 |
ໃນກອງປະຊຸມ, ຜູ້ຊ່ຽວຊານຂອງອົງການແຮງງານສາກົນ ໄດ້ປຶກສາຫາລື, ແລກປ່ຽນຄວາມຄິດເຫັນກ່ຽວກັບການຈຳແນກ ແລະ ຄວາມສະເໝີພາບໃນການເຮັດວຽກ; ສົ່ງເສີມຄວາມສະເໝີພາບຍິງ-ຊາຍທາງດ້ານໂອກາດ ແລະ ປະຕິບັດ; ຄວາມຮຸນແຮງ ແລະ ການລ່ວງລະເມີດໃນໂລກແຫ່ງການເຮັດວຽກ; ເຄື່ອງມືສຳລັບຜູ້ຈັດການຝ່າຍບຸກຄະລາກອນ ໂດຍການນຳໃຊ້ພາກປະຕິບັດທີ່ເປັນທໍາ ແລະ ປອດໄພ; ການສ້າງວັດທະນະທຳແຫ່ງຄວາມເຄົາລົບ ເປັນຕົ້ນ ນະໂຍບາຍ, ຂັ້ນຕອນ ແລະ ການສົ່ງເສີມສິດ ແລະ ອື່ນໆ.
ທ່ານ ຄຳພັດ ອ່ອນລາສີ ຮອງຫົວໜ້າກົມຄຸ້ມຄອງແຮງງານກະຊວງ ຮສສ ໄດ້ກ່າວວ່າ: ການສ້າງຄູ່ມືອົບຮົມ ແລະ ເຄື່ອງມືສື່ສານ ສຳລັບການລຶບລ້າງການຈຳແນກ ໃນໂລກຂອງການເຮັດວຽກດັ່ງກ່າວ ແນໃສ່ສ້າງຄວາມເຂົ້າໃຈໃຫ້ພາກສ່ວນທີ່ກ່ຽວຂ້ອງ ກ່ຽວກັບສົນທິສັນຍາຂອງອົງການແຮງງານສາກົນ ເລກທີ 111 ແລະ ຂອບກົດໝາຍທີ່ກ່ຽວຂ້ອງ ໃນການສົ່ງເສີມການລຶບລ້າງການຈໍາແນກໃນການຈ້າງງານ ເພື່ອເປັນການຮັບປະກັນວ່າ ວິທີການ ແລະ ບຸລິມະສິດ ໃນການປະຕິບັດມີຄວາມສອດຄ່ອງກັບໂຄງການ. ນອກຈາກນີ້, ຍັງຈະເປັນຂໍ້ມູນພື້ນຖານ ໃນການປັບປຸງກົດໝາຍ ວ່າດ້ວຍແຮງງານຂອງ ສປປ ລາວ ຊຶ່ງຈະນຳເອົາບັນດາເນື້ອໃນຂອງສົນທິສັນຍາ ຂອງອົງການແຮງງານສາກົນ ສະບັບເລກທີ 111 ໃສ່ໃນກົດໝາຍວ່າດ້ວຍແຮງງານ. ພ້ອມນີ້, ທ່ານ ຄຳພັດ ອ່ອນລາສີ ຍັງຮຽກຮ້ອງໃຫ້ຜູ້ເຂົ້າຮ່ວມເອົາໃຈໃສ່ໃນການຮັບຟັງ, ປະກອບຄໍາຄິດຄໍາເຫັນ ແລກປ່ຽນບົດຮຽນ ແລະ ປະສົບປະການນໍາຊ່ຽວຊານ ເພື່ອເຮັດໃຫ້ຄູ່ມືຝຶກອົບຮົມ ແລະ ເຄື່ອງມືສື່ສານ ສໍາລັບການລຶບລ້າງການຈໍາແນກ (ລວມທັງຄວາມຮຸນແຮງທາງເພດ) ໃນໂລກຂອງການເຮັດວຽກ ຂອງໂຄງການລຶບລ້າງການຈໍາແນກຢູ່ສະຖານທີ່ເຮັດວຽກ, ການລ່ວງລະເມີດ ແລະ ການນໍາໃຊ້ແຮງງານເດັກຢູ່ ສປປ ລາວ ເພື່ອສະໜັບສະໜູນການຄ້າ ແລະ ການປະຕິບັດລະບຽບການ ໃຫ້ສໍາເລັດຕາມແຜນການທີ່ກໍານົດໄວ້ ແລະ ໃຫ້ຄູ່ມືສອດຄ່ອດກັບສະພາບຄວາມເປັນຈິງຂອງ ສປປ ລາວ.
ໂຄງການລຶບລ້າງການຈຳແນກຢູ່ທີ່ສະຖານທີ່ເຮັດວຽກ, ການລ່ວງລະເມີດ ແລະ ແຮງງານເດັກຢູ່ ສປປ ລາວ ເພື່ອສະໜັບສະໜູນການຄ້າ ແລະ ການປະຕິບັດຕາມລະບຽບການ ໄດ້ຮັບທຶນສະໜັບສະໜູນຈາກອົງການຈັດຫາງານ ແລະ ພັດທະນາສັງຄົມຂອງປະເທດການາດາ, ມີເປົ້າໝາຍເຮັດໃຫ້ພາກປະຕິບັດທາງດ້ານກົດໝາຍແຫ່ງຊາດ ໃຫ້ສອດຄ່ອງກັບມາດຕະຖານແຮງງານສາກົນ ຊຶ່ງເປັນສິ່ງສໍາຄັນໃນຂໍ້ຕົກລົງດ້ານການຄ້າເສລີ (FTAs) ແລະ ຄວາມຄາດຫວັງທີ່ປ່ຽນແປງໄປໃນຕ່ອງໂສ້ ການສະໜອງສິນຄ້າໃນທົ່ວໂລກ. ເພື່ອແກ້ໄຂບັນຫາດັ່ງກ່າວ, ໂຄງການຈະສຸມໃສ່ບາງຂະແໜງການຄ້າທີ່ສຳຄັນ ໂດຍເພີ່ມທະວີການສົນທະນາທາງສັງຄົມ ແລະ ສ້າງຄວາມສາມາດໃຫ້ອົງການຈັດຕັ້ງ ໃນການປ້ອງກັນການຈໍາແນກ ແລະ ການລ່ວງລະເມີດຢູ່ສະຖານທີ່ເຮັດວຽກ ທັງດ້ານກົດໝາຍ ແລະ ພາກປະຕິບັດ ເພື່ອລຶບລ້າງແຮງງານເດັກ. ນອກນັ້ນ, ຍັງເນັ້ນສົ່ງເສີມນະໂຍບາຍພົວພັນແຮງງານ ທີ່ສະໜັບສະໜູນການເຄົາລົບຫຼັກການ ແລະ ສິດທິພື້ນຖານໃນການເຮັດວຽກ.
ຂ່າວ-ພາບ: ກິດຕາ
ຄໍາເຫັນ