ຮອງລັດຖະມົນຕີ ກະຊວງ ປກສ ເນັ້ນໃຫ້ກຳລັງປ້ອງກັນເຄື່ອນທີ່ ຮັບປະກັນໃຫ້ສັງຄົມມີຄວາມປອດໄພຮອບດ້ານ

ໃນໄລຍະຜ່ານມາ, ກອງບັນຊາການປ້ອງກັນເຄື່ອນທີ່ ກະຊວງ ປກສ ໄດ້ຕັ້ງໜ້າສຸມໃສ່ແກ້ໄຂປະກົດການຫຍໍ້ທໍ້ ແລະ ຄວາມບໍ່ເປັນລະບຽບຮຽບຮ້ອຍທາງສັງຄົມ ໂດຍຈັດຕັ້ງຜັນຂະຫຍາຍຄໍາສັ່ງເລກທີ 1470/ປກສ ແລະ ຈັດຕັ້ງປະຕິບັດ 1 ໂຄງການ 3 ກິດຈະກຳ ຂອງກອງບັນຊາປ້ອງກັນເຄື່ອນທີ່ວາງອອກຢ່າງເຂັ້ມງວດ. ພ້ອມນັ້ນ, ປະສານສົມທົບກັບອົງການກ່ຽວຂ້ອງຂັ້ນສູນກາງ-ທ້ອງຖິ່ນ ໃນການແກ້ໄຂບັນຫາດັ່ງກ່າວ ເປັນຕົ້ນ ການແກ້ໄຂບັນຫາຢາເສບຕິດ, ລັກຊັບ, ຊີງຊັບ, ປຸ້ນຈີ້, ການຄ້າມະນຸດ, ອຸບັດເຫດຕາມທ້ອງຖະໜົນ, ການຄຸ້ມຄອງນໍາໃຊ້ສື່ອອນລາຍ, ການຄຸ້ມຄອງ ໂຄງການຂອງບັນດາອົງການຈັດຕັ້ງທີ່ບໍ່ຂຶ້ນກັບລັດຖະ ບານ, ອົງການຈັດຕັ້ງສັງຄົມພົນລະເຮືອນ ເຫັນວ່າຍັງເປັນຊ່ອງວ່າງເຮັດໃຫ້ອິດທິກຳລັງປໍລະປັກ ແລະ ກຸ່ມ ຄົນບໍ່ດີສວຍໃຊ້ການໂຄສະນາ ທັບຖົມໂຈມຕີ, ໃສ່ຮ້າຍປ້າຍສີ ແນວທາງນະໂຍບາຍຂອງພັກ-ລັດ ເພື່ອສ້າງຄວາມສັບສົນໃນສັງຄົມ. ບັນຫາດັ່ງກ່າວນັ້ນ, ຮຽກຮ້ອງໃຫ້ບັນດາສະຫາຍ ເອົາໃຈໃສ່ສືບຕໍ່ຄົ້ນຄວ້າ, ຕີລາຄາຢ່າງພາວະວິໃສ ເພື່ອເປັນບ່ອນອີງພື້ນຖານໃຫ້ການນໍາພາ-ຊີ້ນຳກົມກອງ, ຂົງເຂດວຽກງານທີ່ນອນໃນຄວາມຮັບຜິດຊອບ ພ້ອມທັງຍົກສູງສະຕິລະວັງຕົວໃຫ້ສູງຂຶ້ນກວ່າເກົ່າ, ເດັດດ່ຽວສະກັດກັ້ນ ແລະ ທັບມ້າງບັນຫາໜໍ່ແໜງຄວາມບໍ່ສະຫງົບ, ເດັດຂາດບໍ່ໃຫ້ມີເຫດການວຸ້ນວາຍເກີດຂຶ້ນໃນຂອບເຂດທົ່ວປະເທດ. ແຕ່ເຖິງຢ່າງ ໃດກໍຕາມ ກຳລັງປ້ອງກັນເຄື່ອນທີ່ໄດ້ສືບຕໍ່ລົງແກ້ໄຂປະກົດການຫຍໍ້ທໍ້ ໃນນະຄອນຫຼວງວຽງຈັນ, ຢູ່ບັນດາແຂວງ ສົມທົບກັບກຳລັງອ້ອມຂ້າງ ເຮັດໃຫ້ສະພາບການຄ້າຂາຍຢາເສບຕິດ, ລັກຊັບ, ຊີງຊັບ, ປຸ້ນຈີ້ຫຼຸດໜ້ອຍຖອຍລົງ; ເປັນເຈົ້າການປ້ອງກັນກອງປະຊຸມລະດັບພາກພື້ນ-ສາກົນ, ກອງປະຊຸມສໍາຄັນຕ່າງໆ ຂອງພັກ, ຂອງຊາດ ແລະ ງານບຸນປະເພນີໃຫ້ມີຄວາມສະຫງົບປອດໄພຮ້ອຍສ່ວນຮ້ອຍ.

