ຝືກອົບຮົມວຽກງານຈັດຕັ້ງ ແລະ ພະນັກງານ

ກະຊວງຍຸຕິທຳ ຈັດຝຶກອົບຮົມວຽກງານຈັດຕັ້ງ ແລະ ພະນັກງານ ຊຸດທີ I ໃຫ້ແກ່ພະນັກງານຫຼັກແຫຼ່ງ ຂອງກະຊວງຍຸຕິທຳ ຂຶ້ນໃນວັນທີ 9 ຕຸລາ ຜ່ານມາ ທີ່ກະຊວງດັ່ງກ່າວ ເປັນປະທານໂດຍ ທ່ານ ໄພວີ ສີບົວລິພາ  ລັດຖະມົນຕີກະຊວງຍຸຕິທຳ, ມີ ທ່ານ  ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກເຂົ້າຮ່ວມ. 
  ຈຸດປະສົງ ເພື່ອຍົກລະດັບຄວາມຮູ້ວຽກງານຈັດຕັ້ງພະນັກງານ ໃຫ້ພະນັກງານຂັ້ນຄະນະກົມ, ຫ້ອງການ, ບັນດາກົມ,  ສູນແກ້ໄຂຂໍ້ຂັດແຍ່ງທາງດ້ານເສດຖະກິດ, ສະຖາບັນຍຸຕິທຳແຫ່ງຊາດ ແລະ ສະພາທະນາຍຄວາມ ໄດ້ຮັບຮູ້ ແລະ ເຂົ້າໃຈເລິກເຊິ່ງ ໂດຍສະເພາະແມ່ນ ການຄຸ້ມຄອງສະມາຊິກພັກ, ພະນັກງານ, ການປະຕິບັດແບບແຜນນຳພາ ແລະ ຫຼັກການລວມສູນປະຊາທິປະໄຕຂອງພັກ, ກໍ່ສ້າງພະນັກງານທີ່ຢູ່ພາຍໃຕ້ການຊີ້ນຳ-ນຳພາຂອງຕົນ, ກຳແໜ້ນລະບົບການຈັດຕັ້ງດຳເນີນຮ່ວມຊີວິດພັກ, ການຕິຊົມຕົນເອງ ແລະ ຕິຊົມຊຶ່ງກັນ ແລະ ກັນ ພ້ອມທັງໃຫ້ເຂົ້າໃຈ ແລະ ກຳໄດ້ກ່ຽວກັບຂັ້ນຕອນຂອງການກະກຽມ ແລະ ດຳເນີນກອງປະຊຸມໃຫຍ່; ເພື່ອເພີ່ມຄວາມຮູ້ ແລະ ຄວາມເຂົ້າໃຈກ່ຽວກັບຍຸດທະສາດການບໍລິຫານບຸກຄະລາກອນ, ການປັບປຸງກົງຈັກການຈັດຕັ້ງໃຫ້ສອດຄ່ອງກັບພາລະບົດບາດ, ໜ້າທີ່ ທີ່ມີການປ່ຽນແປງໃໝ່, ເປັນບ່ອນອີງໃນການຕິດຕາມ, ສັບຊ້ອນ, ຈັດວາງພະນັກງານ ໃຫ້ຖືກຕ້ອງສອດຄ່ອງ; ເພື່ອເຮັດໃຫ້ພະນັກງານ ທີ່ເຂົ້າຮ່ວມໃນການຝຶກອົບຮົມວຽກງານຈັດຕັ້ງ ແລະ ພະນັກງານ ຄັ້ງນີ້ ກຳໄດ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບວຽກງານຂອງຕົນ ເພື່ອນຳໄປປະຕິບັດໃຫ້ມີປະສິດທິພາບ ແລະ ປະສິດທິຜົນດີ.
ໃນໂອກາດດັ່ງກ່າວ, ທ່ານປະທານກໍໄດ້ມີຄຳເຫັນ ຮຽກຮ້ອງມາຍັງຜູ້ເຂົ້າຮ່ວມຝຶກອົບຮົມໃຫ້ເອົາໃຈໃສ່ຄົ້ນຄວ້າຊອກຮູ້ຮໍ່າຮຽນນຳ ຄູ-ອາຈານ ແລະ ຖືໂອກາດໃນການແລກ ປ່ຽນບົດຮຽນຊຶ່ງກັນ ແລະ ກັນ. ຊຸດຝຶກອົບຮົມໃນຄັ້ງນີ້ຈະໄດ້ດຳເນີນເປັນເວລາ 5 ວັນຈຶ່ງສຳເລັດ ແລະ ໄດ້ຮັບການສະໜັບສະໜູນຈາກໂຄງການເສີມສ້າງລັດແຫ່ງກົດໝາຍ, ການເຂົ້າເຖິງຄວາມຍຸຕິທຳ ແລະ ການປົກຄອງທີ່ດີ (ແຜນງານລາວ/037).  
ຂ່າວ-ພາບ: ນາງ ບຸນຖອມ ພະສະແຫວງ