 |
ທ່ານ ຮອ ເມືອງໄຊ ໝື່ນຫຼວງ ຮອງກອງສືບສວນ-ສອບສວນຄະດີອຸບັດເຫດ ພະແນກຈະລາຈອນ ປກສ ແຂວງອັດຕະປື ໄດ້ໃຫ້ສໍາພາດໃນວັນທີ 30 ກັນຍາ 2026 ນີ້ວ່າ: ສະພາບການເກີດອຸບັດເຫດຕາມທ້ອງຖະໜົນຢູ່ພາຍໃນແຂວງອັດຕະປື ຍັງເປັນບັນຫາທີ່ຈະຕ້ອງໄດ້ຮັບການເອົາໃສ່ໃຈ ແລະ ຮ່ວມມືຈາກຫລາຍພາກສ່ວນ, ຊຶ່ງໄລຍະ 9 ເດືອນຜ່ານມາ ຕາມການເກັບກໍາສະຖິຕິຂອງເຈົ້າໜ້າທີ່ພົບວ່າ ສາເຫດຫລັກຂອງການເກີດອຸບັດເຫດ ສ່ວນໜຶ່ງມາຈາກຜູ້ຂັບຂີ່ຍັງປະຕິບັດຕາມກົດຈະລາຈອນບໍ່ດີເທົ່າທີ່ຄວນ ເຊັ່ນ: ການຂັບຂີ່ບໍ່ປ່ອຍສິດ, ບໍ່ໃຫ້ກຽດເຊິ່ງກັນ ແລະ ກັນ ລະຫວ່າງ ຜູ້ໃຊ້ລົດໃຊ້ຖະໜົນ, ຂັບຂີ່ດ້ວຍຄວາມໄວເກີນກຳນົດ, ລວມເຖິງການດື່ມສິ່ງມືນເມົາແລ້ວຂັບຂີ່ ແລະ ອື່ນໆ. ສ່ວນຈຸດທີ່ມັກເກີດອຸບັດເຫດຫລາຍກວ່າໝູ່ແມ່ນຕາມຈຸດ 3 ແຍກ, 4 ແຍກ ແລະ ບໍລິເວນຊຸມຊົນທີ່ມີການສັນຈອນແອອັດ ໃນເຂດເທສະບານແຂວງ. ຕໍ່ສະພາບການດັ່ງກ່າວ, ທາງພະແນກຈະລາຈອນ ປກສ ແຂວງອັດຕະປື ກໍໄດ້ເອົາໃຈໃສ່ລົງເຄື່ອນໄຫວເຜີຍແຜ່ ແລະ ໂຄສະນາກົດລະບຽບການສັນ ຈອນຕາມເສັ້ນທາງຫລວງໃນຂອບເຂດເທສະບານແຂວງ, ຕາມຈຸດ 3 ແຍກ ແລະ 4 ແຍກທີ່ມີໄຟສັນຍານ, ຕາມສຳນັກງານອົງການ ແລະ ບັນດາໂຮງຮຽນ ເພື່ອສ້າງຄວາມຮູ້ ແລະ ສ້າງຈິດສຳນຶກດ້ານກົດລະບຽບຈະລາຈອນໃຫ້ແກ່ນັກຮຽນ, ພໍ່ແມ່ປະຊາຊົນ ແລະ ຜູ້ໃຊ້ລົດໃຊ້ຖະໜົນ.
ໂອກາດນີ້, ທ່ານ ຮອ ເມືອງໄຊ ໝື່ນຫຼວງ ຍັງໄດ້ຮຽກຮ້ອງໃຫ້ປະຊາຊົນ, ພໍ່ຄ້າຊາວຂາຍ, ພະນັກງານ, ທະຫານ, ຕຳ ຫຼວດ ແລະ ຜູ້ໃຊ້ລົດໃຊ້ຖະໜົນທຸກຄົນ ໃຫ້ເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ, ໃຫ້ກຽດ ແລະ ປ່ອຍສິດໃຫ້ແກ່ກັນ ແລະ ກັນ, ບໍ່ຂັບຂີ່ດ້ວຍຄວາມໄວເກີນກຳນົດ, ບໍ່ຂັບຂີ່ໃນຂະນະມີອາການມືນເມົາ ແລະ ສຳລັບຜູ້ຂັບຂີ່ລົດຈັກ ຕ້ອງໃສ່ໝວກກັນກະທົບທີ່ໄດ້ມາດຕະຖານທຸກຄັ້ງ, ການຮ່ວມມືກັນຂອງທຸກພາກສ່ວນ ໃນການເຄົາລົບກົດຈະລາຈອນ ແລະ ມີສະຕິຮັບຜິດຊອບໃນການໃຊ້ລົດໃຊ້ຖະໜົນ ຈະເປັນປັດໄຈສຳຄັນໃນການປ້ອງກັນ ແລະ ຫລຸດຜ່ອນອຸບັດເຫດ, ສ້າງຄວາມປອດໄພໃນການສັນຈອນ ແລະ ຈຳກັດຄວາມສູນເສຍຕໍ່ຊີວິດ, ຮ່າງກາຍ ແລະ ຊັບສິນຂອງປະຊາຊົນ.ຂ່າວ: ວັດທະນາ
ຄໍາເຫັນ