 |
ໃນໂອກາດນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງສອງປະເທດໃນຕະຫຼອດໄລຍະ 75 ປີຜ່ານມາ ທີ່ໄດ້ຮັບການພັດທະນາຢ່າງຕໍ່ເນື່ອງໂດຍເຫັນໄດ້ຈາກມີການແລກປ່ຽນສານສະແດງຄວາມຊົມເຊີຍໃນໂອກາດສໍາຄັນຕ່າງໆ ແລະ ມີການພົບປະຂອງການນໍາຂັ້ນສູງຂອງສອງປະເທດໃນໂອກາດເຂົ້າຮ່ວມກອງປະຊຸມສາກົນຕ່າງໆຢ່າງເປັນປົກກະຕິ, ພ້ອມທັງໄດ້ສະໜັບສະໜູນຊຶ່ງກັນ ແລະ ກັນ.
ທ່ານ ໄຊຊະນະ ໂຄດພູທອນ ໄດ້ສະແດງຄວາມຊົມເຊີຍຕໍ່ທ່ານເອກອັກຄະຣາຊະທູດໄທທີ່ໄດ້ສໍາເລັດໜ້າທີ່ການທູດຂອງຕົນຢູ່ ສປປ ລາວ ຊຶ່ງໄດ້ປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືທີ່ດີລະຫວ່າງລາວ ແລະ ໄທ ໃຫ້ກ້າວຂຶ້ນສູ່ລະດັບສູງ ພ້ອມທັງໄດ້ປະກອບສ່ວນສະໜັບສະໜູນ ແລະ ຊ່ວຍເຫຼືອໃນການພັດທະນາທາງດ້ານວິຊາການ ໂດຍສະເພາະການຕ້ານອາດຊະຍາກໍາຂ້າມຊາດກ່ຽວກັບບັນຫາຢາເສບຕິດ, ການຟອກເງິນ, ການຄ້າມະນຸດ ແລະ ການດໍາເນີນຄະດີທາງປົກຄອງ ແກ່ອົງການໄອຍະການປະຊາຊົນສູງສຸດ ໃນໄລຍະຜ່ານມາ.
ພ້ອມກັນນີ້, ທ່ານນາງ ມໍຣະກົດ ສີສະຫວັດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນແລະ ໄດ້ສະແດງຄວາມໝາຍໝັ້ນວ່າສະຖານເອກອັກຄະຣາຊະທູດໄທປະຈຳ ສປປ ລາວ ຍັງຈະສືບຕໍ່ສະໜັບສະໜູນ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດກໍຄືອົງການໄອຍະການປະຊາຊົນສູງສຸດ ແຫ່ງ ສປປ ລາວ ໃຫ້ແຕກດອກອອກຜົນຍິ່ງໆຂຶ້ນ.
(ຂ່າວ-ພາບ: ອອປສ)
ຄໍາເຫັນ