ອັດຕະປືປັບປຸງພື້ນຖານໂຄງລ່າງ ແລະ ການບໍລິການຕ່າງໆທີ່ຈໍາເປັນໃຫ້ປະຊາຊົນ

ໂດຍ: ວັນໄຊ ຕະວິນຍານ
ໂດຍປະຕິບັດແຜນວຽກຈຸດສຸມທີ່ກໍານົດໄວ້ໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ເພື່ອຫຼຸດຜ່ອນຄວາມແຕກໂຕນ ລະຫວ່າງຕົວເມືອງ ແລະ ຊົນນະບົດ, ການເຂົ້າເຖິງພື້ນຖານໂຄງລ່າງ ແລະ ການບໍລິການຕ່າງໆທີ່ຈຳເປັນຢ່າງທົ່ວເຖິງ.
 ທ່ານ ເລັດ ໄຊຍະພອນ ເຈົ້າແຂວງອັດຕະປືກ່າວວ່າ: ໃນໄລຍະ (2020-2023) ແຂວງອັດຕະປືໄດ້ສຸມໃສ່ກໍ່ສ້າງ ແລະ ປັບປຸງພື້ນຖານໂຄງລ່າງ ໃນບ່ອນທີ່ຈຳເປັນ ເຂດຊົນນະບົດຫ່າງໄກສອກຫຼີກ ເຮັດໃຫ້ຈຳນວນບ້ານມີເສັ້ນທາງເຂົ້າເຖິງ 141 ບ້ານ ເທົ່າກັບ 100%, ບ້ານມີໄຟຟ້າຊົມໃຊ້ 141 ບ້ານ ເທົ່າກັບ 100%, ຄົວເຮືອນມີໄຟຟ້າຊົມໃຊ້ 29.795 ຄົວເຮືອນ ເທົ່າກັບ 93% ຂອງຄົວເຮືອນທັງໝົດ (ແຜນການ 98%), ການໃຫ້ບໍລິການໂທລະສັບ ມີ 163.872 ເລກໝາຍກວມເອົາ 98% ຂອງຈໍານວນປະຊາກອນ, ການໃຫ້ບໍລິການອິນເຕີເນັດ ມີ 129.724 ເລກໝາຍ ກວມເອົາ 78% ຂອງປະຊາກອນ, ມາຮອດປັດຈຸບັນ ລະບົບໂທລະຄົມ ແລະ ການສື່ສານ ກວມເອົາ 140 ບ້ານ ເທົ່າກັບ 99% (ຍັງ 1 ບ້ານຄື: ບ້ານພູຍາງ ບໍ່ທັນມີສັນຍານ) ແຂວງໄດ້ລົງຕິດຕາມ, ກວດກາບັນດາໂຄງການເຂື່ອນໄຟຟ້ານໍ້າຕົກໃນທົ່ວແຂວງ ຕາມພາລະບົດບາດຂອງທ້ອງຖິ່ນ ແລະ ຕາມການມອບໝາຍຂອງກະຊວງພະລັງງານ ແລະ ບໍ່ແຮ່ ມີທັງໝົດ 31 ໂຄງການ; ລວມກໍາລັງຕິດຕັ້ງ 1.888,46 ເມກາວັດ, ກຳລັງການຜະລິດ 7.602,48 ກິໂລວັດໂມງ/ປີ, ໃນນີ້: ດຳເນີນການຜະລິດແລ້ວ 9 ໂຄງການ ເຊັ່ນ: ເຂື່ອນໄຟຟ້າເຊກະໝານ 01,  ເຂື່ອນໄຟຟ້າເຊກະໝານ-ຊານໄຊ, ເຂື່ອນໄຟຟ້ານ້ຳກົງ 02, ເຂື່ອນໄຟຟ້າຫ້ວຍເຫາະ, ເຂື່ອນໄຟຟ້າເຊປຽນ-ເຊນ້ຳນ້ອຍ, ເຂື່ອນໄຟຟ້າເຊນ້ຳນ້ອຍ 01, ເຂື່ອນໄຟຟ້າຫ້ວຍສະໝອງ, ເຂື່ອນໄຟຟ້ານ້ຳກົງ 01 ແລະເຂື່ອນໄຟຟ້ານ້ຳກົງ 03. ສຳລັບເຂື່ອນໄຟຟ້າຫ້ວຍກະອວນ ມີຄວາມຄືບໜ້າ 80,22% ແລະ ເຂື່ອນໄຟຟ້າເຊກອງຕອນລຸ່ມ ເອ ມີຄວາມຄືບໜ້າ 40%. ກວດກາ ການຈັດຕັ້ງປະຕິບັດໂຄງການລົງທຶນຂອງລັດ ບ້ວງພັດທະນາຊົນນະບົດ ແລະ ບ້ວງຈັດສັນພູມລໍາເນົາ ຈຳນວນ 13 ໂຄງການ ມູນຄ່າ 70.542,82 ລ້ານກີບ, ທຶນອະນຸມັດໃນປີ 2.828 ລ້ານກີບ, ໃນນີ້: ໂຄງການສືບຕໍ່ ມີ 5 ໂຄງການ ມູນຄ່າ 27.869,45 ລ້ານກີບ, ທຶນອະນຸມັດໃນປີ 750 ລ້ານກີບ; ໂຄງການຊໍາລະໜີ້ສິນ ມີ 8 ໂຄງການ ມູນຄ່າ 33.071,73 ລ້ານກີບ, ທຶນອະນຸມັດໃນປີ 1.718 ລ້ານກີບ; ໂຄງການສະເໜີໃໝ່ ມີ 3 ໂຄງການ ມູນຄ່າ 9.601,64 ລ້ານກີບ, ທຶນອະນຸມັດໃນປີ 360 ລ້ານກີບ.