 |
ພົນໂທ ວັນທອງ ກອງມະນີ ໄດ້ກ່າວໄຂກອງປະຊຸມໃຫຍ່ຢ່າງເປັນທາງການວ່າ: ກອງປະຊຸມໃຫຍ່ຜູ້ແທນຄັ້ງທີ XII ຂອງອົງຄະນະພັກແຂວງອັດຕະປື ໃນຄັ້ງນີ້ ຈະໄດ້ພ້ອມກັນສະຫຼຸບຕີລາຄາຄືນໝາກຜົນ-ຜົນງານ ຜ່ານການນໍາພາ-ຊີ້ນໍາ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ຕະຫຼອດໄລຍະ 5 ປີຜ່ານມາ ແລະ ຍັງຈະໄດ້ສະເໜີທິດທາງແຜນການໃນການພັດທະນາແຂວງອັດຕະປື ໃນ 5 ປີຕໍ່ໜ້າ, ລວມທັງບັນດາໂຄງການ, ວຽກງານຈຸດສຸມຈຳນວນໜຶ່ງ, ວິໄສທັດຮອດປີ 2030. ຕະຫຼອດໄລຍະຜ່ານມາ ພາຍໃຕ້ການນໍາພາ-ຊີ້ນຳ ຂອງອົງຄະນະບໍລິຫານງານພັກແຂວງ ເຫັນວ່າໄດ້ຮັບຜົນສໍາເລັດໃນຫຼາຍດ້ານ, ບາງດ້ານກໍມີລັກສະນະກ້າວກະໂດດຂະຫຍາຍຕົວໄວ ແລະ ເປັນພື້ນຖານອັນສໍາຄັນໃຫ້ແກ່ການພັດທະນາໃນຕໍ່ໜ້າ, ແຕ່ຄຽງຄູ່ກັນນັ້ນ ກໍຍັງປະເຊີນກັບສິ່ງທ້າທາຍທົດສອບຫຼາຍປະການທັງພາຍໃນ ແລະ ພາຍນອກ ອັນທີ່ພົ້ນເດັ່ນ: ແມ່ນບັນຫາຄວາມບໍ່ສະຫງົບລະຫວ່າງຊາຍແດນລາວ-ກຳປູເຈຍ, ບັນຫາປະກົດການສໍ້ລາດ - ບັງຫຼວງໃນຂົງເຂດພັກ-ພະນັກງານ ຊຶ່ງໄດ້ສ້າງຄວາມເສຍຫາຍຢ່າງໃຫຍ່ຫຼວງຕໍ່ແຂວງພວກເຮົາ, ການລັກລອບຂຸດຄົ້ນຊັບພະຍາກອນທຳມະຊາດແບບຊະຊາຍ, ຄວາມຂັດແຍ່ງກ່ຽວກັບບັນຫາທີ່ດິນ, ບັນຫາຄ່າຄອງຊີບສູງ, ການປະລະການຮຽນ ແລະ ປະກົດການຫຍໍ້ທໍ້ຈໍານວນໜຶ່ງໃນສັງຄົມທີ່ແກ້ໄຂບໍ່ທັນຕົກ. ທັງໝົດນີ້ເປັນການທົດສອບຄວາມຮູ້-ຄວາມສາມາດໃນການຊີ້ນໍາ-ນໍາພາ ຂອງຄະນະບໍລິຫານງານພັກແຂວງ ກໍຄືການບໍລິຫານ-ການປົກຄອງຂອງການນໍາຂອງແຂວງພວກເຮົາ. ຜ່ານການເຄື່ອນໄຫວນໍາພາ-ຊີ້ນໍາ ໂດຍໄດ້ຮັບການເອົາໃຈໃສ່ຊີ້ນໍາຢ່າງແທດຕົວຈິງ ແລະຮອບດ້ານຕໍ່ເນື່ອງຂອງສູນກາງພັກ-ລັດຖະບານ ແລະ ຄວາມເປັນເຈົ້າການມີສະຕິສະດຸ້ງໄວຂອງການນໍາ ບວກກັບມູນເຊື້ອອັນດີງາມ, ຄວາມອົດທົນ ແລະ ສາມັກຄີປອງດອງຂອງສະມາຊິກພັກ-ພະນັກງານ ກໍຄືປະຊາຊົນບັນດາເຜົ່າທຸກທົ່ວໜ້າ ສາມາດເຮັດສຳເລັດໜ້າທີ່ການເມືອງຂອງຕົນ ຜ່ານຜ່າອຸປະສັກນາໆປະການພ້ອມກັນສຸມໃສ່ປະຕິບັດບັນດາຄາດໝາຍສູ້ຊົນຕົ້ນຕໍ ຄື: ຫັນເອົາພະນັກງານລົງກໍ່ສ້າງຮາກຖານການເມືອງປົກກະຕິ, ການແກ້ໄຂ 4 ວາລະຂອງແຂວງ, ຈັດຕັ້ງຜັນຂະຫຍາຍວຽກງານ 3 ສ້າງ ຕິດພັນກັບການພັດທະນາຊົນນະບົດແກ້ໄຂຄວາມທຸກຍາກ ແລະ ຂະບວນການຮັກຊາດ-ພັດທະນາ, ດໍາເນີນການປັບປຸງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ດໍາເນີນຊີວິດການເມືອງ ແລະ ປັບປຸງປົວແປງພາຍໃນພັກນັບແຕ່ຮາກຖານຂຶ້ນມາ, ແຕ່ລະໜ່ວຍພັກ, ຄະນະພັກຮາກຖານ ແລະ ອົງຄະນະພັກເມືອງ 5 ເມືອງ ໄດ້ສໍາເລັດກອງປະຊຸມໃຫຍ່ຂອງຕົນ ຊຶ່ງໄດ້ເສີມຂະຫຍາຍສິດປະຊາທິປະໄຕພາຍໃນພັກ, ສະມາຊິກພັກ ພະນັກງານໄດ້ເຂົ້າຮ່ວມ ແລະ ຄົ້ນຄວ້າປະກອບຄໍາຄິດເຫັນຢ່າງເລິກເຊິ່ງ. ສະເພາະການຄັດເລືອກບຸກຄະລາກອນ ແລະ ຜູ້ແທນເຂົ້າຮ່ວມກອງປະຊຸມກໍ ໄດ້ພ້ອມກັນຄົ້ນຄວ້າຢ່າງພາວະວິໄສມີປະຊາທິປະໄຕຜ່ານຫຼາຍຂັ້ນຕອນຕາມການຊີ້ນໍາ ຂອງຂັ້ນເທິງ ແລະ ກົດລະບຽບຂອງພັກຢ່າງເຂັ້ມງວດ, ບົດລາຍງານການເມືອງ ແລະ ແຜນພັດທະນາ ເສດຖະກິດ-ສັງຄົມກໍໄດ້ຜ່ານການວິເຄາະວິໄຈ, ໄຈ້ແຍກ ດ້ວຍການດໍາເນີນສໍາມະນາວິທະຍາສາດ, ທາບທາມຄວາມຄິດຄວາມເຫັນຢ່າງເລິກເຊິ່ງ, ກວ້າງຂວາງ ເພື່ອຮັບປະກັນເຮັດໃຫ້ເນື້ອໃນມີຄວາມອຸດົມສົມບູນ, ສອດຄ່ອງກັບຕົວຈິງ ແລະ ສາມາດນໍາໄປຈັດຕັ້ງປະຕິບັດຢ່າງມີໝາກມີຜົນ.
 |
ໃນກອງປະຊຸມ, ຍັງຈະໄດ້ຄົ້ນຄວ້າລົງເລິກຕີລາຄາບັນດາ ຈຸດດີ-ຈຸດອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ແລະ ຈະໄດ້ຮັບຮອງເອົາທິດທາງ, ແຜນພັດທະນາເສດຖະກິດ-ສັງຄົມ 5 ປີໃນຕໍ່ໜ້າ. ພ້ອມກັນນັ້ນ, ຍັງຈະໄດ້ຮັບຟັງການປະກອບຄໍາເຫັນ ຂອງບັນດາຕົວແທນຈາກກົມກອງຕົບແບບ ແລະ ຄອບຄົວຕົວແບບຈຳນວນໜຶ່ງຕື່ມອີກ. ບັນຫາສຳຄັນໃນກອງປະຊຸມຄັ້ງນີ້, ບັນດາຜູ້ແທນກອງປະຊຸມ ຈະໄດ້ໃຊ້ສິດປະຊາທິປະໄຕ ປ່ອນບັດເລືອກເອົາຄະນະບໍລິຫານງານພັກແຂວງຊຸດໃໝ່ ເພື່ອສືບຕໍ່ນໍາພາ-ຊີ້ນໍາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ເປັນຄັນທຸງນໍາໜ້າໃນທຸກວຽກງານ ແລະ ເປັນໃຈກາງໃນການເຕົ້າໂຮມ ຄວາມສາມັກຄີປອງດອງປະຊາຊົນບັນດາເຜົ່າ ເພື່ອພ້ອມກັນເຮັດສຳເລັດໜ້າທີ່ການເມືອງ ໃນໄລຍະໃໝ່, ສ້າງໃຫ້ແຂວງອັດຕະປື ກາຍເປັນແຂວງທີ່ມີການພັດທະນາຢ່າງຮອບດ້ານ. ພ້ອມດຽວກັນ ຍັງຈະໄດ້ປ່ອນບັດຄັດເລືອກເອົາຜູ້ແທນໄປຮ່ວມກອງປະຊຸມໃຫຍ່ ຄັ້ງທີ XII ຂອງພັກ ທີ່ຈະໄຂຂຶ້ນໃນຕໍ່ໜ້າ.
(ຂ່າວ: ພອນປະເສີດ, ພາບ: ມະນີວອນ)
ຄໍາເຫັນ