ພາຍຫຼັງໄດ້ຮັບຟັງການສະເໜີຮ່າງກົດໝາຍດັ່ງກ່າວ, ທ່ານ ຈະເລີນ ເຢຍປາວເຮີ ໄດ້ກ່າວວ່າ:ການສ້າງຮ່າງກົດໝາຍສະບັບນີ້ ເພື່ອຮັບປະກັນໃຫ້ແກ່ການຄຸ້ມຄອງ, ຕິດຕາມກວດກາວຽກງານສັງຄົມສົງເຄາະ ແນໃສ່ຮັບປະກັນໃຫ້ເປົ້າໝາຍສັງຄົມສົງເຄາະແຕ່ລະປະເພດ ໄດ້ຮັບການຊ່ວຍເຫຼືອ ແລະ ການບໍລິການ ໃນການແກ້ໄຂຊີວິດການເປັນຢູ່ ແລະ ສ້າງເງື່ອນໄຂການດໍາລົງຊີວິດຂັ້ນພື້ນຖານຢ່າງທົ່ວເຖິງ, ເປັນທໍາ, ສ້າງສັງຄົມສາມັກຄີປອງດອງ, ຍຸຕິທຳ ແລະ ສີວິໄລ. ສະນັ້ນ, ເພື່ອເປັນບ່ອນອີງໃຫ້ແກ່ບັນດາທ່ານສະມາຊິກສະພາແຫ່ງຊາດ (ສສຊ) ຄົ້ນຄວ້າ ແລະ ປະກອບຄໍາເຫັນຢ່າງມີຈຸດສຸມ.ທ່ານ ຈະເລີນ ເຢຍປາວເຮີ ໄດ້ມີບາງຄໍາຖາມເຈາະຈີ້ມດັ່ງນີ້:
1. ໂຄງປະກອບຂອງຮ່າງກົດໝາຍສະບັບນີ້, ບັນດາທ່ານສະມາຊິກສະພາແຫ່ງຊາດ ເຫັນວ່າຍັງມີບັນຫາໃດ ຫຼື ຈຸດໃດຢາກໃຫ້ປັບປຸງຕື່ມ?.
2. ມາດຕາ 2 ສັງຄົມສົງເຄາະ ຕໍ່ກັບການກໍານົດເນື້ອໃນຂອງມາດຕານີ້ ບັນດາທ່ານເຫັນວ່າມີຄວາມສອດຄ່ອງ, ຖືກຕ້ອງ ແລະ ເໝາະສົມແລ້ວບໍ່? ຫຼື ຄວນກໍານົດຄືແນວໃດຕື່ມ ເພື່ອໃຫ້ມີຄວາມເຂົ້າໃຈງ່າຍ ແລະ ສະດວກໃນການຈັດຕັ້ງປະຕິບັດ?.
3. ມາດຕາ 9 ປະເພດສັງຄົມສົງເຄາະຕໍ່ກັບການກໍານົດເນື້ອໃນຂອງມາດຕານີ້ ບັນດາທ່ານເຫັນວ່າຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ ຫຼືບໍ? ຫຼື ຄວນຈະກຳນົດປະເພດໃດເຂົ້າຕື່ມເພື່ອໃຫ້ກຸ່ມເປົ້າໝາຍໄດ້ຮັບການຊ່ວຍເຫຼືອຢ່າງເປັນທຳ ແລະ ທົ່ວເຖິງ?.
4. ມາດຕາ 21 ສັງຄົມສົງເຄາະແບບປົກກະຕິ ຕໍ່ກັບການກໍານົດເນື້ອໃນຂອງມາດຕານີ້ວ່າ: ສັງຄົມສົງເຄາະແບບປົກກະຕິແມ່ນການຊ່ວຍເຫຼືອ, ການບໍລິການ ແລະ ການພັດທະນາທາງກົງ ຫຼືທາງອ້ອມ ຕາມແຕ່ລະປະເພດສັງຄົມສົງເຄາະຕາມການສະເໜີຂອງຂະແໜງການແຮງງານ ແລະ ສະຫວັດດີການສັງຄົມ, ອົງການປົກຄອງທ້ອງຖິ່ນ ແລະ ພາກສ່ວນອື່ນໆທີ່ກ່ຽວຂ້ອງ ຊຶ່ງການກຳນົດຄືແນວນັ້ນ, ບັນດາທ່ານເຫັນວ່າມີຄວາມຖືກຕ້ອງ, ຄົບຖ້ວນ, ສອດຄ່ອງ ແລະ ຮັດກຸມແລ້ວບໍ? ຫຼື ຈະກຳນົດຄືແນວໃດ ເພື່ອໃຫ້ມີຄວາມສະດວກໃນການຈັດຕັ້ງປະຕິບັດ?.
5. ມາດຕາ 22 ເປົ້າໝາຍສັງຄົມສົງເຄາະໄດ້ຈັດກຸ່ມເປົ້າໝາຍສັງຄົມສົງເຄາະອອກເປັນແຕ່ລະເປົ້າໝາຍຄືແນວນັ້ນ ບັນດາທ່ານເຫັນວ່າມີຄວາມຄົບຖ້ວນ, ຖືກຕ້ອງ ແລະ ເໝາະສົມແລ້ວບໍ? ຫຼື ຄວນກໍານົດເປົ້າໝາຍໃດຕື່ມເພື່ອໃຫ້ພົນລະເມືອງທຸກຄົນໄດ້ຮັບການຊ່ວຍເຫຼືອ, ການບໍລິການ ແລະ ການພັດທະນາຢ່າງທັນການ?.
6. ມາດຕາ 33 ມາດຕະຖານ ແລະ ເງື່ອນໄຂຂອງນັກສັງຄົມສົງເຄາະ ຕໍ່ກັບການກໍານົດເນື້ອໃນມີ 7 ຂໍ້ ຄືແນວນັ້ນບັນດາທ່ານເຫັນວ່າມີຄວາມຖືກຕ້ອງ, ເໝາະສົມ ແລະ ຄົບຖ້ວນແລ້ວບໍ ຫຼືຄວນກຳນົດຄືແນວໃດຕື່ມ ເພື່ອໃຫ້ສອດຄ່ອງກັບການຈັດຕັ້ງປະຕິບັດຕົວຈິງ?.
ນອກຈາກເນື້ອໃນທີ່ໄດ້ກ່າວມານີ້ ຫາກຍັງເຫັນວ່າຍັງມີມາດຕາ, ເນື້ອໃນໃດທີ່ບໍ່ທັນຄົບຖ້ວນ ແລະ ຮັດກຸມນັ້ນ ກໍສະເໜີໃຫ້ບັນດາ ສສຊ ມີຄໍາເຫັນແລກປ່ຽນຕື່ມໄດ້.(ຂ່າວ: ວັນເພັງ, ພາບ: ຂັນໄຊ)
ຄໍາເຫັນ