ໂຮມຊຸມນຸມສະເຫຼີມສະຫຼອງ 40 ປີ ວັນສ້າງຕັ້ງແຂວງບໍລິຄໍາໄຊ

ແຂວງບໍລິຄຳໄຊໄດ້ຈັດພິທີໂຮມຊຸມນຸມສະເຫຼີມສະຫຼອງ 40 ປີວັນສ້າງຕັ້ງແຂວງຂຶ້ນໃນວັນທີ 6 ມີນານີ້ ທີ່ເດີ່ນອະນຸສອນສະຖານທ່ານ ສີສົມພອນ ລໍວັນໄຊ ໂດຍການເປັນກຽດເຂົ້າຮ່ວມຂອງທ່ານນາງ ສີໃສ ລືເດດມູນສອນ ກຳ ມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ, ທ່ານນາງ ສວນສະຫວັນ ວິຍະເກດ ກໍາມະການສູນກາງພັກ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ,
ໂດຍການເປັນປະທານຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນໍາຂັ້ນສູນກາງ, ຂັ້ນແຂວງ, ແຂກຖຶກເຊີນພາຍໃນ-ຕ່າງປະເທດທີ່ກ່ຽວຂ້ອງເຂົ້າຮ່ວມ.
ທ່ານ ກອງແກ້ວ ໄຊສົມຄາມ ໄດ້ຍົກໃຫ້ເຫັນມູນເຊື້ອປະຫວັດສາດອັນລະອິດລະອ້ຽວແຫ່ງການຕໍ່ສູ້ຂອງປະຊາ ຊົນບັນດາເຜົ່າຊາວແຂວງບໍລິຄໍາໄຊນັບແຕ່ວັນທີ 6 ມີນາ 1984 ມື້ສ້າງຕັ້ງແຂວງບໍລິຄຳໄຊຈົນເຖິງປັດຈຸບັນ. ຕະຫຼອດໄລຍະ 40 ປີຜ່ານມາ. ສາມາດເວົ້າໄດ້ວ່າ “ ມີອະດີດຈຶ່ງມີປັດຈຸບັນ, ມີມື້ນັ້ນຈຶ່ງມີມື້ນີ້ ແລະ ມື້ຕໍ່ໆໄປ ”. ຈາກພື້ນຖານປັດໄຈດັ່ງກ່າວນັ້ນ ການນໍາແຕ່ລະຮຸ່ນ, ແຕ່ລະສະໄໝໄດ້ຍົກສູງຄວາມຮັບຜິດຊອບຂອງຕົນ ພ້ອມກັນຜ່ານຜ່າຄວາມຫຍຸ້ງຍາກນາໆປະການເຮັດໃຫ້ແຂວງບັນລຸໄດ້ຜົນສຳເລັດທີ່ໜ້າພາກພູມໃຈ ເຮັດໃຫ້ໂສມໜ້າໃໝ່ຂອງແຂວງມີການປ່ຽນແປງດີຂຶ້ນເປັນກ້າວໆມາ. ພົ້ນເດັ່ນແມ່ນການສ້າງຮາກຖານການເມືອງ ພັດທະນາຊົນນະບົດຮອບດ້ານແກ້ໄຂຄວາມທຸກຍາກຂອງປະຊາຊົນ ຕິດພັນກັບການແກ້ໄຂຄວາມບໍ່ສະຫງົບຕາມທິດຊີ້ນໍາທີ່ວ່າ: 1+2+3+4; 6 ທາງເວັ້ນ, 7 ທາງອອກ, ແກ້ໄຂ 4 ເຖື່ອນ 9 