ບົດລາຍງານຂໍ້ມູນປະຈໍາອາທິດຫຼ້າສຸດຂອງສູນດັ່ງກ່າວຊີ້ໃຫ້ເຫັນວ່າ: ໂຕເລກຂອງປີນີ້ສູງກວ່າຄ່າສະເລ່ຍໄລຍະ 19 ປີ ທີ່ 244,000 ເຮັກຕາ ຊຶ່ງປົກກະຕິແລ້ວຈະລາຍງານໃນກາງເດືອນສິງຫາ.
ມາຮອດປັດຈຸບັນ, ກວດພົບໄຟປ່າຂະໜາດໃຫຍ່ 1,736 ຄັ້ງໃນ EU. ໃນນັ້ນລວມທັງໄຟໄໝ້ປ່າທີ່ມີເນື້ອທີ່ກວ້າງກວ່າ 30 ເຮັກຕາ ຊຶ່ງຫຼາຍກວ່າໄລຍະດຽວກັນຂອງປີຜ່ານມາ (1,185 ຄັ້ງ) . ການເພີ່ມຂຶ້ນໄດ້ເຮັດໃຫ້ປະລິມານການຄາດຄະເນການປ່ອຍແກ໊ສກາກບອນດີອອກໄຊເພີ່ມສູງຂຶ້ນເປັນ 31,9 ລ້ານໂຕນ, ສູງກວ່າປີກາຍນີ້ເກືອບ 3 ເທົ່າ.
ສຳລັບການຄາດຄະເນອັນຕະລາຍຈາກໄຟປ່າ ໃນລະຫວ່າງວັນທີ 19-25 ສິງຫາ ລະບຸວ່າ: ສະຖານະການຢູ່ພາກໃຕ້ຂອງ EU ລວມທັງ ແອັດສະປາຍ, ຝຣັ່ງ, ອີຕາລີ, ແຫຼມບອລຂ່ານ ແລະ ເກຼັກ ຈະຜ່ອນຄາຍລົງ, ແຕ່ລະດັບຄວາມສ່ຽງຢູ່ເຂດພາກເໜືອ ແລະ ຕາເວັນຕົກສ່ຽງເໜືອຂອງທະວີບມີທ່າອ່ຽງເພີ່ມຂຶ້ນ.
ຂ່າວລະບຸວ່າ: ອຽກລັງ, ອັງກິດ, ແບນຊິກ, ໂຮນລັງ, ພາກເໜືອຂອງເຢຍລະມັນ, ໂປໂລຍ, ດານມາກ ແລະບາງສ່ວນຂອງສະວິດ ແລະ ແຟງລັງ ກໍາລັງປະເຊີນກັບຄວາມສ່ຽງໄຟປ່າທີ່ສູງຜິດປົກກະຕິ ຊຶ່ງຄາດວ່າຄວາມສ່ຽງຈະເພີ່ມຂຶ້ນຕາມແມ່ນໍ້າດານູບ ໃນໂອຕຣິດ, ຮົງກາຣີ, ແລະ ຣູມານີ.
EU ເກີດໄຟປ່າໂດຍສະເລ່ຍຫຼາຍກວ່າ 60,000 ຄັ້ງຕໍ່ປີ ຊຶ່ງທໍາລາຍພື້ນທີ່ປະມານ 500,000 ເຮັກຕາ, ເກືອບສອງເທົ່າຂອງພື້ນທີ່ລຸກຊຳບວກ ແລະ ໄດ້ເຮັດໃຫ້ມີຜູ້ບາດເຈັບ ຫຼື ເສຍຊີວິດ ແລະ ສ້າງຄວາມເສຍຫາຍທາງເສດຖະກິດປະມານ 2 ຕື້ເອີໂຣ.
ຄໍາເຫັນ