ເຈົ້າແຂວງໄຊສົມບູນ ລົງຊຸກຍູ້ໂຮງງານແປຮູບຜະລິດຕະພັນໄມ້ປ່ອງ

ໃນຕອນເຊົ້າຂອງວັນທີ 17 ທັນວາຜ່ານມາໂດຍມີທ່ານ ຫູ ຈາວ ເຫວີນ ປະທານບໍລິສັດ ຢອງແສງ ພັດທະນາໄມ້ປ່ອງຄົບວົງຈອນ ຈໍາກັດ ພ້ອມດ້ວຍພະນັກງານພາຍໃນໂຮງງານ ໃຫ້ການຕ້ອນຮັບ.
ການລົງຕິດຕາມຊຸກຍູ້ໂຮງງານໃນຄັ້ງນີ້, ທ່ານ ເຈົ້າແຂວງ ພ້ອມດ້ວຍຄະນະ ໄດ້ຕິດຕາມເບິ່ງຂັ້ນຕອນການຜະລິດຖ່ານຂາວອັດແທ່ງ ຈາກຂີ້ເລື່ອຍໄມ້ປ່ອງ ເປັນຕົ້ນແມ່ນ ຂັ້ນຕອນການຂຸດຄົ້ນໄມ້, ຕັດໄມ້, ບົດໄມ້, ອັດແທ່ງ, ເຂົ້າເຕົາອົບ ແລະ ອື່ນໆ ຈົນຮອດຂັ້ນຕອນສໍາເລັດຮູບ ແລະ ພ້ອມຈໍາໜ່າຍ. ຈາກນັ້ນ, ທ່ານເຈົ້າແຂວງ ພ້ອມດ້ວຍຄະນະ ຍັງໄດ້ຮັບຟັງການລາຍງານກ່ຽວກັບການເຄື່ອນໄຫວຈັດຕັ້ງປະຕິບັັດວຽກງານໃນໄລຍະຜ່ານມາ ເພື່ອຮັບປະກັນວ່າໄລຍະຜ່ານມາ ບໍລິສັດໄດ້ເຄື່ອນໄຫວຖືກຕ້ອງຕາມສັນຍາສໍາປະທານ ແລະ ບັນດາຜະລິດຕະພັນ ສາມາດຮັບປະກັນທາງດ້ານຄຸນນະພາບ.
ໃນໂອກາດນີ້, ທ່ານ ເຈົ້້າແຂວງ ໄດ້ຊີ້ນໍາໃຫ້ບໍລິສັດ ສົມທົບກັບ ພາກສ່ວນທີ່ກ່ຽວຂ້ອງ ສືບຕໍ່ຊຸກຍູ້ສົ່ງເສີມປະຊາຊົນຜູ້ທີ່ມີເງື່ອນໄຂ ກໍຄືຜູ້ທີ່ມີພື້ນທີ່ປູກໄມ້ປ່ອງເພື່ອຂາຍປ່ອນເຂົ້າໂຮງງານ ແລະ ຮັບເອົາຄອບຄົວທີ່ທຸກຍາກ ແຕ່ມີກຳລັງແຮງງານມາເຮັດວຽກຢູ່ໂຮງງານ. ພ້ອມນັ້ນ ທ່ານກໍເນັ້ນໜັກໃຫ້ບໍລິສັດຕ້ອງສືບຕໍ່ຂະຫຍາຍໃຫ້ມີຫຼາກຫຼາຍຜະລິດຕະພັນ ເປັນຕົ້ນແມ່ນ ການຜະລິດເຫຍື້ອເຈ້ຍ ແລະ ເຄື່ອງຕົບແຕ່ງເຟີນິເຈີຕ່າງໆ ເນື່ອງຈາກໂຮງງານດັ່ງກ່າວ ເປັນໂຮງງານທີ່ລົງທຶນທາງດ້ານກະສິກໍາ ສະນັ້ນ ຈຶ່ງຕິດພັນກັບການສ້າງວຽກເຮັດງານທໍາໃຫ້ປະຊາຊົນ ກໍຄືຊາວແຂວງໄຊສົມບູນ ໃຫ້ມີອາຊີບທີ່ໝັ້ນຄົງ, ມີລາຍຮັບເຂົ້າໃນຄອບຄົວ ແລະ ສາມາດຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.
ໃນໂອກາດດັ່ງກ່າວ, ທ່ານ ພອຍຄໍາ ຮຸ່ງບຸນຍວງ ພ້ອມດ້ວຍຄະນະ ຍັງໄດ້ໄປຢ້ຽມຊົມໂຮງງານປຸງແຕ່ງແຮ່ຊືນ ສັງກະສີ ຂອງບໍລິສັດ ລ້ອງແຈ້ງມາຍນິງ ນໍາອີກ.
(ຂ່າວ: ພາພອນ ນະວົງໄຊ)