ການລົງມາໃນຄັ້ງນີ້, ທ່ານ ຄຳພັນ ຄຳພູບົວ ປະທານຄະນະກຳມະການປົກຄອງເມືອງພຽງລາຍງານສະພາບການຈັດຕັ້ງປະຕິບັດບາງວຽກງານທີ່ພົ້ນເດັ່ນ ຂອງເມືອງໃນໄລຍະ 1 ປີຜ່ານມາໂດຍຫຍໍ້. ເມືອງພຽງ ປະກອບມີ 51 ບ້ານ, ມີ 11 ພັນກວ່າຄອບຄົວ, ມີ 66 ພັນກວ່າຄົນ ຍິງ 32 ພັນກວ່າຄົນ ແລະ ມີ 8 ເຜົ່າອາໄສຢູ່ຮ່ວມກັນ. ໃນໄລຍະຜ່ານມາ, ເມືອງພຽງ ສາມາດຮັກສາໄດ້ສະຖຽນລະພາບທາງດ້ານການເມືອງສັງຄົມມີຄວາມສະຫງົບປອດໄພໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ສາມາດສົ່ງອອກສິນຄ້າກະສິກຳ ມີມູນຄ່າ 540 ກວ່າຕື້ກີບເປັນຕົ້ນແມ່ນ: ໝາກເດືອຍ, ສາລີ. ມັນຕົ້ນ ແລະ ຜົນຜະລິດກະສິກໍາອື່ນໆ. ການພັດທະນາພື້ນຖານໂຄງລ່າງ ໄດ້ຊຸກຍູ້ໃຫ້ປະຊາຊົນກໍ່ສ້າງເສັ້ນທາງປູເບຕົງໄດ້ 8 ເສັ້ນ, ມີ 8 ບ້ານ ມີລວງຍາວທັງໝົດ 2,300 ກວ່າແມັດ, ມູນຄ່າ 2 ຕື້ກວ່າກີບ ດ້ວຍທຶນຂອງປະຊາຊົນ ແລະ ເມືອງສົມທົບຈໍານວນໜື່ງ. ມາຮອດປັດຈຸບັນ ມີເສັ້ນທາງປູເບຕົງທັງໝົດເກີບ 40 ເສັ້ນ, ຍາວເກືອບ 7 ພັນແມັດ ກວມ 17 ບ້ານ, ລວມມູນຄ່າທັງໝົດ 5 ຕື້ກວ່າກີບ ແລະ ວຽກງານອື່ນໆ ກໍມີຄວາມສໍາເລັດ.
ທ່ານຮອງປະທານປະເທດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດວຽກງານຂອງອົງຄະນະພັກແຂວງ ກໍຄື ອົງຄະນະພັກເມືອງພຽງ ທີ່ສາມາດຍາດໄດ້ ພ້ອມກັນນັ້ນ ກໍໄດ້ຍົກໃຫ້ເຫັນເຖິງສະພາບການຂອງພາກພື້ນ, ສາກົນ ແລະ ການຮັບມືບັນຫາເສດຖະກິດທີ່ຜັນແປຂອງປະເທດລາວ ເປັນຕົ້ນແມ່ນໄພເງີນເຟີ້, ຄ່າຄອງຊີບສູງຂຶ້ນ ແລະ ໄດ້ເນັ້ນໜັກໃຫ້ຄະນະນຳຂອງແຂວງກໍຄືຂອງເມືອງໃຫ້ເອົາໃຈໃສ່ນຳເອົາແນວທາງນະໂຍບາຍຂອງພັກ, ນິຕິກຳປ່ຽນແປງໃໝ່ໃນດ້ານຕ່າງໆລົງໄປເຜີຍແຜ່ເຊື່ອມຊຶມໃຫ້ປະຊາຊົນບັນດາເຜົ່າຢ່າງທົ່ວເຖິງ ສືບຕໍ່ຈັດຕັ້ງປະຕິບັດ 2 ວາລະແຫ່ງຊາດກໍຄືການແກ້ໄຂບັນຫາຢາເສບຕິດ, ການແກ້ໄຂບັນຫາເສດຖະກິດ ແລະ ການເງິນ, ຫັນພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ເອົາໃຈໃສ່ສ້າງເສດຖະກິດເອກະລາດເປັນເຈົ້າຕົນເອງ ເພື່ອພັດທະນາຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນເປັນກ້າວໆ. ໃນໂອກາດນີ້, ທ່ານຮອງປະທານປະເທດ ພ້ອມຄະນະ ກໍໄດ້ເຂົ້າຮ່ວມງານບຸນກີນຈຽງ ຫຼື ນໍເປເຈົ່າຂອງເຜົ່າມົ້ງຢູ່ເມືອງພຽງ.
(ຂ່າວ: ວົງສະຫວັນ ສຸທິໂວຫານ)
ຄໍາເຫັນ