ເຈົ້າແຂວງຄໍາມ່ວນ ພົບປະ ປະທານອົງການກວດສອບແຫ່ງລັດ

ໃນວັນທີ 27 ມີນານີ້ ທີ່ຫ້ອງຮັບແຂກຫ້ອງວ່າການແຂວງຄໍາມ່ວນ, ທ່ານ ວັນໄຊ ພອງສະຫວັນ ເຈົ້າແຂວງ ຄໍາມ່ວນ ໄດ້ຕ້ອນຮັບການເຂົ້າພົບປະຂອງທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ພ້ອມດ້ວຍຄະນະ. 
ໂອກາດນີ້, ທ່ານ ວຽງທະວີສອນ ເທບພະຈັນ ໄດ້ແຈ້ງແຜນເຄື່ອນໄຫວຂອງການມາເຮັດວຽກຂອງຄະນະໃນຄັ້ງນີ້, ເພື່ອຊຸກຍູ້ການແກ້ໄຂຜົນຂອງການກວດສອບໃຫ້ມີຄວາມຄືບໜ້າ, ມີປະສິດທິພາບ, ປະສິດທິຜົນ, ມີຄວາມສອດຄ່ອງ ໂດຍສະເພາະແມ່ນບັນຫາຂໍ້ຄົງຄ້າງຕ່າງໆ ທີ່ຕິດພັນກັບການກວດສອບໃນການບໍລິຫານຄຸ້ມຄອງນໍາໃຊ້ງົບປະມານຂອງລັດຢູ່ບັນດາຂະແໜງການພາຍໃນແຂວງໃນຜ່ານມາ ແນໃສ່ເຮັດໃຫ້ແຂວງຄໍາມ່ວນເປັນແຂວງຕົວແບບໃນການແກ້ໄຂຜົນການກວດສອບ. ພ້ອມນີ້ຍັງໄດ້ຮັບຟັງການລາຍງານຜົນຂອງການກວດສອບ ຈາກຄະນະກວດສອບແຫ່ງລັດກ່ຽວກັບຜົນກວດສອບ ແລະ ວຽກກງານຈຸດສຸມທີ່ຈະຕ້ອງໄດ້ແກ້ໄຂ ຢູ່ແຂວງ. 
ໂອກາດດັ່ງກ່າວ, ທ່ານ ວັນໄຊ ພອງສະຫວັນ ກໍໄດ້ກ່າວຄວາມຕ້ອນຮັບ ແລະ ໃຫ້ການຮ່ວມມືປະສານສົມທົບ ແລະ ຊີ້ນໍາຕື່ມພາກສ່ວນກ່ຽວຂ້ອງ ເພື່ອພ້ອມກັນແກ້ໄຂບັນຫາຂໍ້ຄົງຄ້າງຕ່າງໆ ທີ່ພົບເຫັນຢູ່ແຂວງຄໍາມ່ວນ ແລະ ສະເໜີມາຍັງປະທານອົງການກວດສອບແຫ່ງລັດແຕ່ງຕັ້ງພະນັກງານ ຫຼື ໜ່ວຍງານໃດໜື່ງ ມາຊຸກຍູ້ວຽກງານເປັນໄລຍະ ເພື່ອແນໃສ່ໃຫ້ວຽກງານດັ່ງກ່າວມີຄວາມເຂັ້ມແຂງ ແລະ ມີທ່າຂະຫຍາຍຕົວດີຂຶ້ນກວ່າເກົ່າ.
(ຂ່າວ: ມະນີວັນ)