ບໍລິຄຳໄຊ ວາງຄາດໝາຍສູ້ຊົນພັດທະນາແຂວງໃຫ້ເຕີບໃຫຍ່ເຂັ້ມແຂງຫຼາຍດ້ານ

ໂດຍ: ພູວັນ
    ເພື່ອສືບຕໍ່ເສີມຂະຫຍາຍມູນເຊື້ອແລະຜົນງານທີ່ຍາດມາໄດ້ນັ້ນພວກເຮົາຕ້ອງຢຶດໝັ້ນແລະເດີນຕາມແນວທາງປ່ຽນແປງໃໝ່ຢ່າງມີຫຼັກການຂອງພັກເຂົ້າສູ່ລວງເລິກ, ສ້າງການຫັນປ່ຽນທີ່ແຂງແຮງເລິກເຊິ່ງ ແລະ ຮອບດ້ານຢ່າງໜັກແໜ້ນ, ຂຸດຄົ້ນແລະນຳໃຊ້ກຳລັງແຮງສັງລວມຂອງແຂວງສົມທົບກຳລັງຂອງຍຸກສະໄໝຈັດຕັ້ງປະຕິບັດໃຫ້ໄດ້ໝາກຜົນໃຫຍ່ຫຼວງກວ່າເກົ່າ;ສືບຕໍ່ຈັດຕັ້ງປະຕິບັດມະຕິ XI ຂອງພັກ,ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ແລະ ມະຕິ VII ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ 5 ຂອງແຂວງບໍລິຄຳໄຊໄລຍະທ້າຍສະໄໝໃຫ້ບັນລຸຕາມຄາດໝາຍທີ່ວາງໄວ້.
ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ໄດ້ລາຍງານໃຫ້ຮູ້ໃນໂອກາດສະເຫຼີມສະຫຼອງວັນສ້າງ
ຕັ້ງແຂວງບໍລິຄໍາໄຊ(ວັນທີ 6 ມີນາ 1984-6 ມີນາ 2024) ຄົບຮອບ40ປີເມື່ອບໍ່ດົນມານີ້ວ່າ:ເພື່ອບັນລຸໄດ້ຕາມຄາດໝາຍທີ່ວາງໄວ້ນັ້ນ:1. ຕັ້ງໜ້າສຶກສາອົບຮົມການເມືອງ-ນໍາພາແນວຄິດພະນັກງານ, ສະມາຊິກພັກແລະປະຊາຊົນບັນດາເຜົ່າໃຫ້ເຊີດຊູນໍ້າໃຈຮັກຊາດເອກະລາດເປັນເຈົ້າຕົນເອງ, ເພິ່ງຕົນເອງ ແລະສ້າງຄວາມເຂັ້ມແຂງດ້ວຍຕົນເອງເພື່ອສ້າງປະເທດຊາດໃຫ້ມັ່ງຄັ່ງ-ເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ຍຸຕິທໍາແລະສີວິໄລ; ສືບຕໍ່ສຸມທຸກກໍາລັງແຮງທົ່ວສັງຄົມພັດທະນາແຂວງບໍລິຄໍາໄຊໃຫ້ມີການຫັນປ່ຽນໃໝ່ທີ່ແຂງແຮງ, ເລິກເຊິ່ງ ແລະ ຮອບດ້ານດ້ວຍບາດກ້າວທີ່ໜັກແໜ້ນ; 2. ກໍາລັງປ້ອງກັນຊາດ(ປກຊ)-ປ້ອງກັນຄວາມສະຫງົບ(ປກສ): ສືບຕໍ່ຈັດຕັ້ງແນວທາງປກຊ-ປກສ ທົ່ວປວງຊົນຮອບດ້ານຂອງພັກ, ປະຕິບັດ 4 ໜ້າທີ່ໃຫຍ່, 26 ແຜນງານ, 4 ແຜນງານ, 41 ໂຄງການຢ່າງເປັນຮູບປະທໍາ, ເປັນເຈົ້າການຮ່ວມກັບພາກສ່ວນທີ່ກ່ຽວຂ້ອງຂອງແຂວງ-ເມືອງສືບຕໍ່ຈັດຕັ້ງຜັນຂະຫຍາຍວຽກຍຸດທະສາດ ແລະ ຈຸດສຸມຂອງແຂວງ, ການແກ້ໄຂ 4 ເຖື່ອນປະຕິບັດບັນດາ 9 ຫົວຂໍ້ວິທະຍາສາດ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ໄດ້ຮັບການປະຕິບັດຢ່າງມີໝາກຜົນ, ຮັບປະກັນເຮັດໃຫ້ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ-ເປັນລະບຽບຮຽບຮ້ອຍ ແລະ ປອດໄພໂດຍພື້ນຖານ; 3. ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 5 ຂອງແຂວງທ້າຍສະໄໝເຂົ້າສູ່ຊີວິດຕົວຈິງເພື່ອສຸມໃສ່ “ສ້າງແຂວງບໍລິຄໍາໄຊ ເປັນປະຕູເສດຖະກິດ, ແຫຼ່ງຜະລິດພະລັງງານ, ບໍລິການທາງຜ່ານ ແລະ ຄຸ້ມຄອງສິ່ງແວດລ້ອມຍືນຍົງ” ໃຫ້ປະກົດຜົນເປັນຈິງ, ສຸມໃສ່ແກ້ໄຂຄວາມຫຍຸ້ງຍາກທາງດ້ານເສດຖະກິດ ເພື່ອຮັບປະກັນໃຫ້ເສດຖະກິດມີການເຕີບໂຕຢ່າງຕໍ່ເນື່ອງ, ເສດຖະກິດມະຫາພາກມີຄວາມໝັ້ນທ່ຽງ, ຮັບປະກັນໃຫ້ຄ່າຄອງຊີບແລະຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດແລະປະຊາຊົນບັນດາເຜົ່າໃຫ້ດີຂຶ້ນກວ່າເກົ່າ; 4. ອົງການປົກຄອງທຸກຂັ້ນ, ພະແນກການ, ກົມກອງ, ຫ້ອງການ ຕ້ອງເພີ່ມທະວີຄວາມຮັບຜິດຊອບໃນການຈັດຕັ້ງປະຕິບັດຄາດໝາຍສູ້ຊົນຕາມແຜນພັດທະນາເສດຖະກິດ-ສັງຄົມ ແລະ ວຽກບຸລິມະສິດຂອງ 2 ວາລະແຫ່ງຊາດທີ່ໄດ້ວາງອອກ ແນໃສ່ຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ເພື່ອຊຸກຍູ້ເສດຖະກິດໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ. ກະກຽມຄວາມພ້ອມຮອບດ້ານໃນການກະກຽມກອງປະຊຸມໃຫຍ່ 3 ຂັ້ນຂອງພັກໃຫ້ໄດ້ຮັບຜົນສໍາເລັດເປັນຢ່າງດີ, ກາຍເປັນຂະບວນການຟົດຟື້ນ ແລະ ກວ້າງຂວາງ; 5.ສືບຕໍ່ຊຸກຍູ້ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານຢ່າງແຂງແຮງຕາມ 4 ເນື້ອໃນ 4 ຄາດໝາຍ ແລະ ວຽກງານ 3 ສ້າງເຂົ້າສູ່ລວງເລິກ, ປຸກລະດົມທຸກພາກສ່ວນສັງຄົມ ປະກອບສ່ວນເຂົ້າໃນການປະຕິບັດແຜນພັດທະນາເສດຖະກິດ-ສັງຄົມໃຫ້ຫຼາຍຂຶ້ນ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາຂໍ້ແຂ່ງຂັນຕ່າງໆຂອງບັນດາອົງການຈັດຕັ້ງມະຫາຊົນໃຫ້ເປັນຂະບວນການຟົດຟື້ນ; ສູ້ຊົນລຶບລ້າງຄວາມທຸກຍາກຕາມດໍາລັດ 348/ນຍ; ສ້າງຊົນນະບົດໃໝ່ ແລະ ບ້ານໃຫຍ່ໃຫ້ກາຍເປັນສີສັນຕົວເມືອງນ້ອຍເພີ່ມຂຶ້ນ; 6. ຢຶດໝັ້ນແນວທາງການຕ່າງປະເທດຂອງພັກ, ສືບຕໍ່ການພົວພັນຮ່ວມມືກັບຕ່າງປະເທດ ບົນຫຼັກການຕ່າງຝ່າຍຕ່າງມີຜົນປະໂຫຍດ; ເພີ່ມທະວີການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານກັບແຂວງແຮກສ່ຽວກັບບັນດາແຂວງຂອງ ສສ ຫວຽດນາມ; ພົວພັນຮ່ວມມືເປັນປົກກະຕິກັບບັນດາແຂວງແຫ່ງຣາຊະອານາຈັກໄທທີ່ມີຊາຍແດນຮ່ວມ ເພື່ອຮັກສາຄວາມສະຫງົບຄວາມເປັນລະບຽບຮຽບຮ້ອຍຕາມບໍລິເວນຊາຍແດນ; ສ້າງທຸກເງື່ອນໄຂເພື່ອການຮ່ວມມື-ແລກປ່ຽນບົດຮຽນດ້ານການພັດທະນາ ເພື່ອຍາດແຍ່ງເອົາການຊ່ວຍເຫຼືອ, ການລົງທຶນ, ການຮ່ວມມືເຕັກໂນໂລຊີທີ່ທັນສະໄໝເຂົ້າໃນການພັດທະນາໃຫ້ຫຼາຍຂຶ້ນ.