ໃນວັນທີ 22 ພະຈິກຜ່ານມາທີ່ສະໂມສອນແຂວງສາລະວັນ ໄດ້ຈັດກອງປະຊຸມປຶກສາຫາລືເພື່ອກະກຽມຈັດງານເທດສະການແຫ່ພະໄຕປີດົກສືບສານວັດທະນະທຳ ລຳວົງສາລະວັນ ປະຈຳປີ 2023 ໂດຍພາຍໃຕ້ການເປັນປະທານຂອງທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ມີທ່ານ ມະໄລວອນ ສີປະເສີດ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອປຶກສາຫາລືກະກຽມຈັດງານເທດສະການແຫ່ພະໄຕປີດົກສືບສານວັດທະນະທຳ ລຳວົງສາລະວັນຊຶ່ງຈະຈັດຂຶ້ນໃນລະຫວ່າງວັນທີ 5-9 ທັນວາ 2023ເພື່ອເຜີຍແຜ່ແນວທາງນະໂຍບາຍຂອງພັກ ແລະ ລັດ ກໍຄືມະຕິ 25 ຂອງກົມການເມືອງສູນກາງພັກ ວ່າດ້ວຍການເພີ່ມທະວີການນຳພາຕໍ່ວຽກງານວັດທະນະທຳໄລຍະໃໝ່, ທັງເປັນການສະແດງເຖິງວິຖີຊີວິດຂອງຊາວແຂວງສາລະວັນ, ສ້າງຈິດສຳນຶກ ແລະ ຍົກສູງຄວາມຮັບຮູ້ຂອງສັງຄົມໃຫ້ເຫັນເຖິງຄວາມສຳຄັນຕໍ່ວຽກງານມໍລະດົກ ແລະ ວັດທະນະທຳ ໃນການພັດທະນາເສດຖະກິດ-ສັງຄົມຂອງແຂວງ ເພື່ອຊຸກຍູ້, ສົ່ງເສິີມດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ.
ທ່ານ ບຸນກ່ອງ ເກດທອງຄຳ ຮອງຫົວໜ້າພະແນກ ຖວທ ໄດ້ຜ່ານແຜນເຄື່ອນໄຫວງານດັ່ງກ່າວ ໂດຍໄດ້ມີການກະກຽມດ້ານເນື້ອໃນ, ວຽກສາສະໜາ ແລະ ປະເພນີ, ປັບປຸງ, ປະດັບປະດາ ແລະ ອະນາໄມສະຖານທີ່, ວຽກປ້ອງກັນຄວາມສະຫງົບ, ເບິ່ງແຍງສຸຂະພາບ, ການວາງສະແດງສິນຄ້າ, ງານປະກວດ, ແຂ່ງຂັນສິລະປະ-ວັນນະຄະດີ, ວຽກກ້ອນກຳລັງຂະບວນແຫ່ຕ່າງໆ ແລະ ວຽກອື່ນໆ ຊຶ່ງໄດ້ມີການແຕ່ງຕັ້ງບັນດາອະນຸກຳມະການຈັດງານ. ສຳລັບໃນວັນທີ 8 ທັນວາ 2023 ແມ່ນຈະໄດ້ມີການແຫ່ພະໄຕປີດົກ 45 ເຫຼັ້ມ, ແຫ່ໜັງສືຜູກໃບລານ 84.000 ພະທໍາມະຂັນ, ຜາສາດເຜິ້ງ 9 ຫຼັງ, ແຫ່ຕົ້ນຜ້າປ່າ 1.800 ຕົ້ນ ແລະ ຂະບວນອື່ນໆ ເພື່ອເຮັດໃຫ້ການທ່ອງທ່ຽວພາຍໃນແຂວງສາລະວັນມີບັນຍາກາດຟົດຟື້ນມ່ວນຊື່ນ ມີການບໍລິການແລກປ່ຽນຊື້-ຂາຍສິນຄ້າ, ປູກຈິດສຳນຶກຮັກສາຂະໜົບທຳນຽມອັນດີງາມຂອງຊາດຂອງທ້ອງຖິ່ນ ທັງເປັນການສ້າງຂະບວນການຕ້ອນຮັບປີທ່ອງທ່ຽວລາວ 2024 ກໍຄືຂອງແຂວງສາລະວັນ ຊຶ່ງໄດ້ຈັດຂຶ້ນມາແລ້ວ 3 ຄັ້ງນັບແຕ່ປີ 1999-2000,2012, 2018 ແລະ ໄດ້ມີການກຽມແຜນດຳເນີນງານປີທ່ອງທ່ຽວ 2024 ຊຶ່ງໄດ້ມີການກະກຽມດ້ານເນື້ອໃນ, ພັດທະນາປັບປຸງພື້ນຖານໂຄງລ່າງ, ສິ່ງອຳນວຍຄວາມສະດວກການທ່ອງທ່ຽວ, ໂຄສະນາ-ປະຊາສຳພັນຜະລິດຕະພັນ, ປັບປຸງຂອດການບໍລິການທຸລະກິດທ່ອງທ່ຽວ, ສົ່ງເສີມຜະລິດຕະພັນ, ການວາງສະແດງສົ່ງເສີມດ້ານວັດທະນະທຳ, ສິລະປະການສະແດງ, ກິດຈະກຳຕ່າງໆ ແລະ ວຽກງານອື່ນໆຕື່ມອີກ.
ກິດຈະກຳທີ່ຈະຈັດຂຶ້ນໃນໄລຍະປີທ່ອງທ່ຽວລາວ 2024 ຢູ່ແຂວງສາລະວັນ ປະກອບມີ 30 ກິດຈະກຳຄື: ລະດັບຊາດ 1 ງານ, ລະດັບແຂວງ 8 ງານ, ຂັ້ນເມືອງ 6 ງານ ແລະ ຂັ້ນບ້ານ 15 ງານ ຊຶ່ງເປັນກິດຈະກຳທີ່ຕິດພັນກັບວິຖີຊີວິດ, ວັດທະນະທຳ ແລະ ຮີດຄອງປະເພນີຂອງຊາວແຂວງສາລະວັນ ກໍຄືບັນດາເມືອງ, ບ້ານເພື່ອສົ່ງເສີມວັດທະນະທຳ, ຮີດຄອງປະເພນີ ແລະ ຜະລິດຕະພັນຕ່າງໆ ໃຫ້ໄດ້ຮັບການການຊຸກຍູ້, ປົກປັກຮັກສາ ແລະ ສືບສານໃຫ້ໝັ້ນຄົງຍືນຍົງຕະຫຼອດໄປ.
ຂ່າວ-ພາບ: ວິໄລວອນ ສິີດທິໄຊ
ຄໍາເຫັນ