ເອກອັກຄະລັດຖະທູດ ສປປ ລາວ ຍື່ນສານຕາຕັ້ງ ຕໍ່ ປະທານາທິບໍດີ ສາທາລະນະລັດ ມານດີບ

ໃນໂອກາດນີ້, ພະນະທ່ານ ໂມຮາເມັດ ມູອິສຊູ ປະທານາທິບໍດີ ມານດີບ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບຕໍ່ ທ່ານ ນາງ ວິທະຍາ ໄຊຍະວົງ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ສາທາລະນະລັດ ມານດີບ ເພື່ອປະຕິບັດໜ້າທີ່ ອັນຊົງກຽດ ແລະ ສູງສົ່ງໃນຄັ້ງນີ້ ແລະ ເຊື່ອໝັ້ນວ່າ ດ້ວຍຄວາມຮູ້ຄວາມສາມາດ ແລະ ປະສົບການຂອງທ່ານຈະປະສົບຜົນສຳເລັດໃນການປະຕິບັດໜ້າທີ່ ອັນສຳຄັນໃນຄັ້ງນີ້. ພ້ອມນີ້, ທ່ານຍັງໄດ້ຝາກຄວາມຢື້ຢາມຖາມຂ່າວມາຍັງ ພະນະທ່ານ ທອງລຸນ ສີສຸລິດ ປະທານປະເທດ, ລັດຖະບານ ແລະ ປະຊາຊົນລາວ. ພ້ອມກັນນີ້, ພະນະທ່ານປະທານາທິບໍດີ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ລາວ-ມານດີບ ຕະຫຼອດໄລຍະເວລາ 14 ປີ. ສອງຝ່າຍໄດ້ມີການຊ່ວຍເຫຼືອ ແລະ ສະໜັບສະໜູນຊຶ່ງກັນ ແລະ ກັນໃນຫຼາຍຂອບການຮ່ວມມື ສອງຝ່າຍ-ຫຼາຍຝ່າຍ ລວມເຖິງຂອບອົງການສະຫະປະຊາຊາດ (ສປຊ).

ໃນໂອກາດດັ່ງກ່າວ, ທ່ານ ນາງ ວິທະຍາ ໄຊຍະວົງ ເອກອັກຄະລັດຖະທູດລາວຄົນໃໝ່ ປະຈໍາມານດີບ ໄດ້ສະແດງຄວາມຂອບໃຈເປັນຢ່າງສູງຕໍ່ປະທານາທິບໍດີ ແລະ ນຳເອົາຄວາມຢື້ຢາມຖາມຂ່າວອັັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ລັດຖະບານ ແລະ ປະຊາຊົນລາວ ຝາກເຖິງທ່ານ ພະນະທ່ານ ໂມຮາເມັດ ມູອິສຊູ ປະທານາທິບໍດີແຫ່ງ ສາທາລະນະລັດ ມານດີບ ແລະ ປະຊາຊົນມານດີບທຸກຖ້ວນໜ້າ. ພ້ອມດຽວກັນນີ້, ທ່ານເອກອັກຄະລັດຖະທູດລາວໄດ້ສະແດງຄວາມຂອບໃຈຢ່າງສູງຕໍ່ສາຍພົວພັນ ແລະ ມິດຕະພາບອັນດີ, ການຮ່ວມມືທີ່ແໜ້ນແຟ້ນຂອງສອງຝ່າຍ ລວມເຖິງການສະໜັບສະໜູນຊຶ່ງກັນ ແລະ ກັນໃນເວທີພາກພື້ນ ແລະ ສາກົນຕະຫຼອດໄລຍະຜ່ານມາ. ພ້ອມໄດ້ກ່າວວ່າໃນໄລຍະປະຕິບັດໜ້າທີ່ໆສໍາຄັນໃນຄັ້ງນີ້ ຈະສົ່ງເສີມການພົວພັນຮ່ວມມືສອງຝ່າຍໃຫ້ກວ້າງຂວາງຂຶ້ນ ເພື່ອເສີມຂະຫຍາຍສາຍພົວພັນມິດຕະພາບຂອງສອງປະເທດໃຫ້ນັບມື້ນັບແໜ້ນແຟ້ນດີຍິ່ງໆຂຶ້ນ.

ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ມານດີບ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 10 ກຸມພາ 2012.

(ຂ່າວ: ກຕທ)