ໂອກາດນີ້, ທ່ານ ສົມແວວເພັດ ດວງປະສິດ ກຳມະການພັກແຂວງເລຂາພັກເມືອງ ເຈົ້າເມືອງຊຽງເງິນ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງເມືອງ, ຕິດພັນກັບການຈັດຕັ້ງປະຕິບັດວຽກງານກະກຽມ ແລະດຳເນີນກອງປະຊຸມໃຫຍ່ 3 ຂັ້ນ, ທ່ານກ່າວວ່າ: ປັດຈຸບັນເສດຖະກິດຂອງເມືອງ ໄດ້ມີການເຕີບໂຕຢ່າງຕໍ່ເນື່ອງ, ໝັ້ນທ່ຽງ ແລະຖືກທິດ, ສະເລ່ຍ 5,96%ຕໍ່ປີ; ສະເລ່ຍລາຍຮັບບັນລຸ 14 ລ້ານກວ່າກີບ ຫຼື ຫຼາຍກວ່າ 734 ໂດລາຕໍ່ຄົນຕໍ່ປີ; ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍໂດຍພື້ນຖານ ປະຊາຊົນບັນດາເຜົ່າຍູ່ທ່າງທຳມາຫາກິນ, ມີວຽກເຮັດງານທຳນັບມື້ນັບຫຼາຍ, ຊີວິດການເປັນຢູ່ນັບມື້ນັບມີຄວາມສະດວກ, ມີຫຼາຍຄອບຄົວກາຍເປັນຕົວແບບດ້ານການປູກຝັງ-ລ້ຽງສັດ, ການສ້າງບ້ານໃຫຍ່ເປັນຕົວເມືອງໃນຊົນນະບົດ ໄດ້ກໍານົດເອົາຢູ່ 3 ຈຸດຄື: ບ້ານສວນຫຼວງ, ບ້ານກີ່ວກະຈຳ ແລະບ້ານພູຊ້າງ ຊຶ່ງມາເຖິງປັດຈຸບັນສາມາດບັນລຸຕາມມາດຖານ, ເງື່ອນໄຂ ທີ່ໄດ້ກຳນົດຕາມດຳລັດ 348 ຂອງລັດຖະບານ ໃນນັ້ນ ບ້ານສວນຫຼວງ ສາມາດບັນລຸທຸກເງື່ອນໄຂ ທີ່ໄດ້ກຳນົດໄວ້ທັງໝົດ ແລະພວມກະກຽມປະກາດຢ່າງເປັນທາງການໃນມໍ່ໆນີ້, ບ້ານກີ່ວກະຈຳ ສາມາດບັນລຸ 12 ເງື່ອນໄຂ, ຍັງບໍ່ທັນບັນລຸ 4 ເງື່ອນໄຂ ແລະບ້ານພູຊ້າງ ສາມາດບັນລຸ 12 ເງື່ອນໄຂ, ຍັງບໍ່ທັນບັນລຸ 4 ເງື່ອນໄຂ. ສຳລັບການຫ້າງຫາກະກຽມ ແລະດຳເນີນກອງປະຊຸມໃຫຍ່ 3 ຂັ້ນຂອງພັກ ໄດ້ສຳເລັດການລົງປັບປຸງລະບົບການເມືອງຢູ່ຂັ້ນຮາກຖານບ້ານ ແລະພວມດຳເນີນການລົງປັບປຸງ ຢູ່ຂັ້ນຮາກຖານພັກສຳນັກງານ-ອົງການ,ກ່ຽວກັບການຫ້າງຫາກະກຽມດຳເນີນກອງປະຊຸມໃຫຍ່ອົງຄະນະພັກເມືອງ ຄັ້ງທີ VII ຂອງເມືອງຊຽງເງິນ ແມ່ນສາມາດກະກຽມສຳເລັດຂັ້ນພື້ນຖານ ເປັນຕົ້ນດ້ານເນື້ອໃນ, ດ້ານສະຖານທີ່-ພິທີການ ແລະດ້ານບຸກຄະລາກອນ.
ໂອກາດນີ້, ທ່ານ ບຸນທອງ ຈິດມະນີ ໄດ້ເນັ້ນໃຫ້ການນໍາເມືອງ ສືບຕໍ່ເອົາໃຈໃສ່ນໍາພາເຮັດວຽກງານການເມືອງ-ແນວຄິດ ໃນທົ່ວລະບົບການເມືອງ ແລະທົ່ວສັງຄົມ ໃຫ້ເລິກເຊິ່ງ, ທົ່ວເຖິງ ແລະແທດກັບຕົວຈິງຕາມແຕ່ລະເປົ້າໝາຍ, ສືບຕໍ່ຍູ້ແຮງການປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ລວມທັງການຈັດຕັ້ງປະຕິບັດບັນດາມາດຕະການ ແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຢ່າງຕັ້ງໜ້າໜັກແໜ້ນກວ່າເກົ່າ, ເອົາໃຈໃສ່ພັດທະນາຂົງເຂດວັດທະນະທໍາ-ສັງຄົມຂອງເມືອງ ຕິດພັນກັບວຽກງານພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະວຽກງານ 3 ສ້າງໃຫ້ເປັນຂະບວນຟົດຟື້ນ, ສຳລັບການກະກຽມ ແລະດຳເນີນກອງປະຊຸມໃຫຍ່ຂອງອົງຄະນະພັກເມືອງ ໃຫ້ສືບຕໍ່ຈັດຕັ້ງປະຕິບັດຕາມແຜນການທີ່ກຳນົດ ຮັບປະກັນເຮັດໃຫ້ກອງປະຊຸມບັນລຸຜົນສຳເລັດ.
ໂອກາດຢ້ຽມຢາມ ແລະເຮັດວຽກຢູ່ເມືອງຊຽງເງິນ ແຂວງຫຼວງພະບາງ ຄັ້ງນີ້ ທ່ານຮອງປະທານປະເທດ ໄດ້ໃຫ້ກຽດເຂົ້າຮ່ວມຢອດຢາປ້ອງກັນພະຍາດໃຫ້ເດັກນ້ອຍ ພ້ອມທັງມອບອຸປະກອນການສຶກສາ-ກິລາ ແລະອຸປະກອນການແພດໃຫ້ອົງການປົກຄອງເມືອງ ຕື່ມອີກ.
(ຂ່າວ: ອາພຸດເດດ ບຸບຜາ;ພາບ: ທະນູສິນ ອິດທິພົນ)
ຄໍາເຫັນ