ບາງຜົນສຳເລັດຂອງກອງເລຂາຄະນະສະພາກິດແກ້ໄຂບັນຫາເຄັ່ງຮ້ອນ

ທ່ານ ອາລຸນໄຊ ສູນນະລາດ ລັດຖະມົນຕີ ຫົວໜ້າຫ້ອງ ວ່າການສຳນັກງານນາຍົກລັດຖະມົນຕີ(ຫສນຍ)ໄດ້ໃຫ້ສຳພາດຕໍ່ສື່ມວນຊົນ ໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ II ປີ 2023 ວ່າ:ໄລຍະກາງສະໄໝຫ້ອງວ່າການສຳນັກງານນາຍົກລັດຖະມົນຕີມີຜົນສຳເລັດຫຼາຍດ້ານສາມາດຕີລາຄາໄດ້ວ່າ, ມາຮອດປັດຈຸບັນເພື່ອກະກຽມໃຫ້ແກ່ກອງປະຊຸມໃຫຍ່ສາມຂັ້ນຊຶ່ງສະມາຊິກພັກ ແລະ ພະນັກງານແມ່ນມີຄວາມສາມະຄີເປັນເອກະພາບສູງ,ຄະນະພັກ, ຄະນະນຳ ຫສນຍໄດ້ນຳພາເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດຂອງພັກຄັ້ງທີ XI, ມະຕິ, ຄຳສັ່ງຕ່າງໆ ຊຶ່ງໄດ້ສ້າງການຫັນປ່ຽນຢ່າງແຂງແຮງ,ເລິກເຊິ່ງ,ຮອບດ້ານໂດຍສະເພາະສ້າງການຫັນປ່ຽນ ດ້ວຍສາມການຫັນປ່ຽນຄື: ການຫັນປ່ຽນທາງດ້ານແນວຄິດຈາກແນວຄິດທີ່ລໍຖ້າຄຳສັ່ງ,ຄອງຄອຍໄດ້ຫັນມາເປັນເຈົ້າຕົນເອງຕາມພາລະບົດບາດ,ສິດ,ໜ້າທີ່,ພາລະບົດບາດຂອງແຕ່ລະສະຫາຍ,ແຕ່ລະພາກສ່ວນ, ຕົວຢ່າງການກະກຽມກອງປະຊຸມລັດຖະບານ ໂດຍບໍ່ໄດ້ມີການແຕ່ງຕັ້ງຄະນະຮັບຜິດຊອບ ໜາຍຄວາມວ່າເປັນຄວາມຮັບຜິດຊອບຂອງກົມໃດແມ່ນກົມນັ້ນຈະເປັນເຈົ້າການຂຶ້ນແຜນ ແລະ ອະນຸມັດຕາມແບບແຜນ,ມືອາຊີບ; ອັນທີສອງແມ່ນການຫັນປ່ຽນຈາກການເຮັດວຽກທີ່ບໍ່ມີແຜນການ,ບໍ່ມີຄາດໝາຍ,ບໍ່ມີການແບ່ງຄວາມຮັບຜິດຊອບທີ່ຊັດເຈນໃຫ້ກາຍເປັນການເຮັດວຽກທີ່ມີແຜນດຳເນິນງານ ແລະ ມີຄາດໝາຍ ແລະ ສາມແມ່ນການຫັນປ່ຽນເຮັດວຽກຫຼາຍຂອດ,ຫຼາຍຂັ້ນ ໃຫ້ຫຼຸດໜ້ອຍຖອຍລົງ ຊຶ່ງໃນເມື່ອກອ່ນມີ 10ກວ່າຂອດຂັ້ນ ແຕ່ມາໃນປັດຈຸບັນ ມີຢູ່ 3ຂັ້ນ,ນອກຈາກນັ້ນ ໄດ້ອອກແບບໃບກິດສຳພັນໃນການປະສານງານ ຊຶ່ງໄດ້ເຮັດທົດລອງມາໄດ້ໄລຍະໜຶ່ງແລ້ວ ໂດຍເອົາໃບກິດສຳພັນກຳນົດເວລາເຮັດໃຫ້ການບໍລິການມີຄວາມວ່ອງໄວຂຶ້ນ ແລະ ຊັດເຈນຂຶ້ນ.