ຫົວຂໍ້ວິທະຍາສາດ, ພິເສດແມ່ນແກ້ໄຂການດຳລົງຊີວິດເລື່ອນລອຍຂອງປະຊາຊົນ ຊຶ່ງໄດ້ກາຍເປັນບົດຮຽນໃຫ້ແກ່ບ່ອນອື່ນໆ. ຜົນສຳເລັດດັ່ງກ່າວໄດ້ມີບຸກຄົນ, ກົມກອງລວມໜູ່ໄດ້ຮັບການຍ້ອງຍໍຈາກສູນກາງຫຼາຍລະດັບ, ແຂວງໄດ້ຮັບຫຼຽນໄຊອິດສະຫຼະ 1 ໜ່ວຍ, ຫຼຽນໄຊພິລະອາດຫານຊັ້ນ I ສາມໜ່ວຍ, ຫຼຽນໄຊພິລະອາດຫານຊັ້ນ II ສອງໜ່ວຍ, ຫຼຽນໄຊພິລະອາດຫານຊັ້ນ III ໜຶ່ງໜ່ວຍ ແລະ ຫຼຽນໄຊແຮງງານຊັ້ນ I ໜຶ່ງໜ່ວຍ ແລະ ຊັ້ນ II ສາມໜ່ວຍຢ່າງສົມກຽດ; ໄດ້ປະກາດເປັນແຂວງຈົບມັດທະຍົມຕອນຕົ້ນໃນປີ 2018 ແລະ ປະກາດເປັນແຂວງຢຸດຕິການຖ່າຍຊະຊາຍເປັນແຂວງທໍາອິດຂອງປະເທດໃນປີ 2020.
    ໃນປີ 2023 ເຖິງແມ່ນວ່າສະພາບການຂອງໂລກ ແລະ ພາກພື້ນຍັງສືບຕໍ່ຜັນແປໄປຢ່າງສັບສົນຈາກສະພາບດັ່ງກ່າວຢູ່ພາຍໃນປະເທດກໍຄືແຂວງບໍລິຄໍາໄຊ ຍັງສືບຕໍ່ປະເຊີນໜ້າກັບສະພາບຄວາມຫຍຸ້ງຍາກໃນຫຼາຍດ້ານ. ແຕ່ເຖິງຢ່າງໃດກໍຕາມ ຄະນະພັກ-ອົງການປົກຄອງທຸກຂັ້ນໄດ້ເອົາໃຈໃສ່ນໍາພາ-ຊີ້ນຳການພັດທະນາເສດຖະກິດ ຕິດພັນກັບການພັດທະນາສັງຄົມ ແລະ ການປ້ອງກັນຊາດ-ປ້ອງກັນຄວາມສະຫງົບ, ຖືເອົາການຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດາຮອບດ້ານ; ສຸມໃສ່ສ້າງບ້ານ ແລະ ກຸ່ມບ້ານພັດທະນາແກ້ໄຂຄວາມທຸກຍາກເປັນໃຈກາງພື້ນ ຖານໂຄງລ່າງໄດ້ຮັບການພັດທະນາ ເຮັດໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ ຈັງຫວະການເຕີບໂຕຂອງ GPP ໂດຍສະເລ່ຍແລ້ວ 5,27% ຕໍ່ປີ ລວມຍອດຜະລິດຕະພັນພາຍໃນບັນລຸໄດ້ 11.004 ຕື້ກີບ, ສະເລ່ຍລາຍຮັບຕໍ່ຄົນ 33 ລ້ານ ຫຼື ເທົ່າກັບ 1.631 ໂດລາ; ການລົງທຶນຂອງລັດກວມ 13,6% ຂອງ GPP; ລາຍຮັບເຂົ້າງົບປະມານ ປະຕິບັດໄດ້ລື່ນແຜນ 29,91%; ສະເລ່ຍເຂົ້າກິນ 