 |
ທ່ານນາງ ພອນຈັນ ສີພາວົງ ຮອງຫົວໜ້າກຸ່ມຕໍ່າຫູກ ບ້ານພັ້ນ ເມືອງແປກ ແຂວງຊຽງຂວາງ ໃຫ້ສໍາພາດຕໍ່ຜູ້ຂຽນ ໃນງານວາງສະແດງສິນຄ້າກະສິກໍາລາວ - ສ ເກົາຫຼີ ທີ່ສູນການຄ້າ ລາວ-ໄອເຕັກຕຶກເກົ່າ ເມື່ອບໍ່ດົນມານີ້ວ່າ: ແມ່ຍິງບ້ານພັ້ນ ສືບທອດວຽກງານຫັດຖະກໍາມາຈາກ ພໍ່, ແມ່ ຕັ້ງແຕ່ຄາວຍັງນ້ອຍ. ນອກຈາກ ມີຄວາມດຸໝັ່ນໃນການປະກອບອາຊີບຕໍ່າຫູກ-ທໍໄໝ (ຕໍ່າສິ້ນ) ສໍາລັບນຸ່ງເອງ ແລະ ຂາຍອອກ ເພື່ອນໍາລາຍຮັບ ເຂົ້າສູ່ຄອບຄົວແລ້ວ ຍັງໄດ້ປະກອບສ່ວນໃນໜ້າທີ່ວຽກງານພາຍໃນບ້ານຄຽງຄູ່ກັບເພດຊາຍຕື່ມອີກ, ພາຍຫຼັງອົງການກອຍກ້າ ເຂົ້າໄປຊ່ວຍເຫຼືອຫຼາຍຄອບຄົວໄດ້ລວມກັນຈັດຕັ້ງເປັນກຸ່ມ ເພື່ອຊ່ວຍເຫຼືອຊຶ່ງກັນ ແລະ ກັນ, ປັດຈຸບັນພາຍໃນກຸ່ມ ມີຈໍານວນ 150 ກີ່ຕໍ່າຫູກ, ການຄິດໄລ່ຄ່າແຮງງານ ສະເພາະຕໍ່າຕີນສິ້ນ (ແພງສຸດຄ່າມືຊ່າງ 1 ແສນກີບ), ສິ້ນ 1 ຜືນ ລາຄາຂາຍ 350,000 ກີບ ໄໝຫຼາບປົນຝ້າຍຊຽງຂວາງ, ລາຍຮັບຂອງບັນດາສະມາຊິກ 1 ກີ່ ຕໍ່ອາທິດ ບໍ່ຫຼຸດ 5ແສນກີບ, ປະຊາຊົນພາຍໃນບ້ານຖືເອົາວຽກງານຫັດຖະກໍາຕໍ່າຫູກເປັນວຽກສໍາຮອງ, ສ່ວນວຽກງານຫຼັກແມ່ນເຮັດນາປູກເຂົ້າ ແຕ່ກົງກັນຂ້າມວຽກງານຫັດຖະກໍາຕໍ່າຫູກ ຊໍ້າພັດສ້າງລາຍຮັບຫຼັກໃຫ້ກັບຄອບຄົວສະເໝີມາ ທັງເປັນການພັດທະນາຊີວິດການເປັນຢູ່ຂອງບັນດາສະມາຊິກພາຍໃນກຸ່ມກໍຄືຈໍານວນສະມາຊິກພາຍໃນຄອບຄົວມີລາຍຮັບດີຂຶ້ນເປັນກ້າວໆ.
ອົງການກອຍກ້າໃຫ້ການຊ່ວຍເຫຼືອ ກຸ່ມຫັດຖະກໍາບ້ານພັ້ນ ປີ 2023 ເປັນເງິນມູນຄ່າ 636 ລ້ານກວ່າກີບ ເພື່ອປັບປຸງ ແລະ ຕໍ່ຍອດສີມືຂອງຊາວຊ່າງຫັດຖະກໍາທີ່ມີແລ້ວນັ້ນໃຫ້ນັບມື້ພັດທະນາຂຶ້ນຢ່າງບໍ່ຢຸດຢັ້ງ, ພາຍຫຼັງ ໂຄງການສິ້ນສຸດ ປີ 2025, ບັນດາຈໍານວນສະມາຊິກຈະສືບຕໍ່ດໍາເນີນວຽກງານດັ່ງກ່າວນັ້ນໃຫ້ມີຄວາມຍືນຍົງເລື້ອຍໆ ແລະ ຖ້າເປັນໄປໄດ້ຢາກໃຫ້ໂຄງການເຂົ້າໄປຊ່ວຍເຫຼືອ ແລະ ຈັດງານວາງສະແດງພືດກະສິກໍາແບບນີ້ຕື່ມ ຍ້ອນວ່າສິນຄ້າກະສິກໍາຂອງປະຊາຊົນ ທີ່ນໍາມາຂາຍນັ້ນ ໄດ້ມີການຕອບຮັບຈາກລູກຄ້າດີພໍສົມຄວນ.
ທ່ານນາງ ພອນຈັນ ສີພາວົງ ກ່າວຕື່ມວ່າ: ໃນແຜນຕໍ່ໜ້າ ໃນນາມເປັນຮອງຫົວໜ້າກຸ່ມ ຈະນໍາພາສະມາຊິກເອົາໃຈໃສ່ພັດທະນາສີມືຊ່າງໃຫ້ດີຂຶ້ນກວ່າເກົ່າ ພ້ອມກັນນັ້ນກໍຈະສືບຕໍ່ຕໍ່າສິ້ນໃຫ້ຫຼາຍ, ຂາຍສົ່ງອອກ ນໍາລາຍຮັບເຂົ້າສູ່ຄອບຄົວ ສ້າງສະມາຊິກຂອງກຸ່ມ ກໍຄືຄອບຄົວໃຫ້ເຂັ້ມແຂງ, ຖ້າຫາກວ່າທ່ານໃດທີ່ມີຄວາມສົນໃຈ ຢາກຊື້ສິ້ນ ໃນລາຄາຂາຍຍົກເພື່ອນໍາໄປຈໍາໜ່າຍ-ຍ່ອຍ ສາມາດຕິດຕໍ່ໄດ້ທີ່ເບີ 020 99676042.
ຄໍາເຫັນ