 |
ສະຫາຍ ພູວັນ ພົມມະຈັນ ໄດ້ກ່າວໄຂກອງປະຊຸມຄັ້ງນີ້ວ່າ: ກອງປະຊຸມໃຫຍ່ ຜູ້ແທນຊາວໜຸ່ມທົ່ວແຂວງອັດຕະປື ຄັ້ງນີ້ ຈະໄດ້ຕີລາຄາຄືນ ບັນດາຜົນສຳເລັດ ທີ່ຄະນະບໍລິຫານງານຊາວໜຸ່ມແຂວງ ຍາດມາໄດ້ໃນໄລຍະ 5 ປີຜ່ານມາ, ຍົກໃຫ້ເຫັນບັນດາຜົນສຳເລັດທີ່ຍາດມາໄດ້ ລວມທັງຈຸດອ່ອນຂໍ້ຄົງຄ້າງ ລວມທັງບົດຮຽນທີ່ຖອດຖອນໄດ້ ແລະ ວາງຄາດໝາຍສູ້ຊົນໃນ 5 ປີຕໍ່ໜ້າ ເພື່ອເຮັດໃຫ້ວຽກງານຊາວໜຸ່ມ-ເຍົາວະຊົນຂອງແຂວງອັດຕະປື ມີຜົນສຳເລັດຕາມຄາດໝາຍທີ່ວາງໄວ້.
ໃນໄລຍະ 5 ປີຜ່ານມາ, ການປັບປຸງກໍ່ສ້າງການຈັດຕັ້ງຊາວໜຸ່ມ-ເຍົາວະຊົນທັນວາແຂວງອັດຕະປື ໄດ້ມີຄວາມໜັກແໜ້ນ ເຂັ້ມແຂງ ທາງດ້ານປະລິມານ ແລະ ຄຸນນະພາບ, ບົດບາດ ຂອງຄະນະບໍລິຫານງານຊາວໜຸ່ມແຕ່ລະຂັ້ນ ໄດ້ພົ້ນເດັ່ນຂຶ້ນ, ມີຊາວໜຸ່ມທີ່ສັງກັດຢູ່ຫຼາຍຮາກຖານ ໄດ້ກາຍເປັນຕົວແບບໃນການສ້າງວຽກເຮັດງານທຳ ເຮັດໃຫ້ເສດຖະກິດຄອບຄົວມີຄວາມເຂັ້ມແຂງ, ຊາວໜຸ່ມ-ເຍົາວະຊົນແຕ່ລະຂັ້ນ ໄດ້ເປັນໃຈກາງເຕົ້າໂຮມຊາວໜຸ່ມ-ເຍົາວະຊົນ ຢູ່ແຕ່ລະຂົງເຂດປະກອບສ່ວນເຂົ້າໃນວຽກງານຂອງພັກ, ອົງການປົກຄອງແຕ່ລະຂັ້ນ ໂດຍສະເພາະກໍ່ສ້າງສະມາຊິກຊາວໜຸ່ມ ໃຫ້ກາຍເປັນສະມາຊິກພັກ, ເປັນພະນັກງານສືບທອດໃຫ້ແກ່ອົງການປົກຄອງຂັ້ນຕ່າງໆ ນັບມື້ຫຼາຍຂຶ້ນ, ກາຍເປັນກຳລັງປະຈັນບານກຽມພ້ອມຮັບໃຊ້ຊາດ.
 |
ກອງປະຊຸມຄັ້ງນີ້, ໄດ້ກໍານົດຄໍາຂວັນວ່າ: “ຊາວໜຸ່ມຍຸກໃໝ່ ຈົ່ງສືບຕໍ່ເສີມຂະຫຍາຍມູນເຊື້ອປະຕິວັດ ຂອງຊາວໜຸ່ມຮູ່ນກ່ອນ ເຮັດໃຫ້ຕົນເອງກາຍເປັນຄົນຮຸ່ນສືບທອດພາລະກິດປະຕິວັດຂອງພັກ ຢ່າງສົມກຽດ ແລະ ມີໄຊ’’. ຈາກນັ້ນ, ກໍໄດ້ຜ່ານແຜນພັດທະນາວຽກງານຊາວໜຸ່ມ-ເຍົາວະຊົນ ໄລຍະ 5 ປີ (2020-2024) ແລະ ທິດທາງແຜນການ 5 ປີຕໍ່ໜ້າ, ພ້ອມທັງມີການປະກອບຄຳເຫັນໃນຫົວຂໍ້ “ຊາວໜຸ່ມຕໍ່ກັບການປະກອບສ່ວນໃນການປະຕິບັດຄາດໝາຍ ສະຫັດສະຫວັດໃນວຽກງານສາທາ, ປະກອບຄຳເຫັນ ໃນຫົວຂໍ້ “ການປະກອບສ່ວນຂອງຊາວໜຸ່ມໃນແກ້ໄຂຊີວິດການເປັນຢູ່ຂອງປະຊາຊົນພາຍໃນ ເມືອງສະໜາມໄຊ ພາຍຫຼັງໄພພິບັດ, ປະກອບຄໍາເຫັນ ໃນຫົວຂໍ້ “ການສ້າງກອງທຶນພັດທະນາຊ່ວຍເຫຼືອເຊິ່ງກັນ ແລະ ກັນ’’. ພ້ອມນີ້ ຍັງຈະໄດ້ມອບໃບຍ້ອງຍໍຂອງສູນກາງຊາວໜຸ່ມປະຊາຊົນປະຕິວັດລາວ ໃຫ້ຜູ້ທີ່ມີຜົນງານດີເດັ່ນ ໃນການປະກອບສ່ວນວຽກງານຊາວໜຸ່ມ-ເຍົາວະຊົນ ຢູ່ແຂວງອັດຕະປື ໃນໄລຍະຜ່ານມາ ແລະ ປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມແຂວງອັດຕະປື ຊຸດໃໝ່ຕື່ມອີກ.
(ຂ່າວ-ພາບ: ມະນີວອນ)
ຄໍາເຫັນ