພະຍາດ, ການປ້ອງກັນ ແລະ ເຝົ້າລະວັງການລະບາດຂອງພະຍາດສັດ ພ້ອມທັງສົ່ງເສີມການປູກຫຍ້າ ຊຶ່ງທົ່ວແຂວງ ມີຟາມສັດທັງໝົດ 13 ຟາມ,ມີສັດລ້ຽງໃນຟາມທັງໝົດ 47.337 ໂຕ ແລະ ຟາມລ້ຽງປາ 1 ຟາມ ມີ37.333 ໂຕ.