418 ກິໂລຕໍ່ຄົນ, ການຜະລິດພືດເປັນສິນຄ້າປະຕິບັດໄດ້ລື່ນແຜນ 68,19%; ການຜະລິດຊີ້ນ-ປາ-ໄຂ່ເພື່ອບໍລິໂພກ ປະຕິບັດໄດ້ 58,53 ກິໂລຕໍ່ຄົນ/ປີ ເທົ່າກັບ 95,95% ຂອງແຜນ ການປີ, ບ້ານມີເສັ້ນທາງເຂົ້າເຖິງກວມ 100% ໃນທົ່ວແຂວງ, ປະຊາຊົນຊົມໄຊ້ໄຟຟ້າຖາວອນ ກວມ 99,25% ຂອງຄອບຄົວ ແລະ 100% ຂອງຈໍານວນບ້ານທັງໝົດ; ທົ່ວແຂວງມີລະບົບສັນຍານມືຖື ກວມ 99,64% ເຮັດໃຫ້ມີຄວາມສະດວກສະບາຍໃນການສື່ສານ; ການລຶບລ້າງຄວາມທຸກຍາກ ປັດຈຸບັນມີຄອບຄົວພົ້ນທຸກແລ້ວ ກວມ 96,09%, ບ້ານພົ້ນທຸກ ກວມ 92,96%;  ມີ 5 ເມືອງເປັນເມືອງພົ້ນທຸກ, ຄອບຄົວພັດທະນາ ກວມ 87,34%; ບ້ານພັດທະນາ ກວມ 79,57%, ປະກາດຮັບຮອງເອົາ 4 ບ້ານເປັນບ້ານໃຫຍ່ສີສັນຕົວເມືອງໃນຊົນນະບົດຄື: ບ້ານຜາເມືອງ ເມືອງບໍລິຄັນ, ບ້ານວຽງຄໍາ, ບ້ານທົ່ງນາມີ ເມືອງປາກກະດິງ ແລະ ບ້ານຈອມທອງ ເມືອງວຽງທອງ; ການສ້າງແຂວງເປັນຫົວໜ່ວຍຍຸດທະສາດ ສາມາດບັນລຸ 6 ດ້ານ ແລະ 57 ຕົວຊີ້ວັດ ເທົ່າກັບ 86,36%. ລະບົບການສຶກສາໄດ້ຮັບການປັບປຸງຍົກລະດັບທາງດ້ານຄຸນນະພາບຂອງການຮຽນ-ການສອນ, ການຈັດຕັ້ງປະຕິບັດ 11  ຕົວຊີ້ບອກສາມາດບັນລຸ 10 ຕົວຊີ້ບອກ; ວັດທະນະທໍາ-ຮີດຄອງອັນດີງາມຂອງປະຊາຊົນບັນດາເຜົ່າໄດ້ຮັບການອະນຸລັກ ແລະ ພັດທະນາດີຂຶ້ນເທື່ອລະກ້າວ, ຄອບຄົວວັດທະນະທໍາ ກວມ 90,26%, ບ້ານວັດທະນະທໍາ ກວມ 99,64%; ສົ່ງເສີມການພັດທະນາສີມືແຮງງານ, ປົກປ້ອງ ແລະ ຄຸ້ມຄອງແຮງງານໃຫ້ມີຄວາມຍຸຕິທໍາ ແລະ ປອດໄພ, ປະຕິບັດລະບອບນະໂຍບາຍຕໍ່ພະນັກງານ-ລັດຖະກອນ, ບໍານານ, ຜູ້ເສຍອົງຄະຕາມລະ ບຽບກົດໝາຍ ແລະ ວຽກງານອື່ນໆໄດ້ຮັບການປັບປຸງໃຫ້ດີຂຶ້ນເປັນກ້າວໆ. 
