ບຸນໄຫ້ວພະຈັນພາຍໃຕ້ຫົວຂໍ້ ຮ່ວມກັນຊົມພະຈັນດວງດຽວກັນ

ທ່ານ ຫຼົວເວິ້ຍຈ້ຽນ ຫົວໜ້າສູນວັດທະນະທຳຈີນ ປະຈຳລາວ ກ່າວວ່າ ໃນບົດກະວີຈີນທີ່ມີຄວາມໝາຍໃນພາສາລາວວ່າ: “ແສງຈັນເປັ່ງປະກາຍຂຶ້ນເໜືອທະເລ ຜູ້ຢູ່ສຸດຂອບຟ້າກໍຮ່ວມຊົມພະຈັນດວງດຽວກັນ.” ເມື່ອ 1,300 ກວ່າປີກ່ອນ “ທ່ານ ຈ່າງ ຈິວຫຼິງ” ໄດ້ຈາລຶກຄຳເວົ້ານີ້ໄວ້ພາຍໃຕ້ແສງຈັນໃນດິນແດນຫຼິງໜານ, ກະວີດັ່ງກ່າວບໍ່ມີພົມແດນ ແລະ ບໍ່ມີຄວາມແຕກຕ່າງຂອງເວລາ. ດວງຈັນແມ່ນທູດຜູ້ອ່ອນໂຍນທີ່ສຸດຂອງວັດທະນະທຳຈີນ, ມັນໄດ້ນໍາພາຄໍາອວຍພອນທີ່ວ່າ: “ຂໍໃຫ້ຄົນທີ່ເຮົາຮັກມີອາຍຸຍືນຍາວ ເຖິງຈະຢູ່ຫ່າງໄກກັນຫຼາຍພັນລີ້ ກໍຍັງໄດ້ຮ່ວມຊົມຈັນ ດວງດຽວກັນ” ຄ່ອຍໆສົ່ງໄປຮອດໜ້າປ່ອງຢຽມ ຜູ້ທີ່ຈາກບ້ານໄປແດນໄກທຸກຄົນ; ພ້ອມຍັງໄດ້ຫຼໍ່ຫຼອມເອົາຄວາມຄິດຮອດບ້ານເກີດຈາກບົດກະວີຈີນທີ່ມີຄວາມໝາຍໃນພາສາລາວວ່າ: “ເງີຍໜ້າຊົມຈັນແຈ້ງ ກົ້ມໜ້າຄິດຮອດບ້ານເກີດ” ໃຫ້ກາຍເປັນຄວາມຮູ້ສຶກຮ່ວມຂອງມວນມະນຸດ ແລະ ບຸນໄຫວ້ພະຈັນໃນປີນີ້ ກໍພໍດີກົງກັບໄລຍະໃກ້ຈະຮອດ ບຸນອອກພັນສາຕາມຮີດຄອງປະເພນີຂອງລາວ. ການທີ່ຄອບຄົວໄດ້ນັ່ງອ້ອມກັນທ່າມກາງສຽງຫົວ ແລະ ຮອຍຍິ້ມ ກັບແສງຈັນຂອງບຸນໄຫວ້ພະຈັນທີ່ສື່ສານອອກມານັ້ນ ລ້ວນແຕ່ສະທ້ອນເຖິງຄຸນຄ່າດຽວກັນກໍຄື: ການໃຫ້ຄວາມສຳຄັນແກ່ຄວາມພ້ອມໜ້າພ້ອມຕາ ແລະ ຄວາມຮູ້ບຸນຄຸນ. ດວງຈັນໃນປີນີ້, ຍັງມີຄວາມໝາຍພິເສດອີກອັນໜຶ່ງ. ປີ 2026 ແມ່ນວາລະຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ລາວ-ຈີນ ແລະ “ປີມິດຕະພາບລາວ-ຈີນ”. ຕະຫຼອດໄລຍະ 65 ປີແຫ່ງການຮ່ວມທຸກຮ່ວມສຸກ ແລະ ຝ່າຟັນອຸປະສັກມາຮ່ວມກັນ, ຈາກປະເທດບ້ານໃກ້ເຮືອນຄຽງທີ່ “ຮ່ວມດື່ມນໍ້າຈາກແມ່ນ້ຳສາຍດຽວກັນ”, ສູ່ການຈັບມືຮ່ວມກັນສ້າງຄູ່ຮ່ວມຊາຕາກໍາລາວ-ຈີນ ທີ່ເຂັ້ມແຂງໜຽວແໜ້ນໃນທຸກສະພາບການຂອງຍຸກໃໝ່, ສອງຊາດລາວ-ຈີນໄດ້ຜູກພັນກັນດ້ວຍໃຈ, ປະຕິບັດຕໍ່ກັນດ້ວຍຄວາມຈິງໃຈ, ຊ່ວຍເຫຼືອເກື້ອກູນກັນໃນຍາມປະເຊີນກັບຄວາມທຸກຍາກລໍາບາກ ແລະ ຮ່ວມສ້າງຄວາມສໍາເລັດໃຫ້ແກ່ກັນໃນເສັ້ນທາງແຫ່ງການພັດທະນາ. ດັ່ງຄຳສຸພາສິດລາວທີ່ວ່າ: “ເມື່ອແມ່ນ້ຳໄຫຼລົງສູ່ທະເລ ແສງຈັນກໍຫວນຄືນເຕັມດວງ.” ຂະບວນລົດໄຟລາວ–ຈີນ ອັນຍາວໄກດັ່ງມັງກອນເຫຼັກທີ່ແລ່ນຜ່ານພູຜາ ແລະ ຫຸບເຂົາ ໄດ້ປ່ຽນ “ໄລຍະຫ່າງສຸດຂອບຟ້າ” ໃຫ້ກາຍເປັນ “ບ້ານໃກ້ເຮືອນຄຽງ”; ແມ່ນ້ຳລ້ານຊ້າງ ແລະ ແມ່ນ້ຳຂອງທີ່ໄຫຼຢ່າງບໍ່ຢຸດຢັ້ງ ກໍໄດ້ປ່ຽນຄຳວ່າ “ເພື່ອນບ້ານ” ໃຫ້ກາຍເປັນ “ຍາດຕິພີ່ນ້ອງ”.

