ກອງປະຊຸມເຜີຍແຜ່ດັ່ງກ່າວໄດ້ຈັດຂຶ້ນຢູ່ແຂວງບໍລິຄຳໄຊ, ອຸດົມໄຊແລະຈຳປາສັກໂດຍມີກະຊວງກະສິກຳແລະປ່າໄມ້, ກະຊວງຍຸຕິທຳ, ສຳນັກງານນາຍົກລັດຖະມົນຕີ, ກະຊວງຊັບພະຍາກອນທຳມະຊາດແລະສິ່ງແວດລ້ອມ, ອົງການອະນຸລັກສັດປ່າ, ກອງຄຸ້ມຄອງອຸທິຍານແລະປ່າສະຫງວນແຫ່ງຊາດແລະພາກເອກະຊົນທີ່ເຮັດວຽກກ່ຽວກັບການທ່ອງທ່ຽວແບບອະນຸລັກເຂົ້າຮ່ວມ.
ສປປລາວໄດ້ມີປ່າສະຫງວນແຫ່ງຊາດທັງໝົດ 26 ແຫ່ງ ຊຶ່ງໃນນັ້ນ 7 ແຫ່ງໄດ້ຖືກປະກາດໃຫ້ເປັນ “ອຸທິຍານແຫ່ງຊາດ” ຊຶ່ງເປັນປະເພດປ່າສະຫງວນທີ່ໄດ້ຮັບການຄຸ້ມຄອງໃນລະດັບສູງເຊັ່ນ: ອຸທິຍານແຫ່ງຊາດນໍ້າແອດ-ພູເລີຍ;ປ່າສະຫງວນແຫ່ງຊາດເຫຼົ່ານີ້ເປັນບ່ອນຢູ່ອາໄສຂອງຊີວະນານາພັນທີ່ອຸດົມສົມບູນແລະຊະນິດພັນທ້ອງຖິ່ນແລະຊະນິດພັນທີ່ກໍາລັງຖືກຄຸກຄາມ.
ປັດຈຸບັນ, ຊີວະນານາພັນຂອງສປປລາວຖືກຄຸກຄາມຍ້ອນການປ່ຽນແປງຂອງດິນຟ້າອາກາດ, ການຄ້າ-ຂາຍສັດປ່າທີ່ຜິດກົດໝາຍ, ການລ່າສັດ, ຄວບຄູ່ກັບອັດຕາການຕັດໄມ້ທຳລາຍປ່າທີ່ສູງຊຶ່ງສົ່ງຜົນໃຫ້ມີການຖືກຕັດຂາດແລະສູນເສຍຖິ່ນທີ່ຢູ່ອາໄສ.
ດຳລັດສະບັບໃໝ່ໄດ້ຖືກຮັບຮອງເອົາໃນເດືອນມິຖຸນາປີ 2023, ໄດ້ຍົກສູງມາດຕະຖານ, ບຸລິມະສິດ ແລະໂຄງສ້າງຂອງປ່າສະຫງວນ ໃຫ້ສອດຄ່ອງກັບບັນດາເປົ້າໝາຍແຫ່ງຊາດ ແລະບັນລຸມາດຕະຖານສາກົນ, ຊຸມຊົນທີ່ອາໄສຢູ່ບັນດາບ້ານອ້ອມຂ້າງຈະມີສ່ວນຮ່ວມໃນການຮ່ວມຄຸ້ມຄອງປ່າສະຫງວນໂດຍຜ່ານຮູບແບບການສົ່ງເສີມ“ບ້ານພັດທະນາທາງດ້ານປ່າໄມ້”ເພື່ອແນໃສ່ດຸ່ນດ່ຽງຜົນປະໂຫຍດລະຫວ່າງຄົນແລະທຳມະຊາດ.
ທ່ານສົມບູນວົງພະຈັນຮອງຫົວໜ້າກົມກົດໝາຍກະຊວງຍຸຕິທໍາກ່າວວ່າ:ການເຜີຍແຜ່ດຳລັດດັ່ງກ່າວເປັນຂີດໝາຍທີ່ສຳຄັນໃນການຈັດຕັ້ງປະຕິບັດບັນດານິຕິກຳທີ່ສຳຄັນເຫຼົ່ານີ້. ກອບວຽກນິຕິກຳແລະນະໂຍບາຍຂອງປ່າສະຫງວນໃນການຄຸ້ມຄອງແລະປົກປັກຮັກສາຂະແໜງປ່າໄມ້ຂອງລາວແມ່ນໄດ້ຖືກກໍານົດໄວ້ເພື່ອປະຕິບັດພັນທະສາກົນຂອງສປປລາວພາຍໃຕ້ຂໍ້ຕົກລົງຮ່ວມມືຫຼາຍຝ່າຍດ້ານສິ່ງແວດລ້ອມ”.
