 |
ທ່ານ ສາຍຄໍາ ແກ້ວບຸນປານ ໄດ້ກ່າວຕ້ອນຮັບ ແລະ ສະແດງຄວາມຂອບໃຈ ຕໍ່ການນໍາພັກ-ລັດຂັ້ນສູນກາງ ກໍຄືຂັ້ນແຂວງ ໂດຍສະເພາະ ທ່ານເຈົ້າແຂວງ ທີ່ຍາມໃດກໍເປັນຫ່ວງເປັນໄຍເອົາໃຈໃສ່ຊີ້ນໍາຢ່າງໃກ້ຊິດຕິດແທດ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ, ເຮັດໃຫ້ທົ່ວເມືອງ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວ ແລະ ຊີວິດການເປັນຢູ່ ຂອງປະຊາຊົນໄດ້ຮັບການພັດທະນາໄປສູ່ຄຸນນະພາບໃໝ່ນັບມື້ດີຂຶ້ນ; ໃນປີ 2024 ຜ່ານມາ, ລວມຍອດຜະລິດຕະພັນພາຍໃນ ຫລື GDP ສະເລ່ຍຕໍ່ຫົວຄົນບັນລຸໄດ້ 9.2 ລ້ານກວ່າກີບ, ເກັບລາຍຮັບເຂົ້າງົບປະມານໄດ້ 33.03 ຕື້ກີບ ແລະ ການສົ່ງອອກສິນຄ້າປະຕິບັດໄດ້ 2.15 ຕື້ກີບ.
ທ່ານ ເຫລັກໄຫລ ສີວິໄລ ກໍໄດ້ມີຄໍາເຫັນວ່າ: ໂດຍປະຕິບັດຕາມ ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX ໃນວັນທີ 25 ມິຖຸນາ 2025 ທີ່ໄດ້ປະກາດແຕ່ງຕັ້ງ ແລະ ມອບ ໝາຍໃຫ້ຂ້າພະເຈົ້າເປັນລັດຖະມົນຕີກະຊວງໂຍທາທິການ ແລະ ຂົນສົ່ງ. ສະນັ້ນ, ຈຶ່ງຖືໂອກາດນີ້ ສະແດງຄວາມຂອບໃຈ ແລະ ກ່າວອໍາລາ ຄະນະພັກ-ຄະນະນໍາຂອງເມືອງ. ເຖິງຢ່າງໃດກໍຕາມ, ຂໍໃຫ້ຄະນະພັກ-ຄະນະນໍາເມືອງ ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດ, ເພີ່ມທະວີຄວາມສາມັກຄີບັນດາເຜົ່າໃຫ້ເປັນປຶກແຜ່ນ, ແໜ້ນໜາ; ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ແກ້ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ; ຫັນພະນັກງານຫຼັກແຫຼ່ງ ລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ຕາມທິດ 3 ສ້າງ; ຜັນຂະຫຍາຍທິດນໍາ ການພັດທະນາເສດຖະກິດ ເອກະລາດເປັນເຈົ້າຕົນເອງ ໃນໄລຍະໃໝ່, ສົ່ງເສີມຂະບວນການຜະລິດ ເພື່ອຕອບສະໜອງການບໍລິໂພກພາຍໃນໃຫ້ພຽງພໍ, ຂາຍເປັນສິນຄ້າສ້າງລາຍຮັບໃຫ້ຄອບຄົວ ແລະ ເພື່ອທົດແທນການນໍາເຂົ້າ; ຊຸກຍູ້ສົ່ງເສີມນໍາໃຊ້ທ່າແຮງຂອງເມືອງ, ຍາດແຍ່ງການຊ່ວຍເຫຼືອ ແລະ ດຶງດູດການລົງທຶນ ເຂົ້າໃນການພັດທະນາພື້ນຖານໂຄງລ່າງ ເພື່ອຍູ້ແຮງການພັດທະນາເສດຖະກິດ, ສ້າງວຽກເຮັດງານທຳໃຫ້ປະຊາຊົນ ແລະ ພັດທະນາຊີວິດການເປັນຢູ່ຂອງປະຊາຊົນພາຍໃນເມືອງ ໃຫ້ນັບມື້ດີຂຶ້ນ.
(ແຫຼ່ງຂ່າວ: ແຂວງເຊກອງ)
ຄໍາເຫັນ