ເພື່ອແນໃສ່ເຮັດໃຫ້ການເປີດຂະບວນແຂ່ງຂັນຍ້ອງຍໍຮັກຊາດ ແລະ ພັດທະນາໃນໄລຍະໃໝ່ນີ້ເປັນຂະບວນຟົດຟື້ນ-ຕໍ່ເນື່ອງ ແລະ ຊອກໃຫ້ເຫັນບຸກຄົນທີ່ດີເດັ່ນໃນການຈັດຕັ້ງປະຕິບັດໜ້າທີ່ວຽກງານໃນແຕ່ລະໄລຍະ ທັງຮັບປະກັນໃຫ້ໄດ້ຕາມ 4 ຄາດໝາຍລວມຄື: ໃຫ້ໄວ, ໃຫ້ດີ, ໃຫ້ຫຼາຍ ແລະ ຖືກກົດໜາຍ. ດັ່ງນັ້ນ, ຫ້ອງການເຕັກໂນໂລຊີ ແລະ ການສື່ສານເມືອງຫົງສາ ແຂວງໄຊຍະບູລີ ໄດ້ເປີດຂະບວນການແຂ່ງຂັນຮັກຊາດ ແລະ ພັດທະນາໃນໄລຍະໃໝ່ຂຶ້ນ ຫວ່າງບໍ່ດົນມານີ້ ທີ່ຫ້ອງປະຊຸມຫ້ອງການສາທາລະນະສຸກເມືອງ. ໃຫ້ກຽດເຂົ້າຮ່ວມເປັນປະທານ ຂອງທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ຜູ້ຊີ້ນຳວຽກງານເສດຖະກິດເມືອງ, ມີທ່ານ ນາງ ຄຳພັນ ຈັນທະລັງມາ ຫົວໜ້າຫ້ອງການເຕັກໂນໂລຊີ ແລະ ການສື່ສານເມືອງ ແລະ ເຂົ້າຮ່ວມມີຮອງຫ້ອງການ, ຫົວໜ້າ-ຮອງຫົວໜ້າໜ່ວຍງານ ແລະ ຫົວໜ້າ-ຮອງຫົວໜ້າໜ່ວຍງານສູນບໍລິການທາງດ້ານໂທລະຄົມເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ນາງ ຄຳພັນ ຈັນທະລັງມາ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາຂອງຫ້ອງການ ໃນໄລຍະ 5 ປີຜ່ານມາ ແລະ ພ້ອມທັງຜ່ານແຜນການແຂ່ງຂັນຮັກຊາດ ແລະ ພັດທະນາຮອດປີ 2025 ຊຶ່ງທ່ານໄດ້ກ່າວໃຫ້ຮູ້ວ່າ: ຫ້ອງການເຕັກໂນໂລຊີ ແລະ ການສື່ສານເມືອງຫົງສາ ປະກອບມີ 1 ບໍລິສັດ ແລະ 2 ສູນບໍລິການທີ່ຂຶ້ນກັບຄື: ບໍລິສັດໄປສະນີ, ສູນບໍລິການລາວໂທລະຄົມ ແລະ ສູນອີທີແອວ. ມີພະນັກງານ ທັງໝົດ 21 ທ່ານ ຍິງ 8 ທ່ານ. ໃນນີ້ ມີຄະນະຫ້ອງການ 2 ທ່ານ ຍິງ 1 ທ່ານ, ມີ 5 ໜ່ວຍງານໄດ້ຈັດແບ່ງຄົບຕາມຕຳ ແໜ່ງງານ. ມີພະນັກງານ-ລັດຖະກອນທີ່ເປັນສະມາຊິກພັກທັງໝົດ 15 ສະຫາຍ ຍິງ 5 ສະຫາຍ, ສຳຮອງ 1 ສະຫາຍ, ມີ 1 ໜ່ວຍພັກຮາກຖານ. ຜ່ານການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ຂອງພະນັກງານໄລຍະຜ່ານມາ ມີຜົນງານດີເດັ່ນສະແດງອອກຄື: ໄດ້ຮັບການຍ້ອງຍໍປະເພດຫຼຽນກາແຮງງານ ຈຳນວນ 2 ທ່ານ, ປະເພດຍ້ອງຍໍລັດຖະບານ ຈໍານວນ 2 ທ່ານ ແລະ ໃນຊຸມປີຕໍ່ໜ້າພະນັກງານ-ລັດຖະກອນ ໄດ້ຂຶ້ນຂໍ້ແຂ່ງຂັນກຳນົດໄວ້ 8 ຂໍ້ ຈະສູ້ຊົນໃຫ້ໄດ້ 85% ຂຶ້ນໄປ, ໜ່ວຍງານ ຂຶ້ນໄວ້ 9 ຂໍ້ ຈະສູ້ຊົນໃຫ້ໄດ້ 86% ຂຶ້ນໄປ, ຄະນະພັກ, ໜ່ວຍພັກ ແລະ ຫ້ອງການຂຶ້ນໄວ້ 11 ຂໍ້ ແລະ ສືບຕໍ່ຮັກສາມູນເຊື້ອໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄວ້ໃຫ້ໝັ້ນຄົງ.
ຕອນທ້າຍ ຍັງໄດ້ເປັນກຽດຮັບຟັງການມີຄໍາເຫັນ ແລະ ໂອ້ລົມຂອງທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ຄະນະປະທານຂອງກອງປະຊຸມຕື່ມອີກ.
ຂ່າວ: ກິດຕິສັກ ບົວໄລ
ຄໍາເຫັນ