ການຝຶກອົບຮົມຄັ້ງນີ້, ເປັນການຍົກລະດັບວິຊາສະເພາະ ການບັນຊີວິສາຫະກິດ ໃຫ້ແກ່ພະນັກງານຂະແໜງການເງິນ ໃນ8 ແຂວງພາກເໜືອປະກອບມີ: ຫຼວງພະບາງ, ຫົວພັນ, ໄຊຍະບູລີ, ຊຽງຂວາງ, ຜົ້ງສາລີ, ຫຼວງນ້ຳທາ, ອຸດົມໄຊ ແລະ ແຂວງບໍ່ແກ້ວ ລວມທັງໝົດ 50 ຄົນ ໄດ້ມີຄວາມຮັບຮູ້ດ້ານບັນຊີຢ່າງເລິກເຊິ່ງ, ທັງເປັນເອກະພາບກັນໃນການຄຸ້ມຄອງວຽກງານບັນຊີ ໃຫ້ມີປະສິດທິຜົນ, ເພື່ອນໍາໄປເຜີຍແຜ່, ແນະນຳ, ຊຸກຍູ້ຫົວໜ່ວຍທຸລະກິດ ໃຫ້ຖືບັນຊີປະຕິບັດລະບົບການຖືບັນຊີຖືກຕ້ອງຕາມລະບຽບກົດໝາຍດ້ານບັນຊີ ແລະ ລະບຽບການຕ່າງໆທີ່ກ່ຽວຂ້ອງ.
ຊຸດອົບຮົມຄັ້ງນີ້, ຜູ້ເຂົ້າຮ່ວມຈະໄດ້ຮຽນຮູ້ບົດຮຽນຕາມຫຼັກສູດ, ປະກອບມີ 3 ຫົວຂໍ້. ໃນນັ້ນ, ລະບົບການຖືບັນຊີ ຈຸນລະວິສາຫະກິດ ລວມມີຄວາມຮູ້ເບື້ອງຕົ້ນກ່ຽວກັບບັນຊີຈຸນລະວິສາຫະກິດ ແລະ ການຖືບັນຊີສໍາລັບຈຸນລະວິສາຫະກິດ, ຫຼັກການບັນຊີວິສາຫະກິດ ລວມມີ: ຄວາມຮູ້ເບື້ອງຕົ້ນກ່ຽວກັບການບັນຊີ, ການຖືບັນຊີສຳລັບຈຸນລະວິສາຫະກິດ, ຄວາມຮູ້ກ່ຽວກັບການບັນຊີຄູ່ ແລະ ການຈັດວາງລະບົບບັນຊີ. ບັນດາລາຍການເກີດຂຶ້ນໃນສະໄໝ ລວມມີ ການບັນຊີສໍາລັບການສ້າງຕັ້ງບໍລິສັດ, ການຊື້-ການຂາຍ ແລະ ການຊໍາລະສະສາງ, ການບໍລິການຈາກທາງນອກ, ບັນດາລາຍຈ່າຍໃນທຸລະກິດ ແລະ ບັນດາລາຍຈ່າຍອື່ນໆ, ການຕີລາຄາຊັບສົມບັດເຂົ້າເປັນຊັບສິນຂອງວິສາຫະກິດ, ການຫັກຄ່າຫຼຸ້ຍຫ້ຽນຂອງ ຊັບສົມບັດຄົງທີ່, ການຖອນຊັບສົມບັດຄົງທີ່ອອກຈາກຊັບສິນລວມຂອງວິສາຫະກິດ, ການຕີລາຄາຊັບສົມບັດຄົງທີ່ ຄືນໃໝ່, ສັນຍາໄລຍະຍາວ, ເງິນຊ່ວຍໜູນ ແລະ ສັນຍາເຊົ່າສິນເຊື່ອ. ພ້ອມນັ້ນ ຈະໄດ້ຮຽນຮູ້ ການສ້າງເອກະສານບັນຊີ ແລະ ການສ້າງເອກະສານ ລາຍງານການເງິນ.
(ແຫຼງຂ່າວ: ແຂວງຫຼວງພະບາງ)
ຄໍາເຫັນ