 |
ຄວາມໝາຍຄຳວ່າຊ້າງຮຽງເກີຍ:ແມ່ນໄດ້ມີການເລົ່າຂານຕໍ່ກັນມາວ່າ: ສະໄໝກ່ອນແມ່ນການແອບຊ້າງ ກ່ອນເຂົ້າສູ່ສະໜາມຮົບ ເພາະ “ຊ້າງ” ເປັນສັດໃຫຍ່ຄູ່ບ້ານ ຄູ່ເມືອງລາວ, ໃນປາງສົງຄາມ ຄົນສ່ວນໃຫຍ່ແມ່ນນໍາໄຊ້ຊ້າງເປັນພາຫະນະສູ້ຮົບ, ໂດຍມີຄຳເວົ້າບາງຕອນ ໃນພິທີຮຽງເກີຍນັ້ນວ່າ: ສັງກາດ, ສັງຂານໃໝ່, ເຈົ້າຜູ້ໃຫຍ່, ທ້າຍປີ, ທ້າຍເດືອນ, ເຈົ້າມຶງ ໃສ່ເສື້ອສີແຫລ້ ໃຫ້ມຶງຈຳ ເຈົ້າມຶງໃສ່ເສື້ອສີດຳ ໃຫ້ມຶງຈື່, ຈື່ຢ່າລັງ ສັ່ງຢ່າລືມ ຈື່ໃສ່ປຸມພາໄວ້, ຈື່ໃສ່ໄສ້ພານອນ ໃຫ້ເຈົ້າອວ່າຍໜ້າມາສູ່ ໃຫ້ເຈົ້າໝັ້ນຍືນແສນປີ ຄ້ຳບ້ານໝູນເມືອງ ນີ້ແລ.ເວລາອອກສູ້ຮົບນັ້ນ ເຈົ້າຢ່າໄດ້ງວກຊ້າຍ-ງວກຂວາ ໃຫ້ໄປໜ້າຕິກໆ ຄັນໄດ້ຍິນສຽງຄົນຮ້ອງໂຮ່ແຊວ ຢູ່ທາງໜ້າແມ່ນສັດຕູ. ຄຳວ່າ: “ຮຽງ” ໝາຍເຖິງທຽບ, ຕິດ, ແປະ ຍັບເຂົ້າໃສ່ກັນ ແລະຄຳວ່າ “ເກີຍ” ແມ່ນຄຳສັບທີໄດ້ມາຈາກພາສາກືມມຸ ທີໝາຍເຖິງ ລະບຽງ, ເຊຍ ຫຼື ຊານ ຂອງເຮືອນທີຍົກໃຫ້ສູງຂຶ້ນ.
ສຳລັບພິທີຊ້າງຮຽງເກີຍ ຈະມີພຶດພັນທັນຍາຫານຫຼາຍຢ່າງ ໃຫ້ຊ້າງກິນ ເພື່ອສ່ຽງທວາຍການກິນຂອງຊ້າງ ເຊັ່ນ: ຫຍ້າ, ກ້ວຍ, ອ້ອຍ, ຖົ່ວ, ງາ, ເຫຼົ້າ, ເຂົ້າຕົ້ມ, ເຂົ້າໝົມ, ເຂົ້າໂຄບ, ເຂົ້າຂຽບ ແລະອື່ນໆ ຕາມຄວາມເຊື່ອ. ຖ້າປີໃດຊ້າງກິນຫຍ້າ, ກິນກ້ວຍ, ກິນອ້ອຍ ກໍຈະພະຍາກອນວ່າ: ປີນັ້ນ ດິນຟ້າອາກາດ ສະພາບການບ້ານເມືອງ ຈະສະຫງົບສຸກ, ຮົ່ມເຢັນ ນໍ້າຟ້າ-ນ້ຳຝົນກໍຈະອຸດົມສົມບູນ. ຖ້າປີນັ້ນຊ້າງກິນເຫຼົ້າ ກໍຈະພະຍາກອນວ່າ: ບ້ານເມືອງຈະມີອຸປະສັກເຫຼົ່ານີ້ເປັນຕົ້ນ.
 |
ໃນປີນີ້, ໄດ້ມີຂະບວນແຫ່ເລີ້ມຈາກໜ້າຫ້ອງວ່າການແຂວງ ບໍລິເວນສານນໍ້າພຸ ໃຈກາງນະຄອນ ຫຼວງພະບາງ, ມີຊ້າງເຂົ້າຮ່ວມຂະບວນແຫ່ຈຳນວນ 5 ເຊືອກ ຫຼື ໂຕ, ນຳພາຂະບວນໂດຍ ທ່ານ ບຸນເຫຼືອ ສີນໄຊວໍຣະວົງ ປະທານຄະນະກຳມະການປົກຄອງແຂວງຫຼວງພະບາງ, ພ້ອມດ້ວຍການນຳຂອງແຂວງ, ນະຄອນ ຫຼວງພະບາງ, ໂດຍມີການນໍາຊ້າງມາຮຽງເກີຍຢູ່ວັດໃໝ່ ສຸວັນນະພູມມາຣາມ ພ້ອມທັງຈັດພິທີສູ່ຂວັນຊ້າງ ແລະແຫ່ຂະບວນໄປສືບຕໍ່ທຳພິທີ ຢູ່ລານເກີຍຊ້າງວັດຊຽງທອງ ຕື່ມອີກ. ຕະຫຼອດໄລຍະຂະບວນແຫ່ ມີມວນຊົນ, ແຂກທັງພາຍໃນ ແລະຕ່າງປະເທດ ຮ່ວມຊົມຢ່າງຫຼວງຫຼາຍ.
(ແຫຼ່ງຂ່າວ: ແຂວງຫຼວງພະບາງ)
ຄໍາເຫັນ