ໂດຍ: ວັນເພັງ
ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວໄດ້ກ່າວຕໍ່ກອງປະຊຸມແລກປ່ຽນວຽກງານການທ່ອງທ່ຽວແຂວງບໍ່ແກ້ວເມືອບໍ່ດົນມານີ້ວ່າ: ແຂວງບໍ່ແກ້ວເປັນແຂວງໜຶ່ງຕັ້ງຢູ່ທິດຕາເວັນຕົກສ່ຽງເໜືອຂອງ ສປປ ລາວ ມີຊາຍແດນຕິດກັບສປ ຈີນ, ໄທ ແລະມຽນມາ. ແຂວງບໍ່ແກ້ວມີພົນລະເມືອງທັງໝົດ 210.000 ກວ່າຄົນ, ລວມມີ 13 ເຜົ່າ. ໃນນັ້ນ, ມີເຂດເສດຖະກິດສາມຫຼ່ຽມຄຳທີ່ເປັນເຂດການລົງທຶນຂະໜາດໃຫຍ່ຂອງນັກທຸລະກິດຈີນ, ປັດຈຸບັນມີຜູ້ທີ່ເຂົ້າມາເຮັດວຽກ ແລະ ອອກແຮງງານຢູ່ໃນເຂດດັ່ງກ່າວມີ 60.000 ກ່ວາຄົນ ລວມມີຫຼາຍສັນຊາດ. ໃນນັ້ນ, ແຂວງບໍ່ແກ້ວມີທ່າແຮງຫຼາຍຢ່າງໂດຍສະເພາະມີ 7 ຍຸດທະສາດໃນການພັດທະນາເສດຖະກິດຂອງແຂວງເປັນຕົ້ນ ສຸມໃສ່ໃນການຮັກສາຄວາມສະຫງົບ-ຄວາມເປັນລະບຽບຮຽບຮ້ອຍໃຫ້ມີຄວາມໜັກແໜ້ນ ເພື່ອເປັນເງື່ອນໄຂເປັນສິ່ງເອື້ອອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ; ສຸມໃສ່ໃນການພັດທະນາຄົມມະນາຄົມຂົນສົ່ງທີ່ມີຄຸນນະພາບ ເພື່ອເຊື່ອມຕໍ່ແຂວງບໍ່ແກ້ວ ກັບບັນດາແຂວງພາກເໜືອຂອງລາວ ແລະປະເທດໃກ້ຄຽງອະນຸພາກພື້ນ; ສຸມໃສ່ໃນການພັດທະນາການທ່ອງທ່ຽວທີ່ຍືນຍົງໃຫ້ມີການເຊື່ອມຕໍ່ກັບບັນດາ ແຂວງພາກເໜືອຂອງລາວ ແລະປະເທດໃກ້ຄຽງ; ສຸມໃສ່ຜະລິດສິນຄ້າກະສິກໍາທີ່ສະອາດ, ປອດສານພິດ ເພື່ອສະໜອງໃຫ້ແກ່ການຊົມໃຊ້ພາຍໃນ ແລະເປັນສິນຄ້າສົ່ງອອກໄປຕ່າງປະເທດ; ສຸມໃສ່ໃນການພັດທະນາພະລັງງານໄຟຟ້າ ເພື່ອສະໜອງໃຫ້ແກ່ການຊົມໃຊ້ພາຍໃນ ແລະຂາອອກ; ສຸມໃສ່ໃນການພັດທະນາຊັບພະຍາກອນມະນຸດທີ່ມີຄຸນະພາບ ເພື່ອສະໜອງໃຫ້ແກ່ການພັດທະນາເສດຖະກິດ-ສັງຄົມ. ພ້ອມນັ້ນ, ຍັງຖືເອົາເຂດເສດຖະກິດພິເສດສາມຫຼ່ຽມຄຳ ເປັນແມ່ແຮງເພື່ອດຶງເສດຖະກິດຂອງແຂວງບໍ່ແກ້ວໃຫ້ມີການຂະຫຍາຍຕົວ ໂດຍໄດ້ກຳນົດເອົາ 4 ຂະແໜງການທີ່ເປັນຂະແໜງເສດຖະກິດລາຍໄດ້ເຊັ່ນ: ຂະແໜງຂົນສົ່ງ, ກະສິກຳ, ທ່ອງທ່ຽວ ແລະ ການຄ້າ, ໃນການຈັດຕັ້ງປະຕິບັດຍຸດທະສາດ ແລະຂະແໜງເສດຖະກິດດັ່ງກ່າວ ກໍມີຫຼາຍໂຄງການ, ຫຼາຍກິດຈະກຳ, ມີບັນຊີໃນດ້ານການລົງທືນເປັນຢ່າງດີ.
ສຳລັບປີທ່ອງທ່ຽວລາວ 2024 ແຂວງບໍ່ແຂວງກໍມີສະຖານທີ່ທ່ອງທ່ຽວຫຼາຍແຫ່ງທີ່ໃຫ້ນັກທ່ອງທ່ຽວທັງພາຍໃນ ແລະຕ່າງປະເທດ ໄດ້ເຂົ້າໄປທ່ຽວຊົມມີທັງແຫຼ່ງທ່ອງທ່ຽວທຳມະຊາດ, ປະຫວັດສາດ ແລະວັດທະນະທຳເປັນຕົ້ນແຫຼ່ງທ່ອງທ່ຽວໃນເຂດພິເສດສາມຫຼ່ຽມຄຳແມ່ນມີລັກສະນະຄົບວົງຈອນສາມມາດເລືອກເຂົ້າທ່ຽວຊົມໄດ້ເຊັ່ນ: ຕະຫຼາດວັດທະນະທຳນານາຊາດ ຫຼືຕະຫຼາດນໍ້າ, ສະຖານທີ່ທ່ອງທ່ຽວດອນຊາວ, ສະໜາມບິນສາກົນບໍ່ແກ້ວ, ສວນທະເລດອກໄມ້, ເຂດກະສິກໍາ-ລ້ຽງສັດ, ສະໜາມກັອຟສາກົນພູກິ່ວລົມ ແລະ ສະຖານທີ່ອື່ນໆ ພ້ອມນັ້ນ, ຍັງມີແຜນການຂະຫຍາຍແຫຼ່ງທ່ອງທ່ຽວເປັນຕົ້ນສະຖານທີ່ທ່ອງທ່ຽວເມືອງເກົ່າສຸວັນນະໂຄມຄຳ, ບໍ່ນໍ້າຮ້ອນ ແລະ ແຫ່ງອື່ນໆ ພ້ອມຈະພັດທະນາໃຫ້ມີຫຼາຍກິດຈະກໍາທີ່ຈະເກີດຂຶ້ນຢູ່ໃນເຂດດັ່ງກ່າວ.
ຄໍາເຫັນ