ຮອງຫົວໜ້າ ຄອສພ ສຳເລັດການລົງຕິດຕາມ ຊຸກຍູ້ວຽກງານແນວຄິດ-ຫາງສຽງສັງຄົມ ຢູ່2 ແຂວງ

ໃນລະຫວ່າງໃນວັນທີ 13-18 ພະຈິກ ຜ່ານມາ, ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກຮອງຫົວໜ້າຄະນະໂຄສະນາອົບຮົມສູນກາງພັກ(ຄອສພ) ໄດ້ເຄື່ອນໄຫວເຮັດວຽກ ຢູ່ແຂວງໄຊຍະບູລີ ແລະ ແຂວງຜົ້ງສາລີ; ຈຸດປະສົງຂອງການເຄື່ອນໄຫວໃນຄັ້ງນີ້ກໍເພື່ອຕິດຕາມ, ເກັບກຳສະພາບແນວຄິດ-ຫາງສຽງສັງຄົມທີ່ພົ້ນເດັ່ນ ທີ່ເກີດຂຶ້ນຢູ່ໃນແຕ່ລະທ້ອງຖິ່ນໃນການຈັດຕັ້ງປະຕິບັດແນວທາງ, ແຜນນະໂຍບາຍຂອງພັກ, ກົດໝາຍ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ lXຂອງລັດ ກໍຄືແຜນພັດທະນາເສດຖະກິດ-ສັງຄົມຂອງທ້ອງຖິ່ນໃນແຕ່ລະໄລຍະ; ພ້ອມກັນນັ້ນ ກໍຍັງເປັນການຕິດຕາມ, ເກັບກຳສະພາບແນວຄິດ-ຫາງສຽງສັງຄົມຂອງຖັນແຖວພະນັກງານ-ລັດຖະກອນ, ນັກຮົບ ແລະ ປະຊາຊົນບັນດາເຜົ່າຕໍ່ສະພາບຫຍຸ້ງຍາກ ແລະ ບັນຫາເຄັ່ງຮ້ອນທີ່ປະເທດເຮົາພວມປະເຊີນໜ້າໃນປັດຈຸບັນ ເພື່ອຊອກວິທີການສຶກສາອົບຮົມນໍາພາແນວຄິດ, ຊີ້ແຈງອະທິບາຍ ແລະ ມີມາດຕະການແກ້ໄຂຢ່າງຖືກຕ້ອງ, ສອດຄ່ອງ ແລະ ທັນການ.
ໃນໂອກາດດຽວກັນ ທ່ານຮອງຫົວໜ້າຄອສພກໍຍັງໄດ້ຮ່ວມເຮັດວຽກກັບຄະນະໂຄສະນາອົບຮົມແຂວງ ແລະ ບັນດາຫົວໜ້າ, ຮອງຫົວໜ້າຄະນະໂຄສະນາອົບຮົມເມືອງ ເພື່ອຕິດຕາມ, ຊຸກຍູ້ ແລະ ຮັບຟັງການລາຍງານສະພາບການຈັດຕັ້ງປະຕິບັດວຽກງານໂຄສະນາອົບຮົມ ກໍຄືການຈັດຕັ້ງຜັນຂະຫຍາຍມະຕິເລກທີ 206/ກມສພ ວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່, ມະຕິກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V, ຄໍາສັ່ງເລກທີ 04/ຄລສພ ວ່າດ້ວຍການເພີ່ມທະວີວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່, ຫຼັງຈາກນັ້ນ ກໍໄດ້ເຂົ້າພົບປະການນຳຂອງເມືອງ, ດ່ານສາກົນ, ບໍລິສັດຕົວແບບໃນການດຳເນີນທຸລະກິດ, ຢ້ຽມຢາມບ້ານຕົວແບບດ້ານການທ່ອງທ່ຽວທີ່ປະຊາຊົນມີສ່ວນຮ່ວມ ແລະ ຕົວແບບດ້ານອື່ນໆອີກຈຳນວນໜຶ່ງ.
(ພາບ-ຂ່າວ: ສູນທອນ)