ທ່ານ ອຸ່ນຫຼ້າ ສີວັນເພັງ ໄດ້ກາວວ່າ: ດວງຈັນເພັງລອຍເດັ່ນເທິງທ້ອງຟ້າ, ປຽບເໝືອນສອງຊາດລາວ-ຈີນໄດ້ຮ່ວມຈິດຮ່ວມໃຈກັນ ຊຶ່ງບຸນໄຫວ້ພະຈັນຂອງປະເທດຈີນມີປະຫັວດສາດອັນຍາວນານ, ເປັນສັນຍາລັກແຫ່ງຄວາມສາມັກຄີ, ຄວາມປອງດອງ ແລະ ຄວາມອຸດົມສົມບູນຮັ່ງມີ. ໃນວັດທະນະທໍາຈີນ, ທຸກຄົນຈະໄດ້ຊົມດວງພະຈັນ, ກິນເຂົ້າໜົມໄຫວ້ພະຈັນ, ເພື່ອຝາກຄວາມຄິດຮອດຄິດເຖິງໄປເຖິງຄົນໃນຄອບຄົວ, ໝາຍເຖິງການດຳລົງຊີວິດທີ່ດີໃນຕໍ່ໜ້າ ລາວ-ຈີນ ເປັນປະເທດທີ່ມີແມ່ນ້ຳ ແລະ ສາຍພູຕິດຈອດກັນ, ສາຍພົວພັນມິດຕະພາບດັ້ງເດີມມີມາຍາວນານ. ໃນໄລຍະປີທີ່ຜ່ານມາ, ໄດ້ມີໂຄງການ "ໜຶ່ງແລວໜຶ່ງເສັ້ນທາງ" ແນວຄິດຂໍ້ລິເລີ່ມການກໍ່ສ້າງເສັ້ນທາງລົດໄຟລາວ-ຈີນ ແລະ ໄດ້ເປີດນຳໃຊ້ຢ່າງເປັນທາງການ, ເຮັດໃຫ້ການໄປມາຫາສູ່ຂອງປະຊາຊົນສະດວກສະບາຍ, ນອກຈາກນັ້ນສອງປະເທດພວກເຮົາຍັງໄດ້ມີການແລກປ່ຽນດ້ານການສຶກສາ, ວັດທະນະທຳ ແລະ ການຮ່ວມມືຂອງບັນດາຊາວໜຸ່ມສອງຊາດໄດ້ມີຄວາມຮັກແພງ ແລະ ແໜ້ນແຟ້ນຍິ່ງໆຂຶ້ນ. ພາສາ ແລະ ວັດທະນະທຳເປັນຂົວຕໍ່ທີ່ດີທີ່ສຸດໃນການເຊື່ອມໂຍງຈິດໃຈຂອງປະຊາຊົນ. ພວກເຮົາມີຄວມພາກພູມໃຈທີ່ໄດ້ເຫັນນັກສຶກສາລາວຮຽນຮູ້ສຶກສາວັດທະນະທຳຈີນ, ພ້ອມກັນນັ້ນກໍໄດ້ເຫັນຄູ-ອາຈານ ແລະ ນັກສຶກສາທັງສອງຊາດຊ່ວຍເຫຼືອຊຶ່ງກັນ ແລະ ກັນ, ໂດຍສະເພາະໃນການດຳລົງຊີວິດ ແລະ ການຮຽນຮູ້ແລກປ່ຽນຊຶ່ງກັນ ແລະ ກັນ.

ພາຍໃນງານໄດ້ຮັບຊົມການສະແດງສິລະປະວັນນະຄະດີປະກອບມີ ບົດຟ້ອນ, ຮ້ອງເພງລວມໝູ່, ການສະແດງກັງຟູຈີນ, ສະແດງງີ້ວຈີນ ແລະ ອ່ານບົດກາວີຈາກສູນວັດທະນະທຳຈີນ ແລະ ນັກສຶກສາລາວຈາກພາກວິຊາພາສາຈີນ ຄະນະອັກສອນສາດ ມະຫາວິທະຍາໄລແຫ່ງຊາດ ແລະ ກິດຈະກຳອື່ນໆ ທີ່ສ້າງຄວາມເບີກບານມ່ວນຊື່ນແກ່ຜູ້ເຂົ້າຮ່ວມໃນງານຄັ້ງນີ້.

ຂ່າວ-ພາບ: ບຸນຕອມ,ບຸນອູ້ມ