ໂອກາດນີ້, ສະຫາຍໄດ້ເນັ້ນໜັກໃຫ້ເພີ່ມທະວີການສຶກສາອົບຮົມ, ການເມືອງນໍາພາແນວຄິດ ໂດຍແນໃສ່ທາດແທ້ມູນເຊື້ອປະຕິວັດຂອງກໍາລັງປ້ອງກັນຄວາມສະຫງົບປະຊາຊົນ, ມີຄຸນສົມບັດ, ມີນໍ້າໃຈເສຍສະ ຫຼະຮັບໃຊ້ປະຊາຊົນໃຫ້ສູງຂຶ້ນຢູ່ສະເໜີ ເປັນກໍາລັງຂອງພັກ, ຂອງປະຊາຊົນຢ່າງແທ້ຈິງ ຕິດພັນກັບການປັບ ປຸງ ຍົກລະດັບຄວາມອາດສາມາດນໍາໃຊ້ເຄື່ອງມື, ອຸປະກອນທີ່ທັນສະໄໝໃຫ້ເໝາະສົມກັບເງື່ອນໄຂປັດຈຸບັນ; ເອົາໃຈໃສ່ຊີ້ນໍາວຽກງານກຽມພ້ອມສູ້ຮົບດ້ວຍການສືບຕໍ່ກໍ່ສ້າງ, ປັບປຸງກໍາລັງ, ລະບົບສູນບັນຊາ, ພາຫະນະ, ວຽກງານຮັບປະກັນ, ແຜນການກຽມພ້ອມສູ້ຮົບຕະຫຼອດ 24 ຊົ່ວໂມງ; ເອົາໃຈໃສ່ສ້າງ-ປັບປຸງນິຕິກຳທີ່ກ່ຽວ ຂ້ອງກັບກົມກອງ, ລະບຽບການ, ກົນໄກກວດກາ-ຄຸ້ມຄອງການປະຕິບັດໜ້າທີ່ຂອງພະນັກງານແຕ່ລະຂັ້ນໃຫ້ຮັດກຸມ, ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ ຕາມແຜນການທີ່ໄດ້ກຳນົດໄວ້ນັ້ນ ໃຫ້ກາຍເປັນຂະບວນການທົ່ວສັງຄົມຢ່າງແທ້ຈິງ ຮັບປະກັນເຮັດໃຫ້ສັງຄົມມີຄວາມສະຫງົບປອດໄພຮອບດ້ານ, ເອົາໃຈໃສ່ຈັດຕັ້ງຜັນຂະຫຍາຍບັນດາມະຕິ, ຄຳສັ່ງຕ່າງໆ ທີ່ຄະນະພັກກະຊວງວາງອອກໃຫ້ມີຜົນສໍາເລັດສູງຂຶ້ນ.

ຂ່າວ: ສັນຕິສຸກ