ອັດຕະປື ຕັ້ງເປົ້າໝາຍຍົກລະດັບຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ ໃຫ້ດີຂຶ້ນເທື່ອລະກ້າວ

ໂດຍ: ວັນໄຊ ຕະວິນຍານ
 ແຕ່ນີ້ ຮອດປີ 2025 ແຂວງອັດຕະປື ຈະສຸມທຶນຮອນພັດທະນາໂຄງລ່າງພື້ນຖານ, ຍົກລະດັບຊີວິດການເປັນຢູ່ຂອງປະຊາຊົນທາງດ້ານວັດຖຸ ແລະ ຈິດໃຈໃຫ້ດີຂຶ້ນກວ່າເກົ່າ. ໂດຍວາງບາງຄາດໝາຍສູ້ຊົນເຮັດໃຫ້ຄອບຄົວທຸກຍາກຫຼຸດລົງ: 3.786 ຄອບຄົວ, ໃນນັ້ນ: ເມືອງໄຊເສດຖາ ໃຫ້ໄດ້ 1.103 ຄອບຄົວ, ເມືອງສາມັກຄີໄຊ 373 ຄອບຄົວ, ເມືອງສະໜາມໄຊ 756 ຄອບຄົວ, ເມືອງຊານໄຊ 519 ຄອບຄົວ ແລະ ເມືອງພູວົງ 1.035 ຄອບຄົວ ບ້ານທຸກຍາກ ຫຼຸດລົງ: 18 ບ້ານ, ໃນນັ້ນ: ເມືອງໄຊເສດຖາ 2 ບ້ານ, ເມືອງສາມັກຄີໄຊ 1 ບ້ານ, ເມືອງສະໜາມໄຊ 5 ບ້ານ, ເມືອງຊານໄຊ 10 ບ້ານ ແລະ ເມືອງພູວົງ 2 ບ້ານ. ສ້າງຄອບຄົວພັດທະນາ ໃຫ້ໄດ້ 7.729 ຄອບຄົວ, ສ້າງບ້ານພັດທະນາ ໃຫ້ໄດ້ 82 ບ້ານ
ສ້າງຄອບຄົວວັດທະນະທຳ ໃຫ້ໄດ້ 6.743 ຄອບຄົວ; ສ້າງບ້ານວັດທະນະທໍາໃໝ່ ໃຫ້ໄດ້ 109 ບ້ານ, ສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ ໃຫ້ໄດ້ 4 ບ້ານ, ສູ້ຊົນຂະຫຍາຍຄື້ນສັນຍານວິທະຍຸ ໃຫ້ກວມ 100% ຂອງພື້ນທີ່ໃນທົ່ວແຂວງ, ແມ່ຍິງເຂົ້າຮ່ວມຄົ້ນຄວ້າ, ເຊື່ອມຊຶມມະຕິກອງປຊຸມໃຫຍ່ຂອງພັກ, ລັດຖະທຳມະນູນ, ກົດໝາຍ, ສົນທິສັນຍາຕ່າງໆທີ່ພົວພັນເຖິງແມ່ຍິງ ແລະ ເດັກ, ແຜນພັດທະນາ, ມູນເຊື້ອປະຫວັດສາດຂອງຊາດ, ຂອງພັກ ກວມເອົາ 80% ຂອງເປົ້າໝາຍ; ຊຸກຍູ້ແມ່ຍິງຜູ້ທຸກຍາກ, ດ້ອຍໂອກາດ ໄດ້ຮັບການຝຶກອົບຮົມວິຊາຊີບ ໃຫ້ໄດ້ 10%, ສືບຕໍ່ສ້າງຕັ້ງໜ່ວຍງານແຮງງານຄວາມປອດໄພ ແລະ ສຸຂະພາບແຂງແຮງໃຫ້ໄດ້ 1 ແຫ່ງ, ລົງກວດກາແຮງງານ ແລະ ເຜີຍແຜ່ກົດໝາຍ, ລະບຽບການຕ່າງໆ ໃຫ້ໄດ້ 40 ແຫ່ງ, ສືບຕໍ່ໃຫ້ຫົວໜ່ວຍແຮງງານ ສ້າງ ແລະ ປັບປຸງລະບຽບພາຍໃນ ໃຫ້ໄດ້ 3 ແຫ່ງ, ຊຸກຍູ້ໃຫ້ຫົວໜ່ວຍແຮງງານເຮັດສັນຍາແຮງງານ ໃຫ້ໄດ້ 3 ແຫ່ງ, ສືບຕໍ່ແກ້ໄຂຂໍ້ຂັດແຍ່ງແຮງງານທັງໝົດທີ່ໄດ້ຮັບການຮ້ອງຮຽນໃຫ້ໄດ້ຮັບການໄກ່ເກ່ຍ 80%, ຊຸກຍູ້ຫົວໜ່ວຍແຮງງານໃຫ້ຜູ້ອອກແຮງງານ ໄດ້ຮັບການກວດກາສຸຂະພາບປະຈໍາປີ ໃຫ້ໄດ້ 1 ແຫ່ງ. ຂະຫຍາຍອັດຕາປົກຄຸມປະກັນສັງຄົມພາກວິສາຫະກິດ ໃຫ້ໄດ້ 50 ຄົນ, ປະຕິບັດນະໂຍບາຍເງິນປ່ຽນແທນໂກຕ້າລົດໃຫ້ໄດ້ 15 ທ່ານ, ສືບຕໍ່ຈັດຕັ້ງປະຕິບັດນະໂຍບາຍອຸດໜູນເສຍສະຫຼະຊີວິດປາງສົງຄາມ ໃຫ້ໄດ້ 100 ທ່ານ, ສືບຕໍ່ຈັດຕັ້ງປະຕິບັດນະໂຍບາຍອຸດໜູນເທື່ອດຽວຜູ້ຍັງມີຊີວິດ ໃຫ້ໄດ້ 150 ທ່ານ, ນະໂຍບາຍເງິນສົມທົບປຸກສ້າງສ້ອມແປງເຮືອນ 15 ທ່ານ ແລະ ສືບຕໍ່ຈັດຕັ້ງປະຕິບັດຂໍກິນເງິນເສຍອົງຄະຄືນໃໝ່ ໃຫ້ໄດ້ 5 ທ່ານ, ປຸກລະດົມການບໍລິຈາກເລືອດແບບສະໝັກໃຈ ໃຫ້ໄດ້ 1.850 ຖົງ, ກວດກູ້ລູກລະເບີດບໍ່ທັນແຕກອອກຈາກພື້ນທີ່ທໍາການຜະລິດ ແລະ ເຂດຊຸມຊົນ ໃຫ້ໄດ້ 1.086 ເຮັກຕາ ແລະ ຫຼຸດຜ່ອນຜູ້ຮັບເຄາະຮ້າຍຈາກລູກລະເບີດບໍ່ທັນແຕກ ໃຫ້ຕໍ່າກວ່າ 3 ຄົນ. ວຽກຈຸດສຸມແຕ່ນີ້ຫາ 2025 ແຂວງຈະສຸມໃສ່ພັດທະນາພື້ນຖານໂຄງລ່າງ ເຂດຈຸດສຸມຂອງສູນກາງ ແລະ ແຂວງ, ເຂດຈັດສັນພູມລຳເນົ່າ, ສະໜອງເຕັກນິກ, ແນວພັນພືດ ແລະ ທຶນ, ປັບປຸງວຽກງານຖະແຫຼງຂ່າວ-ສື່ມວນຊົນ ໃຫ້ທັນສະໄໝ, ວ່ອງໄວ, ສໍາຫຼວດ, ຂຶ້ນທະບຽນສະຖານບູຮານເປັນມໍລະດົກທ້ອງຖິ່ນ, ຊຸກຍູ້ສົ່ງເສີມດ້ານວິຊາການຂອງຂະແໜງວັດທະນະທໍາ, ການສ້າງບ້ານວັດທະນະທໍາ ແລະ ຄອບຄົວວັດທະນະທໍາ, ສ້າງເງື່ອນໄຂໃຫ້ແມ່ຍິງຜູ້ທຸກຍາກ, ດ້ອຍໂອກາດ ໄດ້ຮັບການຝືກອົບຮົມວິຊາຊີບ, ສ້າງເງື່ອນໄຂ ແລະ ສະພາບແວດລ້ອມທີ່ດີ ເປັນຕົ້ນແມ່ນການມີລະບຽບການນຳໃຊ້ແຮງງານ, ການມີສັນຍາແຮງງານ, ການໄດ້ຮັບຄ່າແຮງງານ ແລະ ສະຫວັດດີການແຮງງານ ທີ່ເໝາະສົມ, ຄວາມປອດໄພສະຖານທີ່ເຮັດວຽກ, ຜູ້ອອກແຮງງານມີສຸຂະພາບທີ່ດີ ເພື່ອເປັນແຮງງານຈູງໃຈ ໃຫ້ຜູ້ອອກແຮງງານເຂົ້າສູ່ຕະຫຼາດແຮງງານໃນລະບົບຫຼາຍຂຶ້ນ. ໂຄສະນາເຜີຍແຜ່ກົດ                           ໝາຍວ່າດ້ວຍການປະກັນສັງຄົມ; ປະຊາສຳພັນ ແລະ ສ້າງສື່ໂຄສະນາ ເພື່ອໃຫ້ສັງຄົມມີຄວາມຮັບຮູ້ ແລະ ເຂົ້າໃຈວຽກງານປະກັນສັງຄົມຢ່າງກວ້າງຂວາງ ໂດຍຈະສຸມໃສ່ກຸ່ມເປົ້າໝາຍຜູ້ປະກອບອາຊີບສ່ວນບຸກຄົນ ແລະ ຜູ້ສະໝັກໃຈທົ່ວໄປ. ປະຕິບັດນະໂຍບາຍສະແດງຄວາມກະຕັນຍູຮູ້ບຸນຄຸນຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດການປະຕິວັດຊາດປະຊາທິປະໄຕ ຕາມກຸ່ມເປົ້າໝາຍຕ່າງໆ ໂດຍສະເພາເປົ້າໝາຍບຸລິມະສິດໃຫ້ສຳເລັດໂຄສະນາສຶກສາອົບຮົມໃຫ້ຊຸມຊົນ ຮັບຮູ້-ເຂົ້າໃຈຄວາມສ່ຽງຈາກລະເບີດບໍ່ທັນແຕກ ຢ່າງກວ້າງຂວາງ ແລະ ໃຫ້ການຊ່ວຍເຫຼືອຜູ້ຖືກເຄາະຮ້າຍໃຫ້ໄດ້ຕາມຄາດໝາຍທີ່ກຳນົດໄວ້.
ແຂວງຈະສຸມທຶນຮ່ອນປະຕິບັດໂຄງການບຸລິມະສິດພັດທະນາພື້ນຖານໂຄງລ່າງຢູ່ເຂດຊົນນະບົດ ແລະ ນໍາໃຊ້ບ້ວງທຶນພັດທະນາຊົນນະບົດ ແລະ ລຶບລ້າງຄວາມທຸກຍາກ 8 ໂຄງການ, ໂຄງການຈັດສັນພູມລຳເນົາ-ບ່ອນທຳມາຫາກິນໃຫ້ປະຊາຊົນ 5 ໂຄງການ, ໂຄງການຍົກລະດັບຄື້ນສັນຍານວິທະຍຸຂອງແຂວງ ຈາກ 2 ກິໂລວັດ ເປັນ 5 ກິໂລວັດ, ໂຄງການຕາມບັນຊີຮຽກການລົງທຶນຂອງຂະແໜງ ຖວທ,ໂຄງການເກັບກູ້ລະເບີດບໍ່ທັນແຕກ UXO ແລະ NPA ແລະ ໂຄງການ ສົ່ງເສີມບົດບາດຍິງ-ຊາຍ ແລະ ພັດທະນາແມ່ຍິງ.