ວັນທີ 12 ເມສາຜ່ານມາ, ທີ່ຫ້ອງວ່າການແຂວງຄໍາມ່ວນ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ໄດ້ມີຄໍາເຫັນອວຍບັນດາທ່ານການນຳພັກ-ລັດ, ພະນັກງານ-ລັດຖະກອນ, ທະຫານ, ຕຳຫຼວດ, ນັກທຸລະກິດ, ພໍ່ຄ້າ-ຊາວຂາຍ, ພໍ່ແມ່ປະຊາຊົນຊາວແຂວງຄຳມ່ວນ ຕະຫຼອດຮອດຊາວຕ່າງດ້າວ ແລະ ຊາວຕ່າງປະເທດ ທີ່ມາເຄື່ອນໄຫວເຮັດວຽກ ແລະ ດຳລົງຊີວິດຢູ່ແຂວງຄຳມ່ວນ ເນື່ອງໃນໂອກາດສົ່ງທ້າຍປີເກົ່າ ພສ 2566 ຕ້ອນຮັບປີໃໝ່ ພສ 2567.
ໃນທ່າມກາງບັນຍາກາດອັນເບີກບານມ່ວນຊື່ນ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ເວົ້າລວມ, ເວົ້າສະເພາະ ປະຊາຊົນບັນດາເຜົ່າຊາວແຂວງຄໍາມ່ວນພວກເຮົາ ພວມເບີກບານມ່ວນຊື່ນກັບບັນຍາກາດສະເຫຼີມສະຫຼອງສົ່ງທ້າຍປີເກົ່າ ປີ ເຖາະ ພໍສໍ 2566 ແລະ ຕ້ອນຮັບປີໃໝ່ປະເພນີລາວ ປີ ມະໂລງ ພໍສໍ 2567 ທີ່ໄດ້ໜູນວຽນມາບັນຈົບຄົບຮອບອີກວາລະໜຶ່ງ.
ເນື່ອງໃນໂອກາດສົ່ງທ້າຍປີເກົ່າ ພສ 2566 (ປີເຖາະ) ແລະ ຕ້ອນຮັບປີໃໝ່ (ປີມະໂລງ) ພສ 2567 ນີ້ ຂ້າພະເຈົ້າ ຂໍຖືໂອກາດອັນເລີກງາມຍາມດີ ແລະ ເປັນສິລິມົງຄຸນນີ້ ຂໍສົ່ງຄຳອວຍ ພອນໄຊອັນປະເສີດ ມາຍັງພະນັກງານ, ສະມາຊິກພັກ, ທະຫານ, ຕຳຫຼວດ, ປະຊາຊົນບັນດາເຜົ່າຊາວແຂວງຄຳມ່ວນ, ຊາວຕ່າງດ້າວ ແລະ ຊາວຕ່າງປະເທດ ທີ່ດຳລົງຊີວິດ, ປະຕິບັດໜ້າທີ່ ແລະ ທຳມາຫາກິນຢູ່ແຂວງຄໍາມ່ວນທຸກທົ່ວໜ້າ ຈົ່ງມີສຸຂະພາບເຂັ້ມແຂງ, ມີພະລະນາໄມສົມບູນ, ສຸກກາຍສຸກໃຈ, ປາສະຈາກໂລກໄພໄຂ້ເຈັບ ແລະ ປະສົບຜົນສຳເລັດໃນໜ້າທີ່ວຽກງານທຸກປະການ, ພ້ອມກັນສະເຫຼີມສະຫຼອງວັນບຸນປີໃໝ່ລາວ ຢ່າງເບີກບານມ່ວນຊື່ນ, ພ້ອມກັນອານຸລັກຮັກສາຮີດຄອງປະເພນີອັນດີງາມ ແລະ ພ້ອມກັນຈັດຕັ້ງປະຕິບັດບັນດາມາດຕະການ ແລະ ລະບຽບການຕ່າງໆທີ່ການຈັດຕັ້ງວາງອອກໃນການຫຼີ້ນບຸນປີໃໝ່ ຢ່າງເຂັ້ມງວດ ແລະ ຮັບປະກັນຄວາມສະຫງົບປອດໄພ ຮ້ອຍສ່ວນຮ້ອຍ.
ໃນປີ ພສ 2567 ນີ້, ຂໍໃຫ້ທຸກໆທ່ານ ຈົ່ງມີແຕ່ໂຊກໃໝ່ໄຊງາມ, ຈົ່ງເປັນປີທີ່ນຳເອົາຜົນສຳເລັດໃໝ່ ໃຫຍ່ຫຼວງກວ່າເກົ່າ ແລະ ເປັນປີແຫ່ງຄວາມສຸກ- ຄວາມສົມຫວັງທຸກປະການ ມາສູ່ປະຊາຊົນບັນດາເຜົ່າຊາວແຂວງຄຳມ່ວນ ຕະຫຼອດ ພສ 2567 ນີ້ດ້ວຍ.
(ຂ່າວ-ພາບ: ກອງຄໍາ)
ຄໍາເຫັນ