ທ່ານປະທານາທິບໍດີເບຣຊິນໄດ້ລົງນາມໃນຮ່າງກົດໝາຍຈໍາກັດການໃຊ້ໂທລະສັບມືຖືໃນໂຮງຮຽນ ຊຶ່ງເປັນໄປຕາມທ່າອ່ຽງທົ່ວໂລກທີ່ມີການອອກຂໍ້ຈຳກັດທີ່ຄ້າຍຄືກັນນີ້, ໂດຍກົດໝາຍທີ່ຈໍາກັດການນໍາໃຊ້ໂທລະສັບມືຖືໃນໂຮງຮຽນ ຈະມີຜົນຕໍ່ນັກຮຽນຊັ້ນປະຖົມແລະມັດທະຍົມໃນປະເທດ. ໂດຍຈະນຳໃຊ້ຈະໂທລະສັບມືຖືໄດ້ສະເພາະໃນກໍລະນີສຸກເສີນ ແລະ ອັນຕະລາຍ, ໃຊ້ເພື່ອຈຸດປະສົງການສຶກສາ ຫຼືໃນກໍລະນີທີ່ນັກຮຽນມີຄວາມຈຳເປັນຕ້ອງໃຊ້ອຸປະກອນດັ່ງກ່າວ ແລະ ຈະມີຜົນສັກສິດໃນເດືອນກຸມພາຈະມາເຖິງນີ້.
ທ່ານ ຄາມິໂລ ຊານຕານາ ລັດຖະມົນຕີກະຊວງສຶກສາກ່າວວ່າ: ການທີ່ເດັກນ້ອຍເລີ່ມໃຊ້ອິນເຕີເນັດຕັ້ງແຕ່ອາຍຸຍັງນ້ອຍເຮັດໃຫ້ຜູ້ປົກຄອງຍາກທີ່ຈະຕິດຕາມວ່າເດັກນ້ອຍເຮັດຫຍັງ ແລະການຈໍາກັດການໃຊ້ໂທລະສັບມືຖືໃນໂຮງຮຽນສາມາດຊ່ວຍແກ້ໄຂບັນຫານີ້ໄດ້. ໂດຍລັດຖະບານຫວັງວ່າໂທລະສັບມືຖືຈະຖືກນໍາໄປໃຊ້ໃນຫ້ອງຮຽນເພື່ອຈຸດປະສົງດ້ານການສຶກສາແລະ ຢູ່ພາຍໃຕ້ການຊີ້ນໍາຂອງຄູສອນເທົ່ານັ້ນ ເຊັ່ນດຽວກັບໃນຫຼາຍປະເທດ.
ກົດໝາຍສະບັບນີ້ໄດ້ຮັບການສະໜັບສະໜູນຢ່າງກວ້າງຂວາງ ຈາກທັງຝ່າຍພັນທະມິດຂອງທ່ານປະທານາທິບໍດີແລະຝ່າຍຄ້ານ,ນອກຈາກນີ້ຜູ້ປົກຄອງ ແລະ ນັກຮຽນຈຳນວນຫຼາຍກໍເຫັນດີກັບການຈຳກັດການໃຊ້ງານນີ້. ຜົນການສໍາຫຼວດໃນເດືອນຕຸລາໂດຍ Datafolha ລະບຸວ່າ: ເກືອບສອງສ່ວນສາມຂອງຜູ້ຕອບແບບສອບຖາມສະໜັບສະໜູນການຫ້າມໃຊ້ໂທລະສັບມືຖືໃນໂຮງຮຽນແລະຫຼາຍກວ່າສາມສ່ວນສີ່ເຊື່ອວ່າອຸປະກອນດັ່ງກ່າວມີຜົນເສຍຫຼາຍກວ່າຜົນດີຕໍ່ເດັກນ້ອຍ.
ອີງຕາມການສໍາຫຼວດທີ່ເຜີຍແຜ່ໃນເດືອນສິງຫາ ຜ່ານມາ ໂດຍຄະນະກໍາມະການຄຸ້ມຄອງອິນເຕີເນັດຂອງເບຣຊິນພົບວ່າ: ໃນປີ 2023, ໂຮງຮຽນໃນເບຣຊິນ ປະມານສອງສ່ວນສາມ ມີການຈໍາກັດການໃຊ້ໂທລະສັບມືຖື, ຂະນະທີ່ 28% ຫ້າມນຳໃຊ້ທັງໝົດ. ລັດ Rio de Janeiro, Maranhão ແລະ Goiasໄດ້ຜ່ານກົດໝາຍທ້ອງຖິ່ນທີ່ຫ້າມໂທລະສັບມືຖືໃນໂຮງຮຽນແລ້ວ, ແຕ່ເຈົ້າໜ້າທີ່ກໍປະສົບກັບບັນຫາໃນການປະຕິບັດກົດໝາຍ. ປັດຈຸບັນ, ລັດ São Paulo ພວມປຶກສາຫາລືກ່ຽວກັບການຫ້າມໃຊ້ໂທລະສັບມືຖືໃນໂຮງຮຽນລັດ ແລະ ເອກະຊົນ.
ຕາມບົດລາຍງານຂອງ UNESCO ໃນເດືອນກັນຍາສະແດງໃຫ້ເຫັນວ່າ, ໜຶ່ງໃນສີ່ປະເທດທົ່ວໂລກມີຂໍ້ຈຳກັດໃນການໃຊ້ໂທລະສັບມືຖືໃນໂຮງຮຽນ.
ຄໍາເຫັນ