 |
ພິທີມອບ-ຮັບມີຂຶ້ນເມື່ອບໍ່ດົນມານີ້, ກ່າວມອບໂດຍທ່ານ ຫງວຽນ ວູ ທິ໋ນຮອງຜູ້ອຳນວຍການບໍລິສັດຢາງພາລາຫວຽດ-ລາວ ແລະກ່າວຮັບໂດຍທ່ານ ຟອງສະໜຸດ ໄໝແສງຄຳ ຫົວໜ້າຫ້ອງການສຶກສາທິການ ແລະ ກິລາເມືອງ ແລະ ທ່ານ ວັດທະນາ ຈັນທະລາສີນ ຫົວໜ້າຫ້ອງການສາທາລະນະສຸກເມືອງ, ໂດຍມີພະນັກງານ, ຄູ-ອາຈານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.
 |
ເງິນທີ່ມາມອບຄັ້ງນີ້ ຈຳນວນ22,675,000 ກີບ ມອບໃຫ້ແກ່ຫ້ອງການສຶກສາທິການ ແລະ ກິລາເມືອງ ເພື່ອປະກອບສ່ວນໃນການຈັດພິທີມອບໃບຍ້ອງຍໍ ແລະ ຂອງຂວັນລາງວັນໃຫ້ແກ່ນັກຮຽນທີ່ມີຜົນການຮຽນດີເດັ່ນ ໃນລະດັບຊັ້ນ ປ5, ມ4 ແລະ ມ7 ໂດຍມີຈຸດປະສົງເພື່ອຊຸກຍູ້, ສົ່ງເສີມ ແລະ ເປັນກຳລັງໃຈໃຫ້ນັກຮຽນທີ່ມີຄວາມພາກພຽນໃນການຮ່ຳຮຽນ ແລະ ສືບຕໍ່ສ້າງຜົນງານທີ່ດີເດັ່ນ.
ພ້ອມກັນນັ້ນ, ບໍລິສັດຢາງພາລາຫວຽດ-ລາວ ຍັງໄດ້ມອບເງິນຈຳນວນ 25,000,000 ກີບ ໃຫ້ແກ່ຫ້ອງການສາທາລະນະສຸກເມືອງ ເພື່ອປະກອບສ່ວນໃນການພັດທະນາ ແລະ ກໍ່ສ້າງພື້ນຖານໂຄງລ່າງຂອງໂຮງໝໍ ໂດຍສະເພາະການກໍ່ສ້າງຮົ້ວ ແລະ ກຳແພງ ເພື່ອປັບປຸງສະຖານທີ່ ແລະ ອຳນວຍຄວາມສະດວກໃນການໃຫ້ບໍລິການດ້ານສາທາລະນະສຸກ.
ການສະໜັບສະໜູນຈາກບໍລິສັດຢາງພາລາຫວຽດ-ລາວ ໃນຄັ້ງນີ້ ສະແດງເຖິງນ້ຳໃຈ, ຄວາມຮັບຜິດຊອບຕໍ່ສັງຄົມ ແລະ ການຮ່ວມມືອັນດີຂອງພາກທຸລະກິດ ໃນການຮ່ວມສົ່ງເສີມວຽກງານການສຶກສາ, ສ້າງກຳລັງໃຈໃຫ້ແກ່ນັກຮຽນ ແລະ ຮ່ວມພັດທະນາວຽກງານສາທາລະນະສຸກຂອງທ້ອງຖິ່ນໃຫ້ນັບມື້ດີຂຶ້ນ.
ພາບ-ຂ່າວ:ເມືອງບາຈຽງຈະເລີນສຸກ
ຄໍາເຫັນ