ໃນໄລຍະທີ່ເດີນທາງມາຮ່ວມກອງປະຊຸມ ລັດຖະບານເປີດກວ້າງ ຄັ້ງທີ II ປີ 2024 ທີ່ນະຄອນຫຼວງວຽງຈັນ.
ການພົບປະຄັ້ງນີ້ ທັງສອງຝ່າຍໄດ້ແລກປ່ຽນຄຳຄິດເຫັນ ແລະ ປຶກສາຫາລືກ່ຽວກັບວຽກງານໃນຂົງເຂດກະສິກຳ ແລະ ປ່າໄມ້ ໂດຍທ່ານເຈົ້າແຂວງໄດ້ສະເໜີໃຫ້ຮູ້ກ່ຽວກັບທິດທາງ ແລະ ເປົ້າໝາຍໃນການພັດທະນາວຽກງານກະສິກໍາ-ປ່າໄມ້ ຕິດພັນກັບການພັດທະນາຊີວິດການເປັນຢູ່ຂອງປະຊາຊົນພາຍໃນແຂວງອັດຕະປື ເປັນຕົ້ນແມ່ນການແກ້ໄຂບັນຫາການບຸກລຸກທີ່ດິນປ່າໄມ້, ການຂະຫຍາຍພື້ນທີ່ການປູກໄມ້ໃຫ້ໝາກທີ່ເປັນພືດເສດຖະກິດ (ເຊັ່ນ: ໝາກຖົ່ວລຽນທີ່ສາມາດສ້າງລາຍຮັບ ໄດ້ເຖິງ 900 ລ້ານກວ່າກີບຕໍ່ເຮັກຕາ), ການກໍານົດ ແລະ ຈັດສັນພື້ນທີ່ເຂດການປູກການລ້ຽງຂອງແຂວງໃຫ້ແທດເໝາະກັບສະພາບພື້ນທີ່ ແລະ ທ່າແຮງ. ທ່ານໄດ້ສະເໜີໃຫ້ ກະຊວງກະສິກໍາ ແລະ ປ່າໄມ້ ຊ່ວຍສະໜັບສະໜູນ ທາງດ້ານເຕັກນິກວິຊາການ ເພື່ອໃຫ້ປະຊາຊົນ ແຂວງອັດຕະປື ມີຄວາມຮູ້ ມີຄວາມສາມາດຜະລິດ ແລະ ສ້າງລາຍຮັບດ້ວຍຕົວເຂົາເຈົ້າເອງຢ່າງຍືນຍົງ ແລະ ຫຼຸດພົ້ນອອກຈາກຄວາມທຸກຍາກ ທັງເປັນການປະກອບສ່ວນພັດທະນາຊົນນະບົດ ແລະ ສ້າງເສດຖະກິດຂອງແຂວງ ກໍຄືເສດຖະກິດແຫ່ງຊາດໄປພ້ອມໆກັນ. ທ່ານເຈົ້າແຂວງໄດ້ເນັ້ນໜັກໃຫ້ກະຊວງກະສິກຳ ແລະ ປ່າໄມ້ ຊ່ວຍໃນການດຳເນີນການກຳນົດຂອບເຂດ 3 ປະເພດປ່າ ແລະ ທີ່ດິນກະສິກຳ ຂອງແຂວງຄືນໃໝ່, ໂດຍສະເພາະເນັ້ນໃສ່ການກຳນົດຂອບເຂດ 3 ປະເພດປ່າ ຢູ່ ເມືອງສະໜາມໄຊ ໃຫ້ສຳເລັດ ໃນປີ 2025 ເພື່ອເປັນຕົວແບບ ໃນການຜັນຂະຫຍາຍສູ່ເຂດອື່ນ.
ໃນໂອກາດການພົບປະຄັ້ງນີ້, ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ເຫັນດີຕໍ່ການນຳສະເໜີ ໂດຍໃຫ້ມີການປະສານສົມທົບຂອງພະແນກການ ແລະ ກົມວິຊາການທີ່ກ່ຽວຂ້ອງໂດຍສະເພາະການກໍານົດຂອບເຂດພື້ນທີ່ 3 ປະເພດປ່າ ແລະ ທີ່ດິນກະສິກໍາ ຢູ່ ແຂວງອັດຕະປື ໂດຍສະເພາະ ໃນເມືອງສະໜາມໄຊ ທີ່ໄລຍະຜ່ານມາໄດ້ຮັບຜົນກະທົບຈາກໄພພິບັດທາງທໍາມະຊາດ ແລະ ໄດ້ມອບຂໍ້ມູນແຜນທີ່ການກຳນົດແບ່ງເຂດທີ່ດິນກະສິກຳ ຮອດປີ 2030 ແລະ ແຜນທີ່ການກໍານົດທີ່ຕັ້ງ 3 ປະເພດປ່າ ຂອງແຂວງອັດຕະປື ຊຶ່ງເປັນຂໍ້ມູນອັນສໍາຄັນທີ່ເປັນພື້ນຖານສໍາລັບການກໍານົດ ແລະ ວາງແຜນການນໍາໃຊ້ທີ່ດິນ ໃຫ້ແຂວງອັດຕະປືນໍາອີກ.
ຂ່າວ-ພາບ: ນ. ສີອໍາມອນ ໄຊຍະລາດ
ຄໍາເຫັນ