ໂອກາດນີ້, ທ່ານນາງ ສີໃສ ລືເດດມູນສອນ ໄດ້ໃຫ້ກຽດມີຄຳເຫັນເນັ້ນໜັກບາງຕອນສຳຄັນເພື່ອສືບຕໍ່ນຳພາແຂວງບໍລິຄໍາໄຊໃຫ້ມີການຫັນປ່ຽນຢ່າງຕັ້ງໜ້າ ແລະ ມີການພັດທະນາຢ່າງບໍ່ຢຸດຢັ້ງນັ້ນສິ່ງສຳຄັນຕ້ອງເພີ່ມທະວີການສຶກສາອົບຮົມການເມືອງ-ແນວຄິດໃຫ້ສະມາຊິກພັກ-ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າທຸກຊັ້ນຄົນໃຫ້ຮັບຮູ້ເຂົ້າໃຈເຖິງຜົນງານທີ່ເປັນມູນເຊື້ອການນໍາພາ-ຊີ້ນໍາຂອງພັກໃນພາລະກິດປົກປັກຮັກສາ ແລະ ກໍ່ສ້າງລະບອບປະຊາທິປະໄຕ ປະຊາຊົນຕາມຈຸດໝາຍສັງຄົມນິຍົມ ພ້ອມກັນສືບສານມູນເຊື້ອອັນພິລະອາດຫານ 40 ປີແຂວງບໍລິຄໍາໄຊເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາແຂວງບໍລິຄໍາໄຊໃຫ້ໄດ້ຮັບການພັດທະນາໃນທຸກດ້ານຕາມຄໍາ ຂວັນທີ່ກໍານົດໄວ້ວ່າ: “ເພີ່ມທະວີບົດບາດການນໍາພາຂອງພັກ, ເສີມຂະຫຍາຍມູນເຊື້ອຄວາມສາມັກຄີ, ສ້າງການຫັນປ່ຽນສູ່ການພັດທະນາທີ່ເຂັ້ມແຂງ ແລະ ຍືນຍົງ”; ສືບຕໍ່ຄົ້ນຄວ້າກຳແໜ້ນບັນດາແນວທາງ, ແຜນນະໂຍບາຍຂອງພັກວາງອອກໂດຍສະເພາະມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ 5 ປີ ຄັ້ງທີ IX, ມະຕິກອງປະຊຸມໃຫຍ່ຄັ້ງທີ VIl ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ V ຂອງແຂວງບໍລິຄໍາໄຊໃຫ້ເລິກເຊິ່ງ; ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃນຊຸມປີທີ່ຍັງເຫຼືອຮອດທ້າຍສະໄໝ; ສືບຕໍ່ຍູ້ແຮງການລົງທຶນທັງພາຍໃນ ແລະ ຕ່າງປະເທດ ເພື່ອຂະຫຍາຍແຫຼ່ງລາຍຮັບໃຫ້ຫຼາຍກວ່າເກົ່າ; ສືບຕໍ່ຢືດໝັ້ນໃນທິດນໍາກ່ຽວກັບການພັດທະນາແບບກົມກຽວ ແລະ ຍືນຍົງລະຫວ່າງການພັດທະນາເສດຖະກິດ ກັບການພັດທະນາວັດທະນະທໍາ-ສັງຄົມ ແນໃສ່ບັນລຸເປົ້າໝາຍເຮັດໃຫ້ປະຊາຊົນແຂວງບໍລິຄໍາໄຊມີເງື່ອນໄຂໄດ້ຮັບການ ພັດທະນາໃນທຸກດ້ານເພື່ອປົກປັກຮັກສາ ແລະ ພັດທະນາແຂວງບໍລິຄໍາໄຊໃຫ້ບັນລຸຕາມວິໄສທັດທີ່ກຳານົດໄວ້ວ່າ: “ສ້າງແຂວງບໍລິຄໍາໄຊເປັນປະຕູເສດຖະກິດ, ແຫຼ່ງຜະລິດພະລັງງານ, ບໍລິການທາງຜ່ານ ແລະ ຄຸ້ມຄອງສິ່ງແວດລ້ອມແບບຍືນຍົງ”; ສືບຕໍ່ເຜີຍແຜ່, ເຊື່ອມຊຶມ ແລະ ຜັນຂະຫຍາຍຜົນສຳເລັດ 40 ປີການສ້າງຕັ້ງແຂວງບໍລິຄໍາໄຊໃຫ້ທົ່ວເຖິງທຸກ ເປົ້າໝາຍຮອດຮາກຖານ, ສືບຕໍ່ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກດ້ວຍການກໍາແໜ້ນບາດກ້າວ, ຂັ້ນຕອນ, ວິທີການຈັດຕັ້ງປະຕິບັດແຕ່ລະວຽກໃຫ້ລະອຽດ. 
ຂ່າວ: ພູວັນ, ພາບ: ແສງຈັນ