 |
ທ່ານ ທອງລີ ສີສຸລິດ ໄດ້ກ່າວວ່າ: ວຽກງານແຜນການ ແລະ ການເງິນ ແມ່ນວຽກສໍາຄັນທີ່ຊ່ວຍຂັບເຄື່ອນການດຳເນີນກິດຈະກຳ ແລະ ໂຄງການພັດທະນາຕ່າງໆຂອງລັດ ໃຫ້ບັນລຸຜົນສຳເລັດ. ພ້ອມກັນນີ້ ການນຳໃຊ້ງົບປະມານແຫ່ງລັດ ແລະ ທຶນຊ່ວຍເຫຼືອເພື່ອການພັດທະນາ (ODA) ຈຳເປັນຕ້ອງດຳເນີນໄປຢ່າງມີປະສິດທິຜົນ, ໂປ່ງໃສ ແລະ ສອດຄ່ອງກັບນະໂຍບາຍປະຢັດມັດທະຍັດ ຕ້ານການຟຸ່ມເຟືອຍ. ດັ່ງນັ້ນ, ຫ້ອງການສູນກາງຊາວໜຸ່ມປະຊາຊົນ ປະຕິວັດລາວ ຈຶ່ງໄດ້ຮ່ວມມືກັບພາກສ່ວນກ່ຽວຂ້ອງ ໂດຍໄດ້ເຊີນວິທະຍາກອນຊ່ຽວຊານຈາກກະຊວງການເງິນ ມາຖ່າຍທອດຄວາມຮູ້ ໃນຫົວຂໍ້ “ການຂຽນແຜນສະເໜີໂຄງການທີ່ນຳໃຊ້ງົບປະມານຂອງລັດ” ເພື່ອເສີມສ້າງຄວາມຮູ້, ຄວາມເຂົ້າໃຈ ແລະ ຍົກລະດັບຂີດຄວາມສາມາດໃຫ້ແກ່ພະນັກງານ-ລັດຖະກອນ ໃນການສ້າງ ແລະ ບໍລິຫານແຜນງານ-ໂຄງການ ຢ່າງຖືກຕ້ອງຕາມຫຼັກການ ຊຶ່ງສຳມະນາກອນໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງ ໂດຍເນັ້ນການຝຶກຂຽນແຜນສະເໜີໂຄງການຕົວຈິງ.
ຊຸດອົບຮົມໃນຄັ້ງນີ້, ໄດ້ເຜີຍແຜ່, ເຊື່ອມຊຶມນິຕິກຳ, ກົດໝາຍ ແລະ ຂໍ້ຕົກລົງທີ່ສຳຄັນກ່ຽວກັບການປະຢັດ ແລະ ຕ້ານການຟຸ່ມເຟືອຍ, ສ້າງຄວາມເຂົ້າໃຈດ້ານການສ້າງ ແລະ ປະເມີນແຜນງົບປະມານແຫ່ງລັດ, ລະບຽບການປະກອບເອກະສານລາຍຈ່າຍ ແລະ ການຖອນງົບປະມານຜ່ານລະບົບຄັງເງິນໃຫ້ມີຄວາມຖືກຕ້ອງ, ວ່ອງໄວ ແລະ ໂປ່ງໃສ. ນອກຈາກນັ້ນ, ການຝຶກອົບຮົມຍັງໄດ້ເນັ້ນໃສ່ການຍົກລະດັບທັກສະໃນການສ້າງ ແລະ ຄຸ້ມຄອງແຜນພັດທະນາເສດຖະກິດ-ສັງຄົມ, ການຮ່າງ ແລະ ຂຽນບົດສະເໜີໂຄງການ (Project Proposal) ໃຫ້ຖືກຕ້ອງຕາມຫຼັກການ ແລະ ເງື່ອນໄຂການປະເມີນຂອງລັດ. ພ້ອມນີ້, ຍັງເປັນເວທີໃຫ້ພະນັກງານຮຸ່ນສືບທອດ ໄດ້ແລກປ່ຽນບົດຮຽນ, ປຶກສາຫາລື ແລະ ແກ້ໄຂອຸປະສັກໃນການປະສານວຽກງານແຜນການ-ການເງິນ ຮ່ວມກັບວິທະຍາກອນຊ່ຽວຊານໂດຍກົງ. ທັງນີ້, ກໍເພື່ອເຮັດໃຫ້ສຳມະນາກອນ ສາມາດນຳເອົາຄວາມຮູ້ ແລະ ທັກສະທີ່ໄດ້ຮຽນຮູ້ ໄປຜັນຂະຫຍາຍ ແລະ ປັບໃຊ້ໃນການຂຽນແຜນສະເໜີໂຄງການຂອງຂະແໜງ ການຕົນ ໃຫ້ມີຄຸນນະພາບ, ຜ່ານການປະເມີນ ແລະ ໄດ້ຮັບການອະນຸມັດງົບປະມານຢ່າງມີປະສິດທິຜົນ.
ຂໍ້ມູນ-ພາບ: ສື່ມວນຊົນໜຸ່ມລາວ
ຄໍາເຫັນ