 |
ໂດຍການເປັນປະທານຮ່ວມຂອງ ທ່ານ ລຽນທອງ ສຸພານີ ຫົວໜ້າກົມສະຖິຕິເສດຖະກິດ ແລະ ສັງຄົມ ສູນສະຖິຕິແຫ່ງຊາດກະຊວງການເງິນ ແລະ ທ່ານນາງ ໄກສອນ ອ້ວນຄຳປັນຍາ ຫົວໜ້າກົມແຜນການ ແລະ ການຮ່ວມມືສາກົນ ກະຊວງແຮງງານ ແລະ ສະຫວັດດີການສັງຄົມ; ຊຶ່ງມີນັກສຳມະນາກອນ ຜູ້ທີ່ຈະເປັນກຳລັງແຮງຕົ້ນຕໍໃນການເກັບກຳຂໍ້ມູນຈາກພະແນກການເງິນ ແລະ ພະແນກແຮງງານ ແລະ ສະຫວັດດີການສັງຄົມ ທັງ 18 ແຂວງໃນຂອບເຂດທົ່ວປະເທດ ເຂົ້າຮ່ວມ.
ການສຳຫຼວດແຮງງານໃນຄັ້ງນີ້ ຖືເປັນກົນໄກຍຸດທະສາດທີ່ສຳຄັນຍິ່ງ ໃນການສະໜອງຕົວເລກສະຖິຕິອັນຊັດເຈນ ເພື່ອຮັບໃຊ້ນະໂຍບາຍການພັດທະນາຊັບພະຍາກອນມະນຸດ, ການສ້າງວຽກເຮັດງານທຳ ແລະ ການຂັບເຄື່ອນເສດຖະກິດ-ສັງຄົມຂອງຊາດ. ດັ່ງນັ້ນ, ຊຸດຝຶກອົບຮົມຄັ້ງນີ້ ຈຶ່ງມຸ່ງເນັ້ນໃສ່ການສ້າງຄວາມເປັນເອກະພາບດ້ານແນວຄວາມຄິດ ແລະ ນິຍາມຕາມມາດຕະຖານສາກົນ, ເພີ່ມທັກສະການນຳໃຊ້ອຸປະກອນ ແລະ ໂປຼແກຼມເກັບກຳຂໍ້ມູນແບບຍຸກໃໝ່, ພ້ອມທັງຝຶກເຕັກນິກການສຳພາດ, ການຂຶ້ນບັນຊີ ແລະ ເລືອກຄົວເຮືອນຕົວແທນ ໃຫ້ມີຄວາມຊຳນານ ຕະຫຼອດຮອດການກຳນົດກົນໄກການລາຍງານ ແລະ ຄວາມຮັບຜິດຊອບລະຫວ່າງຂັ້ນສູນກາງ ແລະ ທ້ອງຖິ່ນ ໃຫ້ມີຄວາມຈະແຈ້ງ, ໂປ່ງໃສ.
ທ່ານ ລຽນທອງ ສຸພານີ ໄດ້ເນັ້ນທັດສະນະຊີ້ນຳຢ່າງເລິກເຊິ່ງ ແລະ ມີຄວາມໝາຍ ໂດຍໄດ້ຮຽກຮ້ອງໃຫ້ຜູ້ເຂົ້າຮ່ວມ ເອົາໃຈໃສ່ຕິດຕາມການຝຶກອົບຮົມຢ່າງເຕັມສ່ວນ ຕະຫຼອດໄລຍະ 8 ວັນ ໂດຍຮັກສາລະບຽບວິໄນຢ່າງເຂັ້ມງວດ, ກ້າຄິດ, ກ້າຖາມ ແລະ ແລກປ່ຽນບົດຮຽນຮ່ວມກັນ ເພື່ອແກ້ໄຂສິ່ງທ້າທາຍ ແລະ ບບັນຫາຫຍຸ້ງຍາກຢູ່ພາກສະໜາມຕັ້ງແຕ່ຕົ້ນ, ຖືເອົາຄວາມຊື່ສັດຂອງຂໍ້ມູນເປັນສິ່ງສຳຄັນທີ່ສຸດ, ຫ້າມການປະດິດແຕ່ງ ຫຼື ຕື່ມຂໍ້ມູນເອງໂດຍເດັດຂາດ ໂດຍບໍ່ໄດ້ລົງສຳພາດຕົວຈິງ, ຮັກສາຄວາມລັບຂອງຂໍ້ມູນຜູ້ຖືກສຳພາດ ຕາມກົດໝາຍວ່າດ້ວຍສະຖິຕິ ແລະ ປະຕິບັດຕໍ່ປະຊາຊົນດ້ວຍຄວາມສຸພາບ, ອ່ອນນ້ອມ, ນຳເອົາຄວາມຮູ້ທີ່ໄດ້ຮັບ ໄປຈັດຕັ້ງປະຕິບັດຢູ່ຂອບເຂດຄວາມຮັບຜິດຊອບຂອງຕົນ ໃຫ້ປະສົບຜົນສຳເລັດຕາມແຜນການ ແລະ ທັນຕາມກຳນົດເວລາ.
ຊຸດຝຶກອົບຮົມ 8 ວັນໃນຄັ້ງນີ້ ບໍ່ພຽງແຕ່ເປັນການຍົກລະດັບຄວາມສາມາດຂອງພະນັກງານພາກສະໜາມເທົ່ານັ້ນ, ແຕ່ຍັງເປັນການວາງຮາກຖານອັນແຂງແກ່ນ ໃຫ້ແກ່ການສະໜອງຂໍ້ມູນສະຖິຕິທີ່ມີຄຸນນະພາບ ສູງສຸດ ເພື່ອຮັບໃຊ້ການວາງແຜນພັດທະນາເສດຖະກິດ-ສັງຄົມ ຂອງປະເທດຊາດໃຫ້ເຕີບໂຕຢ່າງຍືນຍົງ.(ຂ່າວ:ບຸນມາ)
ຄໍາເຫັນ