ບໍລິຄໍາໄຊ ສ້າງຄວາມເຂັ້ມແຂງໃຫ້ວຽກງານ ປກຊ-ປກສ

ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ໄດ້ລາຍງານຕໍ່ກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IV ກາງສະໄໝ ວ່າ: ໃນໄລຍະ 2 ປີເຄິ່ງຜ່ານມາ (2020-2023) ແຂວງໄດ້ເອົາໃຈໃສ່ເປັນພິເສດຕໍ່ວຽກງານປ້ອງກັນຊາດ (ປກຊ) - ປ້ອງກັນຄວາມສະຫງົບ (ປກສ) ໄດ້ສຸມໃສ່ຈັດຕັ້ງ 4 ໜ້າທີ່ໃຫຍ່ 26 ແຜນງານ ຂອງກະຊວງປ້ອງກັນປະເທດວາງອອກຢ່າງເຂັ້ມງວດ. ສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ 27 ບ້ານ, ມີ 319 ໜ່ວຍ, ມີ 4.862 ຄອບຄົວ, ມີພົນລະເມືອງທັງໝົດ 27.348 ຄົນ ຍິງ 13.494 ຄົນ, ໄດ້ຢັ້ງຢືນເປັນຄອບຄົວປ້ອງກັນຊາດເຂັ້ມແຂງ 4.365 ຄອບຄົວ, ຄອບຄົວບໍ່ທັນຮັບຮອງ 497 ເທົ່າກັບ 89,77%, ໄດ້ນໍາໃຊ້ກໍາລັງອອກເຄື່ອນໄຫວນ້ອຍ ແລະ ໃຫຍ່ 313 ຄັ້ງ ຈໍານວນ 3.467 ເທື່ອຄົນ ເພື່ອຄວບຄຸມພື້ນທີ່ບໍລິເວນທີ່ມີຄວາມສ່ຽງ, ອັນພົ້ນເດັ່ນແມ່ນໄດ້ຕິດຕາມກຳແໜ້ນ ແລະ ຄວບຄຸມເປົ້າໝາຍບໍ່ໃຫ້ເຄື່ອນໄຫວກໍ່ຄວາມບໍ່ສະຫງົບ. ໄດ້ປັບປຸງການຈັດຕັ້ງກໍາລັງກອງຫຼອນໃຫ້ມີຄວາມໜັກແໜ້ນເຂັ້ມແຂງ ເຮັດໃຫ້ຂອບເຂດຮັບຜິດຊອບມີຄວາມສະຫງົບ; ໄດ້ເປີດຊຸດອົບຮົມປະຈໍາປີໃຫ້ກອງຫຼອນໄດ້ 4 ບ້ານ, ຈໍານວນພົນເຂົ້າຮ່ວມ 187 ຄົນ, ສະເລ່ຍຜົນໄດ້ຮັບ 85%; ໄດ້ສ້າງບ້ານປ້ອມໝັ້ນສູ້ຮົບໄດ້ 3 ບ້ານ, ຈໍານວນພົນເຂົ້າຮ່ວມ 335 ຄົນ ຍິງ 158 ຄົນ, ມີກໍາລັງ ປກສ ບ້ານ 45 ຄົນ, ສະເລ່ຍຜົນໄດ້ຮັບ 79%. ເຄື່ອນໄຫວກວດກາຕິດຕາມສະກັດກັ້ນກັກຕົວກຸ່ມຄົນບໍ່ດີ ແລະ ຈັບ ຢຶດສິນຄ້າເຖື່ອນໄດ້ຈໍານວນໜຶ່ງ, ເຮັດໃຫ້ຂອບເຂດຊາຍແດນລະຫ່ວາງແຂວງ ແລະ ປະເທດມີຄວາມສະຫງົບເປັນລະບຽບຮຽບຮ້ອຍ. ນອກຈາກນີ້ພົວພັນແຮກສ່ຽວກັບກົມກອງເພື່ອນມິດຍຸດທະສາດໄດ້ 4 ກົມກອງ, ເຂົ້າຮ່ວມກວດກາ ຫຼັກໝາຍຊາຍແດນລະຫ່ວາງແຂວງບໍລິຄຳໄຊ-ແຂວງຮ່າຕິ່ງ-ແຂວງເງະອານ ສສ ຫວຽດນາມ ໄດ້ 30 ຄັ້ງ, ມີ 360 ເທື່ອຄົນ; ກວດກາລາດຕະເວນຕາມບໍລິເວນຊາຍແດນລາວ-ຫວຽດນາມ, ລາວ-ໄທ ໄດ້ 2.616 ຄັ້ງ, ມີ 10.464 ເທື່ອຄົນ.

