ຂ່າວຕ່າງປະເທດລາຍງານ ໃນວັນທີ 3 ຕຸລາ ຜ່ານມາ, ວິສາຫະກິດ ອັງກໍ (Angkor Enterprise) ໄດ້ອອກຖະແຫຼງການໂດຍລະບຸວ່າ: ອຸທິຍານບູຮານຄະດີອັງກໍວັດທີ່ມີຊື່ສຽງຂອງກຳປູເຈຍໄດ້ຕ້ອນຮັບນັກທ່ອງທ່ຽວຕ່າງປະເທດສູງເຖິງ 539.561 ຄົນ ໃນໄລຍະ 9 ເດືອນທຳອິດຂອງປີນີ້ ເພີ່ມຂຶ້ນ 302% ເມື່ອທຽບແບບລາຍປີ.
ຖະແຫຼງການລະບຸວ່າ: ສະຖານທີ່ແຫ່ງນີ້ສາມາດສ້າງລາຍໄດ້ຈາກການຂາຍບັດເຂົ້າຊົມ 24,95 ລ້ານໂດລາ ໃນໄລຍະເວລາດັ່ງກ່າວ ເພີ່ມຂຶ້ນ 365% ເມື່ອທຽບແບບລາຍປີ. ທ່ານ ທົບ ໂສພຽກ ລັດຖະມົນຕີ ແລະ ໂຄສົກກະຊວງການທ່ອງທ່ຽວຂອງກຳປູເຈຍກ່າວວ່າ: ຈຳນວນນັກທ່ອງທ່ຽວຕ່າງປະເທດທີ່ເດີນທາງມາຢ້ຽມຢາມສະຖານທີ່ແຫ່ງນີ້ຈະເພີ່ມຂຶ້ນ ເມື່ອສະໜາມບິນສາກົນສຽມຣາດ ອັງກໍ ເລີ່ມເປີດດຳເນີນການພາຍໃນປີນີ້.
ອັງກໍວັດ ມີຂະໜາດ 401 ກິໂລຕາແມັດ ຕັ້ງຢູ່ແຂວງສຽມຣາດ ທາງພາກຕາເວັນຕົກສ່ຽງເໜືອຂອງກຳປູເຈຍ ຊຶ່ງໄດ້ຮັບການຂຶ້ນທະບຽນເປັນມໍລະດົກໂລກ ຂອງ UNESCO ເມື່ອປີ 1992 ແລະ ເປັນຈຸດໝາຍການທ່ອງທ່ຽວທີ່ຍອດນິຍົມທີ່ສຸດຂອງກຳປູເຈຍ.
ຄໍາເຫັນ