 |
ການເລືອກຕັ້ງ ສສຊ ແລະ ສສຂ ເປັນສ່ວນໜຶ່ງໃນການປັບປຸງ, ບູລະນະກົງຈັກການຈັດຕັ້ງ ແລະ ບຸກຄະລາກອນ ໃນລະບົບການເມືອງ ຢູ່ຂັ້ນສູນກາງ ແລະ ຂັ້ນທ້ອງຖິ່ນ ເພື່ອເຮັດໃຫ້ມີຄວາມເຂັ້ມແຂງ, ໜັກແໜ້ນ ສາມາດປະຕິບັດໜ້າທີ່ການເມືອງໃນໄລຍະໃໝ່ ຢ່າງມີປະສິດທິພາບ ແລະ ປະສິດທິຜົນ. ສະນັ້ນ ການເລືອກຕັ້ງ ແມ່ນໜ້າທີ່ການເມືອງ, ເປັນຄວາມຮັບຜິດຊອບຂອງພັກ, ລັດ ແລະ ທຸກພາກສ່ວນ ທັງສູນກາງ ຮອດທ້ອງຖິ່ນ ເພື່ອປະກອບສ່ວນເຂົ້າໃນການກະກຽມ ແລະ ດຳເນີນການເລືອກຕັ້ງ ພ້ອມທັງປຸກລະດົມປະຊາຊົນລາວບັນດາເຜົ່າເຂົ້າຮ່ວມ ໃຫ້ເປັນຂະບວນຟົດຟື້ນ ຖືເອົາການເລືອກຕັ້ງເປັນຄືປາງບຸນໃຫຍ່ຂອງຊາດ ດຳເນີນໄປດ້ວຍບັນຍາກາດເບີກບານມ່ວນຊື່ນ ຮັບປະກັນໄດ້ 4 ຄາດໝາຍ: ເຂົ້າຮ່ວມການປ່ອນບັດຢ່າງຄົບຖ້ວນ, ປ່ອນບັດຖືກຕາມລະບຽບ, ມີຄວາມໂປ່ງໃສ ແລະ ຮັບປະກັນຄວາມສະຫງົບ.
 |
ໃນການລົງໂຄສະນາຫາສຽງຄັ້ງນີ້, ຜູ້ສະໜັກຮັບເລືອກຕັ້ງ ໄດ້ສະເໜີຊື່, ແນະນຳຕົນເອງ ແລະ ປະຫວັດການເຄື່ອນໄຫວຂອງຕົນໂດຍຫຍໍ້ ເພື່ອໃຫ້ປະຊາຊົນໄດ້ຮັບຮູ້ ແລະ ທຳຄວາມເຂົ້າໃຈ ຕາມລຳດັບຄື: ນໍ້າເບີ 1 ທ່ານ ມອນໄຊ ລາວມົວຊົ່ງ ກຳມະການສູນກາງພັກ ຮອງປະທານສູນກາງແນວລາວສ້າງຊາດ, ນໍ້າເບີ 3 ທ່ານ ນາງ ຄຳສີ ສິດທິວໍລະດາ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ນໍ້າເບີ 7 ທ່ານ ຄຳເພັດ ດວງມາລາ ກຳມະການພັກແຂວງ ຮອງປະທານຄະນະກວດກາພັກ ອົງການກວດກາລັດ, ນໍ້າເບີ 8 ທ່ານ ນິກອນ ນາມມະໄຊ ຮອງຫົວໜ້າອົງການໄອຍະການປະຊາຊົນແຂວງ, ນໍ້າເບີ 9 ທ່ານ ດົວຊົ່ງ ເລຍໂກ້ ຫົວໜ້າພະແນກວັດທະນະທຳ ແລະ ການທ່ອງທ່ຽວແຂວງ ຊຶ່ງແຕ່ລະທ່ານກໍ່ລ້ວນແລ້ວແຕ່ມີຄວາມຮູ້, ຄວາມສາມາດ, ມີມາດຖານ ແລະ ເງືອນໄຂຄົບຖ້ວນ. ພ້ອມດຽວກັນນັ້ນ ຜູ້ສະໜັກຮັບເລືອກຕັ້ງ ໄດ້ຝາກເຖິງປະຊາຊົນບັນດາເຜົ່າ, ພົນລະເມືອງລາວທຸກຄົນ ໂດຍບໍ່ຈຳແນກເພດ, ເຜົ່າ, ຖານະທາງດ້ານເສດຖະກິດ-ສັງຄົມ, ຄວາມເຊື່ອຖື, ສາສະໜາ, ທີ່ຕັ້ງພູມລຳເນົາ ລ້ວນແຕ່ມີສິດປ່ອນບັດເລືອກຕັ້ງ ນັບແຕ່ອາຍຸ 18 ປີຂຶ້ນໄປ ໂດຍມີມາດຕະຖານຄົບຖ້ວນຕາມກົດໝາຍ. ພ້ອມນັ້ນ ໃນວັນດຽວກັນນີ້, ຜູ້ແທນສະໝັກຮັບເລືອກຕັ້ງ 5 ທ່ານ ໄດ້ລົງເຄື່ອນໄຫວໂຄສະນາຫາສຽງ ພົບປະພະນັກງານ, ກົມກອງ ຢູ່ທີ່ກອງບັນຊາການທະຫານເມືອງຕື່ມອີກ. ສະນັ້ນ ຈຶ່ງຂໍເຊີນຊວນປະຊາຊົນລາວບັນດາເຜົ່າ ພ້ອມຈິດພ້ອມໃຈໄປປ່ອນບັດເລືອກຕັ້ງໃນຄັ້ງວັນທີ 22 ກຸມພາ 2026 ທີ່ຈະມາເຖິງນີ້.
(ຂ່າວ: ສີລິພອນ ສົງຄຳ)
ຄໍາເຫັນ