ສໍາລັບວຽກງານ ປກສ 2 ປີເຄິ່ງຜ່ານມາ, ກອງບັນຊາການ ປກສ ແຂວງໄດ້ຈັດຕັ້ງປະຕິບັດວຽກງານ 4 ຄາດໝາຍ, 4 ແຜນງານໃຫຍ່, 41 ໂຄງການ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢ່າງເຂັ້ມງວດໄດ້ສຸມໃສ່ສະກັດກັ້ນ ແລະ ແກ້ໄຂປະກົດການຫຍໍ້ທໍ້ທາງດ້ານສັງຄົມ ຕາມຄໍາສັ່ງເລກທີ 27/ນຍ, ຄໍາສັ່ງເລກທີ 15/ນຍ, ຄໍາສັ່ງເລກທີ 22/ຄລສພ, ຄໍາສັ່ງເລກທີ 1470/ປກສ ສ້າງເປັນແຜນວຽກ ແລະ ແຕ່ງຕັ້ງໜ່ວຍແກ້ໄຂປະກົດການຫຍໍ້ ທໍ້ໃນສັງຄົມ, ແກ້ໄຂບັນດາເປົ້າໝາຍກໍ່ອາດຊະຍາກໍາຕ່າງໆ, ພ້ອມທັງຍົກສູງຄຸນນະພາບການດໍາເນີນຄະດີຕາມຂະບວນການຍຸຕິທໍາ, ປັບປຸງພະນັກງານສືບສວນ-ສອບສວນໃຫ້ມີປະສິດທິພາບ, ດໍາເນີນຄະດີຢ່າງຖືກຕ້ອງຕາມລະບຽບກົດໝາຍສອດຄ່ອງກັບຫຼັກການວິຊາສະເພາະ ແລະ ຮັບປະກັນຕາມແນວທາງນະໂຍບາຍຂອງພັກ; ໃນໄລຍະຜ່ານມາເຈົ້າໜ້າທີ່ພວກເຮົາໄດ້ດໍາເນີນ ແລະ ແກ້ໄຂຄະດີລວມທັງໝົດ 2.367 ເລື່ອງ ຄື: ດໍາເນີນ ແລະ ແກ້ໄຂຄະດີອາຍາ, ເສດຖະກິດຄ້າມະນຸດ, ຄະດີຢາເສບຕິດ, ອຸບັດເຫດ, ອັກຄີໄຟ ແລະ ອື່ນໆ. ໄດ້ຈັດຕັ້ງປະຕິບັດວຽກງານລົງກໍ່ສ້າງຮາກຖານການເມືອງຈຸດສຸມໃຈກາງຂອງແຂວງ ຕາມມະຕິຂອງກົມການເມືອງສູນກາງພັກ ເລກທີ 025/ກມສພ, ລົງວັນທີ 24 ເມສາ 2017; ແຜນດໍາເນີນງານຂອງກອງບັນຊາການ ປກສ ແຂວງ ເລກທີ 3402/ປກສ.ຂ, ລົງວັນທີ 16 ມິຖຸນາ 2018 ວ່າດ້ວຍການແກ້ໄຂບັນດາໜໍ່ແໜງກໍ່ຄວາມບໍ່ສະຫງົບທີ່ແຂວງໄດ້ກໍານົດ 11 ບ້ານຫຼໍ່ແຫຼມໃນ 4 ເມືອງຄື: ເມືອງບໍລິຄັນ, ປາກກະດິງ, ຄໍາເກີດ ແລະ ວຽງທອງ, ມາຮອດປັດຈຸບັນສາມາດປົດອອກຈາກບ້ານບໍ່ສະຫງົບແລ້ວ 6 ບ້ານ, ຍັງ 5 ບ້ານທີ່ກໍາລັງ ປກຊ-ປກສ ແລະ ພາກສ່ວນທີ່ກ່ຽວຂ້ອງສືບຕໍ່ຕິດຕາມກວດກາ ແລະ ແກ້ໄຂ ເພື່ອໃຫ້ມີຜົນສໍາເລັດຕາມແຜນການທີ່ໄດ້ກໍານົດໄວ້.

ຂ່າວ: ວັນໄຊ ຕະວິນຍານ