ທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກໍາ ແລະ ການຄ້າ ນວ, ໄດ້ສະເໜີໃນກອງປະຊຸມສະໄໝສາມັນເທື່ອທີ 7 ສະພາປະຊາຊົນນະຄອນຫຼວງວຽງຈັນ ຊຸດທີ II ວ່າ: ນວ ມີເນື້ອທີ່ທັງໝົດ 392.000 ເຮັກຕາ ໃນນັ້ນ: ມີເນື້ອທີ່ປົກຫຸ້ມປ່າໄມ້ 109.659 ເຮັກຕາ ກວມເອົາ 29,3% ແລະ ດິນກະສິກຳ 178.818 ເຮັກຕາ ກວມເອົາ 45% ຂອງເນື້ອທີ່ທັງໝົດ (ດິນນາ 111.823 ເຮັກຕາ, ພືດອາຍຸສັ້ນ 45.093 ເຮັກຕາ, ພືດອາຍຸຍາວ 18.770 ເຮັກຕາ ແລະ ທົ່ງຫຍ້າລ້ຽງສັດ 3.132 ເຮັກຕາ), ໂດຍສະເພາະການຊຸກຍູ້ສົ່ງເສີມແມ່ນໄດ້ເນັ້ນໃສ່ພືດຫຼັກທີ່ເປັນສະບຽງ ແລະ ສົ່ງອອກ ເຊັ່ນ: ເຂົ້າ, ພືດຜັກ, ສາລີ, ມັນຕົ້ນ, ໝາກກ້ວຍ, ໝາກມີ້, ໝາກໂມ, ໄຂ່ໄກ່, ໝູ, ປານິນລ້ຽງໃສ່ກະຊັງ. ສິນຄ້າອຸດສາຫະກຳປຸງແຕ່ງປະເພດສະບຽງອາຫານ ເພື່ອຮັບປະກັນການສະໜອງສະບຽງອາຫານ ໃຫ້ແກ່ສັງຄົມໃຫ້ພຽງພໍ ໃນນະຄອນຫຼວງວຽງຈັນ, ມີສ່ວນແຮໄວ້ ແລະ ເປັນສິນຄ້າສົ່ງອອກ.
ສິນຄ້າອຸດສາຫະກຳປຸງແຕ່ງສະບຽງອາຫານ: ນໍ້າດື່ມບໍລິສຸດ, ນໍ້າປາແດກ, ລູກຊີ້ນ, ໃສ່ອົ້ວ, ໝູຝອຍ, ແຈ່ວພັນປາ, ນໍ້າອັດລົມ, ສິນຄ້າກະສິກຳ: ການຜະລິດເປັນສິນຄ້າແມ່ນໄດ້ປະຕິບັດຕາມ 10ໂຄງການຄື: ໂຄງການຜະລິດງົວຊີ້ນ; ໂຄງການປູກເຂົ້າອິນຊີ (OA) ແລະ ເຂົ້າທີ່ດີ (GAP), ໂຄງການປູກເຂົ້າຈ້າວເປັນສິນຄ້າປ້ອນໂຮງງານ ອຸດສາຫະກຳປຸງແຕ່ງ, ໂຄງການປູກພືດຜັກອິນຊີ (OA) ແລະ ພືດຜັກທີ່ດີ (GAP), ໂຄງການປູກສາລີ ອາຫານສັດເປັນສິນຄ້າ, ໂຄງການປູກມັນຕົ້ນ ແລະ ອອ້ຍ ເປັນສິນຄ້າ, ໂຄງການປູກໝາກໄມ້ຄຸນນະພາບຕາມມາດຕະຖານ GAP ເປັນສິນຄ້າພາຍໃນ ແລະ ສົ່ງອອກ, ໂຄງການລ້ຽງໝູເປັນສິນຄ້າ, ໂຄງການລ້ຽງສັດປີກເປັນສິນຄ້າ, ໂຄງການລ້ຽງປາ ແລະ ສັດນໍ້າ; ພົ້ນເດັ່ນດ້ານປູກຝັງ ແມ່ນການປູກມັນຕົ້ນໄດ້ 3.517 ເຮັກຕາ, ການປູກເຂົ້າທີ່ດີ (GAP) ປະຕິບັດໄດ້ 4.012ໂຕນ, ການປູກພືດຜັກອິນຊີ(OA) ຜົນຜະລິດໄດ້ 2.390ໂຕນ, ການປູກກ້ວຍເປັນສິນຄ້າ ແມ່ນສືບຕໍ່ ບົວລະບັດຮັກສາສວນກ້ວຍທີ່ປູກຜ່ານມາໃນເນື້ອທີ່ 3.163 ເຮັກຕາ ເທົ່າກັບ 98% ຂອງເນື້ອທີ່ແຜນການ (3.225 ເຮັກຕາ), ຜົນຜະລິດ 126.520ໂຕນ; ການປູກສາລີປະຕິບັດໄດ້ 1.733 ໂຕນ. ສ່ວນການປູກເຂົ້າອິນຊີ(OA) ແມ່ນຈະປະຕິບັດໃນລະດູຝົນ. ພົ້ນເດັ່ນດ້ານການລ້ຽງສັດມີ: ການລ້ຽງໄກ່ພັນໄຂ່ ຊຶ່ງສາມາດຕອບສະໜອງພາຍໃນ ນວ ໄດ້ຢ່າງພຽງພໍ ແລະ ສົ່ງອອກໄປຕ່າງແຂວງໄດ້ 908ໂຕນ ລວມມູນຄ່າ 27 ຕື້ກີບ; ການລ້ຽງປານິນໃນກະຊັງ ສະໜອງຄວາມຕ້ອງການປານິນ ໃຫ້ ນວ ໄດ້ຢ່າງພຽງພໍ ແລະ ສົ່ງອອກໄປຕ່າງແຂວງໄດ້ 13 ໂຕນ/ມື້ ເທົ່າກັບ 2.340 ໂຕນໃນ 6 ເດືອນ ລວມມູນຄ່າ 93 ຕື້ກີບ; ຜະລິດຕະພັນກະສິກຳສົ່ງອອກໄປຕ່າງແຂວງ ແລະ ຕ່າງປະເທດ ຄື: ດ້ານປູກຝັງໄດ້ສົ່ງອອກ ທັງໝົດ 50.016 ໂຕນ ລວມເປັນມູນຄ່າ 23.351.420 ໂດລາ; ດ້ານການລ້ຽງສັດ ໄດ້ສົ່ງງົວຈໍາ ນວນ 273 ໂຕ ໄປຕ່າງແຂວງ ລວມມູນຄ່າ 204.500 ໂດລາ; ດ້ານປ່າໄມ້ໄດ້ສົ່ງຜະລິດຕະພັນໄມ້ສຳເລັດຮູບ ແລະ ເຄື່ອງປ່າຂອງດົງ ລວມມູນຄ່າ 857.754 ໂດລາ, ມູນຄ່າທັງໝົດ 24.413.674 ໂດລາ, ການນໍາເຂົ້າດ້ານປູກຝັງ 103.776 ໂຕນ ມູນຄ່າ 49.073.985 ໂດລາ, ການນໍາເຂົ້າແນວພັນສັດ-ປາ ຈຳນວນ 2.232.500 ໂຕ, ຜະລິດຕະພັນສັດ ແລະ ສັດນໍ້າ ຈໍານວນ 542 ໂຕນ ລວມມູນຄ່າ 4.560.000 ໂດລາ, ດຸ່ນດ່ຽງການນໍາເຂົ້າ-ສົ່ງອອກ ພາກກະສິກຳ ເຫັນວ່າມູນຄ່າການນໍາເຂົ້າຍັງສູງກວ່າການສົ່ງອອກຢູ່ 29,2 ລ້ານກວ່າໂດລາ.