ກອງປະຊຸມເຜີຍແຜ່ນະໂຍບາຍປ່າສະຫງວນຄັ້ງນີ້ແມ່ນແນໃສ່ການນຳສະເໜີບັນດານະໂຍບາຍສະບັບໃໝ່ຂອງປ່າສະຫງວນແລະແຜນການຄຸ້ມຄອງແລະສະໜອງທຶນແບບຍືນຍົງໃຫ້ແກ່ປ່າສະຫງວນແຫ່ງຊາດຢູ່ສປປລາວແລະການເຂົ້າເຖິງກອງທຶນລັດຂອງປ່າສະຫງວນແຫ່ງຊາດເພື່ອຮັບປະກັນຄວາມເຂົ້າໃຈທີ່ຊັດເຈນແລະເພື່ອຮັບປະກັນການຈັດຕັ້ງປະຕິບັດຢ່າງປະສົບຜົນສຳເລັດ.
ທ່ານນາງຊີຊິວເລີຄົວຜູ້ຈັດການແຜນງານຂອງຄະນະຜູ້ແທນສະຫະພາບເອີຣົບປະຈໍາສປປລາວໄດ້ກ່າວໃນກອງປະຊຸມເຜີຍແຜ່ດຳລັດດັ່ງກ່າວ ຢູ່ພາກກາງວ່າ: “ສປປ ລາວມີປ່າດົງດິບທີ່ມີສະເໜ່ທີ່ສຸດໃນໂລກແລະມີພູມີທັດທີ່ເປັນເອກະລັກຫຼາຍແຫ່ງລວມທັງອຸທິຍານແຫ່ງຊາດແລະເຂດປ່າສະຫງວນ ຊຶ່ງເປັນທີ່ຍອມຮັບໃນດ້ານລະບົບນິເວດແລະຊີວະນານາພັນທີ່ເປັນເອກະລັກສະເພາະຂອງພວກມັນ,ຊັບສິນແຫ່ງຊາດຕ້ອງໄດ້ຮັບການປົກປັກຮັກສາແລະການປົກປັກຮັກສາເລີ່ມຕົ້ນດ້ວຍຄວາມຮັບຮູ້ແລະເຜີຍແຜ່ນະໂຍບາຍເພື່ອຮັບປະກັນການຈັດຕັ້ງປະຕິບັດຕາມແລະການບັງຄັບໃຊ້ກົດໝາຍທີ່ຖືກຕ້ອງແລະເໝາະສົມ”.
ແຜນການຄຸ້ມຄອງແລະສະໜອງທຶນແບບຍືນຍົງໃຫ້ແກ່ປ່າສະຫງວນແຫ່ງຊາດຢູ່ສປປລາວຈະອໍານວຍຄວາມສະດວກໃຫ້ແກ່ການຮ່ວມມືໃນການເຮັດວຽກຮ່ວມກັນເພື່ອສະໜອງທຶນແບບຍືນຍົງເຂົ້າໃນການຄຸ້ມຄອງປ່າສະຫງວນທົ່ວສປປລາວຊຶ່ງມັນເປັນເຄື່ອງມືທີ່ຈະຊ່ວຍປະສານກິດຈະກຳຂອງຄູ່ຮ່ວມງານແລະພາກສ່ວນທີ່ກ່ຽວຂ້ອງ ໃຫ້ສອດຄ່ອງແລະກົມກຽວກັບເປົ້າໝາຍຂອງນະໂຍບາຍປ່າສະຫງວນ.
“ອົງການອະນຸລັກສັດປ່າໄດ້ຮ່ວມມືກັບລັດຖະບານລາວ, ຊ່ຽວຊານດ້ານວຽກງານປ່າສະຫງວນແຫ່ງຊາດ, ຊາວບ້ານຜູ້ອະນຸລັກປ່າແລະພາກສ່ວນກ່ຽວຂ້ອງທີ່ສຳຄັນເພື່ອພັດທະນາແລະເຜີຍແຜ່ນິຕິກຳທີ່ສຳຄັນສະບັບດັ່ງກ່າວນີ້. ດຳລັດສະບັບນີ້ເປັນບາດກ້າວອັນໜັກແໜ້ນແລະອັນໃຫຍ່ຫຼວງໃນການປົກປັກຮັກສາຊີວະນານາພັນໃນສປປລາວເພື່ອຮັບປະກັນການຄຸ້ມຄອງແລະຄຸ້ມຄອງເຂດທີ່ອຸດົມສົມບູນທາງດ້ານຊີວະນານາພັນໃນປະເທດ.
ຄໍາເຫັນ