ທ່ານກ່າວຕື່ມວ່າ:ຫ້ອງວ່າການສຳນັກງານນາຍົກລັດຖະມົນຕີ, ນອກຈາກປະຕິບັດບົດບາດເປັນເສນາທີການ ເປັນຜູ້ປະສານງານຮັບໃຊ້ລັດຖະບານແລ້ວ, ພວກເຮົາຕ້ອງໄດ້ເຮັດໜ້າທີ່ເປັນກອງເລຂາໃຫ້ຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ (ຄະນະສະເພາະກິດ 19/ກມສພ) ຊຶ່ງວຽກງານດັ່ງກ່າວນີ້ມີບົດບາດສຳຄັນເພື່ອແກ້ໄຂບັນຫາເສດຖະກິດ,ບັນຫາເຄັ່ງຮ້ອນ, ສະນັ້ນໃນນາມຫົວໜ້າກອງເລຂາຄະນະສະເພາະກິດ 19/ກມສພ ແມ່ນໄດ້ພະຍາຍາມປະຕິບັດຕາມທິດຊີ້ນຳ ແລະ ພາລະບົດບາດຂອງຕົນເອງໄປພ້ອມໆກັນ ຊຶ່ຶງວຽກຫຼັກໆທີ່ພວກເຮົາເຮັດອັນທຳອິດແມ່ນກຳສະພາບລວມກ່ຽວກັບ 4ເປົ້າໝາຍວຽກຄື: ການແກ້ໄຂບັນຫາອັດຕາເງິນເຟີ້; ການຄວບຄຸມອັດຕາແລກປ່ຽນ; ຕິດຕາມການແກ້ໄຂໜີ້ສິນ ແລະ ການຄຸ້ມຄອງລາຄາສິນຄ້າ, ນອກຈາກນັ້ນ ໄດ້ກຳສະພາບການອື່ນໆທີ່ປິ່ນອອ້ມກ່ຽວກັບການແກ້ໄຂບັນຫາເສດຖະກິດ-ສັງຄົມ,ຂຶ້ນແຜນໃນການເຄື່ອນໄຫວໃຫ້ແກ່ຄະນະສະເພາະກິດ 19/ກມສພກຳນົດບັນດາມາດຕະການ, ກຳນົດຄາດໝາຍ ໃນນັ້ນຍັງມີຄາດໝາຍລວມ,ຄາດໝາຍສະເພາະ ເວົ້າລວມແມ່ນເປັນການສ້າງແຜນໃຫ້ຮັດກຸມຂຶ້ນ,ສຸມໃສ່ໃນການສົມທົບ,ຄົ້ນຄວ້າໃນການສ້າງນິຕິກຳຕ່າງໆເພື່ອສົມທົບກັບຂະແໜງການກ່ຽວຂ້ອງແລະທ້ອງຖິ່ນເພື່ອບັງຂັບໃຊ້ໃນການແກ້ໄຂບັນຫາ,ທີ່ສຳຄັນໄດ້ອອກຄຳສັ່ງຈຳນວນໜຶ່ງຂອງ ທ່ານນາຍົກລັດຖະມົນຕີ ກໍຄືຫົວໜ້າຄະນະສະເພາະກິດ 19/ກມສພ,ໂດຍສະເພາະແມ່ນຄຳສັ່ງ ເລກທີ 10 ກຳນົດກ່ຽວກັບການຄຸ້ມຄອງເງິນຕາ; ຄຳສັ່ງ ເລກທີ 11 ຄຸ້ມຄອງເລື່ອງປ່າໄມ້ແລະຄຳສັ່ງເລກທີ 13 ຫັນຄວາມຮັບຜິດຊອບທົ່ວປວງຊົນທັງຊາດ ໜາຍວ່າໄດ້ກຳນົດ ສາມໜ້າທີ່ໃຫຍ່ຂອງທຸກຂະແໜງການ ແລະ ທ້ອງຖິ່ນທີ່ຈະຕ້ອງໄດ້ສຶກສາອົບຮົມນຳພາແນວຄິດ ໃຫ້ປະຊາຊົນລາວບັນດາເຜົ່າໂດຍບໍ່ໃຫ້ອາໃສແຕ່ພາກລັດໃນການແກ້ໄຂບັນຫາເສດຖະກິດ ໂດຍສະເພາະໃນການຄຸ້ມຄອງລາຄາສິນຄ້າ,ອັດຕາເງິນເຟີ້, ບັນຫາດັ່ງກ່າວປະຊາຊົນຕ້ອງເປັນເຈົ້າການຊ່ວຍກັນໃນການແກ້ໄຂບັນຫາຮ່ວມກັນ.
ທ່ານກ່າວໃຫ້ຮູ້ຕື່ມວ່າ:ຜົນຂອງການແກ່ໄຂບັນຫາເສດຖະກິດ, ມາເຖິງປັດຈຸບັນ ຊຶ່ງບາງຕົວເລກໄດ້ຮັບຜົນສຳເລັດເປັນທີ່ໜ້າພໍໃຈອັນພົ້ນເດັ່ນແມ່ນອັດຕາເງິນເຟີ້ຫຼຸດລົງ ຈາກເມື່ອກ່ອນ ຢູ່ໃນລະດັບຫຼາຍກວ່າ 28% ມາຮອດປັດຈຸບັນ ຢູ່ໃນລະດັບ 25%,ນອກຈາກນີ້ການເກັບລາຍຮັບໄດ້ສຸມໃສ່ການຫັນເປັນທັນສະໄໝສາມາດເກັບລາຍຮັບເພີ່ມຂຶ້ນເຮັດໃຫ້ຕົວເລກລາຍຮັບເກີນແຜນເມື່ອທຽບໃສ່ປີ 2022 ແມ່ນເພີ່ມຂຶ້ນ38%, ໃນຂະນະທີ່ການຄວບຄຸມການຂາຍຍົກ-ຂາຍຍ່ອຍໄດ້ມີການຂຶ້ນບັນຊີບໍລິສັດນຳເຂົ້າ-ສົ່ງອອກ ເພາະບັນດາບໍລິສັດດັ່ງກ່າວ ຈໍລະຈອນເງິນຕາຫຼາຍ ສະນັ້ນຈຶ່ງໄດ້ຄຸ້ມຄອງໃຫ້ຖືກຕ້ອງ ຈຶ່ງຈະສາມາດຄຸ້ມຄອງເງິນຕາໄດ້,ມາຮອດປັດຈຸບັນສາມາດມີຄັງແຮເງິນຕາ ແລະ ຈະສູ້ຊົນໃຫ້ມີສາມຄັງແຮຄື: ຄັງແຮເຂົ້າ ເພື່ອແກ້ໄຂໃນກໍລະນີສຸກເສິນ,ຄັງແຮນໍ້າມັນ ເພື່ອສະດວກໃນການນຳໃຊ້ໝູນວຽນ ແລະ ຄັງແຮເງິນຕາ.
(ຂ່າວ-ພາບ:ສຳນານ)