ສິນຄ້າອຸດສາຫະກຳປຸງແຕ່ງ: ສໍາເລັດການຈົດທະບຽນເຄື່ອງໝາຍການຄ້າ ຍີ່ຫຍໍ້ຊີ້ນງົວ ນວ ແລະ ສຳເລັດຮ່າງຄໍາແນະນໍາວ່າດ້ວຍການນໍາໃຊ້ເຄື່ອງໝາຍການຄ້າຜະລິດຕະພັນຊີ້ນງົວ ນວ, ສືບຕໍ່ຊຸກຍູ້ຕິດ ຕາມການຜະລິດຂອງໂຮງງານຜະລິດນໍ້າດື່ມອາເມຊິງເອັມມະເຣດ ໃນການຜະລິດນໍ້າດື່ມແຮ່ທາດ ສໍາລັບແຜນການສົ່ງອອກ 179.712 ເຮັກໂຕລິດຕໍ່ປີ ແມ່ນສົ່ງອອກໄປຕ່າງປະເທດ ໄທ ແລະ ຈີນ ນອກຈາກນີ້, ກໍໄດ້ເອົາໃຈໃສ່ການຜະລິດເປັນສິນຄ້າເພື່ອສົ່ງອອກ, ໂຮງງານຜະລິດອາຫານ ແລະ ເຄື່ອງດື່ມ ມີຈໍານວນ 681 ຫົວໜ່ວຍ. ນອກຈາກນີ້ ຍັງໄດ້ລົງຊຸກຍູ້ສົ່ງເສີມການຜະລິດເພື່ອທົດແທນການນໍາເຂົ້າ ປະເພດສິນຄ້າອຸດສາຫະກຳປຸງແຕ່ງ ຈໍານວນ 18 ລາຍການ, ອົງການປົກຄອງໄດ້ເອົາໃຈໃສ່ຊຸກຍູ້ສົ່ງເສີມການຄໍ້າປະກັນສະບຽງອາຫານເພື່ອສະໜອງໃຫ້ພຽງພໍຈໍານວນ 8 ລາຍການ, ສາມາດຂຶ້ນແຜນດຸ່ນດ່ຽງສິນຄ້າສະບຽງອາຫານພາຍໃນນະຄອນຫຼວງວຽງຈັນ ຊຶ່ງໄດ້ກຳນົດຂອບເຂດພື້ນທີ່ປູກ ແລະ ສ້າງແຜນຜົນຜະລິດ ເຊັ່ນ: ເຂົ້າກິນ, ຜັກບົ່ວ, ຫອມປ້ອມ, ຫອມລາບ, ໝາກເຂືອ, ໝາກແຕງ, ໝາກເພັດ, ຜັກບົ້ງ; ທົ່ວນະຄອນຫຼວງວຽງຈັນມີກຸ່ມການຜະລິດດ້ານກະສິກຳ ຈໍານວນ 143 ກຸ່ມ, ມີສະຫະກອນ 8 ສະຫະກອນໃນນີ້ໂຄງການຜະລິດເປັນສິນຄ້າ (ເງິນກູ້ຢືມຈາກທະນາຄານໂລກ) ໄດ້ຊຸກຍູ້ສົ່ງເສີມ ຕ່ອງໂສ້ການຜະລິດ ແລະ ການຕະຫຼາດ ສາມາດສ້າງສາຍສຳພັນການຮ່ວມມື ລະຫວ່າງຜູ້ຜະລິດ ແລະ ຜູ້ປະກອບການໂຮງສີເຂົ້າໄດ້ 6 ຫົວໜ່ວຍ ແລະ 1 ຫົວໜ່ວຍແມ່ນຜູ້ປະກອບການເກັບຊື້ຜັກ, ຊຸກຍູ້ກຸ່ມການຜະລິດຊາວກະສິກອນ ໃນການສະໜັບສະໜູນລະບົບການຕະຫຼາດ, ການພັດທະນາແຜນການທຸລະກິດ ເພື່ອຮັບຮອງ NOL ຈາກ ທະນາ ຄານໂລກ 7 ຫົວໜ່ວຍ ສາມາດປະຕິບັດໄດ້ 4 ຫົວໜ່ວຍ ມູນຄ່າ: 176.750 ໂດລາ ແລະ ຍັງສືບຕໍ່ 3 ຫົວໜ່ວຍໃຫ້ສໍາເລັດ, ສໍາເລັດການຈັບຄູ່ລົງນາມເຊັນສັນຍາຮ່ວມມືການຊື້-ຂາຍ ເຂົ້າ ແລະ ຜັກ ລະຫວ່າງຜູ້ປະກອບການທຸລະກິດກັບກຸ່ມການຜະລິດເຂົ້າເປັນສິນຄ້າ, ແນວພັນເຂົ້າ ແລະ ກຸ່ມຜະລິດຜັກ ເປັນສິນຄ້າ ຈໍານວນ 54 ສັນຍາ ໃນນີ້: ຜູ້ປະກອບການໂຮງສີເຂົ້າກັບ ກຸ່ມການຜະລິດເຂົ້າ ແລະ ແນວພັນເຂົ້າ ຈໍານວນ 49 ສັນຍາ ແລະ ຜູ້ປະກອບການເກັບຊື້ຜັກກັບກຸ່ມຜະລິດຜັກ ຈຳນວນ 5 ສັນຍາ; ຫົວໜ່ວຍທຸລະກິດຜະລິດສິນຄ້າໃຫ້ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນ ທົ່ວ ນວ ແລະ ຂັ້ນເມືອງ ມາຮອດທ້າຍປີ 2023 ສາມາດຊຸກຍູ້ໄດ້ 68 ຫົວໜ່ວຍ ຈຳນວນ 289 ຜະລິດຕະພັນສິນຄ້າ ໃນຈໍານວນ 61 ບ້ານໃນ 9 ເມືອງ ໂດຍແຍກອອກເປັນປະເພດຜະລິດຕະພັນ ຄື: ຜະລິດຕະພັນສິນຄ້າປະເພດ ອາຫານ ແລະ ເຄື່ອງດື່ມ ມີຈໍານວນ 23 ຫົວໜ່ວຍ, 60 ຜະລິດຕະພັນ.
ອັນພົ້ນເດັ່ນໃນການສົ່ງອອກເປີດຕະຫຼາດໃໝ່ ມີ 1 ຫົວໜ່ວຍ ໂຮງສີເຂົ້າ ນາງ ບຸນຮຽງ ສາມາດສົ່ງເຂົ້າສານໄປ ປະເທດຝຣັ່ງ ຈໍານວນ 75 ໂຕນ ມູນຄ່າ 75.000 ໂດດາ ແລະ ປະເທດເບນຊິກ ຈຳນວນ 250 ໂຕນ ມູນຄ່າ 145.000 ໂດລາ ແລະ ມີແຜນສົ່ງເຂົ້າອອກໄປປະເທດ ອາເມຣິກາ ຈໍານວນ 900ໂຕນ ແລະ ວຽກງານອື່ນໆ. ການຄຸ້ມຄອງການນໍາເຂົ້າ ແລະ ສົ່ງອອກສິນຄ້າ: ຕົວເລກການສົ່ງອອກສະບຽງອາຫານ 6 ເດືອນຕົ້ນປີ 2024 ມີມູນຄ່າ 3.540.245 ໂດລາ, ສົ່ງອອກໄປປະເທດ: ຈີນ, ໄທ, ເຢຍລະມັນ, ເບນຊິກ, ເກົາຫຼີ, ຝຣັ່ງ; ຕົວເລກການນໍາເຂົ້າສະບຽງອາຫານ 6 ເດືອນຕົ້ນປີ 2024 ມີມູນຄ່າ 7.842.664,64 ໂດລາ, ນໍາເຂົ້າຈາກປະເທດ: ໄທ, ຈີນ, ຍີ່ປຸ່ນ, ອາເມຣິການ, ເກົາຫຼີ, ອົດສະຕຣາລີ, ອິນເດຍ, ມາເລເຊຍ, ໄຕ້ຫວັນ, ຝຣັ່ງ, ມຽນມາ, ການາດາ ແລະ ນິວຊີແລນ.
ຄໍາເຫັນ